MATRIC FAIL!

~Rev. Lalbiakhlira 

Matric fail te hi rin phâk bâkin an buai: 

"Engmah ka ni lo!", 

"Ka chhûngte an thinrim ngawt ang!", 

"Lehkha zir zêl chi ka ni ve lo!", 

"Nupui ru daih ila!", 

"Pasal ûm daih ila!", 

"Rûi ila, ka nuam deuh ang!", 

"Thih daih ka duh!" te an ti a nia! 

En liam ngawt suh. Vawi khat fail hi in chhûngkuain in lo chhiatpui hlauh dah ang e.

1. In chhûngkua kha lo inhau lo hrâm teh u. Nu leh pa ngei pawh kha, i inkhawngaih viau thei. I thawhrimzia te, pawisa i sên nasatzia te, i rilru i sên nasatzia te i ngaihtuah lo thei lo a. Kumpui lingleta a tâna i inpêkna chu engmah lo va luang ral ta! nia i hriat tlat chuan i na dawn lutuk! Ni e, fail thiang a ni lo; vuak hrep i châk khawp ang! Mahse, insûm rih hrâm teh. I fa duat khân fail a duh bîk lo, fail a inrin sa deuh phei chuan rilru lamah a lo tuar nasa tawh! A la fail tak tak zui a nia! A zam, a zak, a rilru chhun angin a nâ, a buai, a hlau che. Hauh a ngâi tawh hran lo; hriatthiam leh tawrhpui a mamawh zâwk. Nangmah kha hnêmtu a tân i țha ber asin! 

2. I fanu/fapa rilru nâ kha hnêm teh. Engmah sawi loa i ngawih mai mai khân a buai tulh tulh! I thinrim nge i lawmpui a hrethiam lo, a mangang a nia! A rilru hreawmna țawmpui la, tawrhpui la, țawng chhuak hrâm teh: "Mâma/Mâmi, hreawm ti reng reng suh, i duhdân a ni bîk hleinêm! Theihtâwp kan chhuah tlâng ang a, Pathian hnênah kan inhlân tlat bawk ang a. I la hlawhtling dâwn khawp mai" ti la, a thaw hawk hawk mai ang. Han khawngaih êm êm phawt mai teh, i tisual lo ang. I țahpui theih phei chuan a dam khawp ang.

3. I hlawhchham lo; pâwl i sawn rih lo mai a ni zâwk. Kum khat zir hriatbelh nei lo a awm theih loh. Pass mark hmuh tlin loh erawh a awm thei alâwm. Zir chhun chhun a chhuak thei a; zir loh apiang a lo chhuak thei bawk asin! I exam lâi khân i taksa leh rilru lam pawh a dam lo thei alâwm. In chhûngkuain chhiat in tâwk a ni thei a. I rilru chawkbuai vek thei nêktu buai a nei thei asin! I theihnghilh tâ em ni? In chhûngkaw boruakte kha thlîr kîr teh. Fail theihna thil hi a tam ania. Exam pass leh pass loh inkâr hi a hla lo mang e! Pathian thu thu a lo ni tih i hrethiam mai em?

4. Kumina i fail avâng ngawt khân i hlawhchham tihna a ni ngawt lo. Matric bei nawn, mi hlawhtling an tam êm mai. Beih nawn beih nawn leh hmalam pan zêl hi hlawhtlinna chu a ni zâwk. Mi hlawhtlingte chanchin i chhiar ve ngâi a nih chuan, "An hlawhtlin hmâ hian an fail mawlh mawlh phawt" tih i hria ang. Ngawi teh, matric fail pha lo zîngah mi hlawhtling an tam lutuk! Tun țum matric i fail avânga "hlawhchhama i inngaih" tlat chuan i thleng thui thei nâng maw le. I hlawhtlinna turin i fail a ni zâwk lo'ng maw? Ngaihtuah chiang la, harhchhuah nân hmang teh.

5. I fail chhan ngaihtuah lêt la, rahbi thar tuk la, hneh vek teh. I lehkha zir hun tih tam a ngâi em? I zir dân kalhmang her rem a ngâi em? Thil dang pawh siamrem ngâi i nei thei. Film i enin, mittui titla ngawt suh. A changtupa/a changtunu kha misualin an sawisa hrep phawt a, harsatna hrang hrangin a tlâkbuak hmasa țhin tiraw? A intuai thar zet a, harsatna reng reng 'a fight back' a, a hneh lêt vek a, a tâwpah a dingchang țhin a ni lo'm ni? I entawn tura an chan chawp a nih kha! Țhu kun lup reng lovin, hmasâwn nân hmang țangkâi hlauh ta che. 

6. Thil tum nei mumal lo reng reng an tâlbuai châwk. I tum (aim in life)-ah chiang la, matric i fail avâng ngawtin bânsan suh. Kawnga tlu palh tho leh lo reng reng an mu hlen țhin! I nih tum i la siamfel lo a nih chuan Counsellor ten an pui thei ang che. Tumah i chian phawt chuan I tum bulpui chu, Pathian siam chhan che - Amah tiropui tur ni ngêi rawh se. Matric vawi 10 pawh fail la, i hlawhchham ngâi lo ang.

7. Bible-a Pathian thu kan hmuh chu: "LALPA țih hi finna bul a ni a; nimahsela mi âte chuan finna leh zirtîrna an hmusit țhin" (Thuf 1:7) tih a ni. Lal fing filawr, finna hmingthanpui, Solomona sawi a nih hi. A risk lo, a nunin a tawnhriat ngêi, Pathian pêk ngêi a ni a sawi ni! Matric chu țha takin lo pass ta pawh ni la, Pathian i țih loh chuan Officer zu bur! i la ni thei a; Mi rethei chan ai ei zotu! i ni thei asin! I dam rei loh phah hial thei a! Hremhmun luahlumtu i ni chatuan thei asin! Matric fail avâng ngawtin finna Pathian hi hawisan chi a ni lo. Finna neitu chu Pathian bêl tlat la, matric fail avâng ngawtin i hlawhchham ngâi lovang.

PATHIANIN IN CHHÛNGKUA COVID-19 LAKAH VÊNGHIM CHE U SE LA; MATRIC FAIL TICHAK CHE U RAWH SE.