James Dokhuma Kamliam

*PADMASHREE DR. JAMES DOKHUMA KAMLIAM*

Mizo pa ropui Pu James Dokhuma kha vawikhat chu inneihna-ah a kal a, fuihna thu sawi turin an lo ti a. A ding a, heti hian a sawi a..

"Aw le, kei hi vawiina inneite fuihtu tur ber ka ni em tih phei chu ka inhre hauh lo. Amaherawhchu, a zawhte upata upa ve ta na na na chu, tawn leh pal hriatte a ngah e min tite pawh a ni fahmiang. Mahni mawhphurha tla na na na chu theihtâwpin kan han hlenchhuak ṭalh ṭalh tur lah ni.

Mizote’n ‘innei’ kan tih han fuh bik zia mai chuh! Vai ṭawnga 'Sadi' an tih hian a hril pha em tih phei chu ka hre hauh lo. Ka ṭawng thiam tâwk loh vâng lah ni maw? Sap ṭawnga 'Married' an tih hian a hril pha em tih lah ka hrelo. A!!! A hril pha anih pawhin ka hre lo kei chu. Mizopa ṭawng ina ‘innei’ kan tih chu lai leh laia intâwk ‘fifty fifty’ kha ‘hundred’-a a channa a ni. Sawmnga note leh sawmnga note kha zain kan thleng tlang ta tihna a ni.

Mizo hi kan mak khawp a, kan nupui tur chu kan fate rual lek pawh ni se, kel sam bak ṭo tawh pawhin nupuiah nei sela, Mizo nunah chuan mipa hi duat ngai zâwka inhre tlat hnam kan ni a, hmeichhiate hi in fin hle a ngai. Chumi in tihdân tur chu ka’n sawi ang e : Bilât artui pakhat ṭheuh ṭheuh pawh hi in han chawi bûk lãk lãk ang a, ‘Hei hi a rit ṭha zâwkin ka hria, Matei pa’n ei rawh se,’ in han tih ringawtte hian kan thawh ngai loh hna hram pui puite hi kan cho uai uaih zel anih hi!
Vai dawra lukham bûk inang reng, a rih lam inang reng in lei a, leika tlâng sângah in pho va, in han hem lum a, zân mut dâwnah nuin mutna a’n siam a, a’n bêng thawk thawk a, ‘Hei hi a lum nuam zâwk, Bawihtei pain kham rawh se,’ a’n tih ṭawngkam ṭha ringawtahte hian kan la fan ngai loh leh kan la tlawh ngai loh ram hi kan mang kal zut zut mai zu nia.

Mizote’n kan thil chìna ṭha lo ka tih deuh pakhat chu, kan innei ta chèng a, kan inrîm laia, ‘Muante, Muante,’ inti ṭhin kha, intih pâ nan inneih tûk aṭangin ‘Lalmuanpui’ kan han inti ful ful hi thil tihchi a ni hauh lo. ‘Muante’ kan tih pawh kha ‘Muante’ ti phal tawh lovin, ‘Bawihte,’ han ti ila, chhûngril lamah hian hmuh theih lohvin lâwmna chibai kan inbûk tawr tawr zel ngai nia mawle.

Vawiina in innei hi inhmangaihna thu in sawi tam tawh em vânga innei in ni lo va, dam chhûnga hmangaih thu sawi zawm zel turin in innei ṭan chauh a ni zâwk. In nutei fate emaw, in kawmchhak naute emaw, in patea fate vânga in sawi loh bung rem rum kha sawizawm char char turin in innei tihna a ni zâwk e. Kha’ng ka sawi anga in ti a nih ngat zawngin nuin an thingrem rawn chhawm luhte a rawng khawh hmaa chhîpchhuan chhuah lûk lûk chu a ngai hauh lovang. In thosilente in tlawh ṭeh hmaa ṭhiah rup rup lah a ngai hauh lovang tih hi ka tiam ngam khawp mai che u.".....//.

Source : Whatsapp Group