HEI LE! EVOLUTION THEORY CHU!

~Familia Fanai Lalṭansanga

THUHMAHRUAI 

Thu mu hnu mah ni se, scientific thinking pawimawhzia kan hriat phah theih nan han sawi leh hlek ila; Mizoram MP Election 2014   neih dawn tep khan EVM tihchingpen a nih thu mi zahawm tak pakhatin Media kaltlangin  a puangzar a, inthlanna hmanrua la tura DC office complex-a kan ţhut laiin kan thawhpui M.A.B.Ed val, kohhran pakhata rawngbawltu chuan chu a thil hriat chu rapthlak a tih thu hahipin min hrilh chiam a,mi dang pawh chu chanchin mak hril chu sawiin an inbawr tiau tiau hlawm a. EVM khawl khawihtu Presiding Officerte leh polling official-te meuh pawhin chu thuthang chu an awi tak tak a nih ngai chuan Mizoram mipui nawlpui lehkha thiam lote phei chu an chi-ai hle dawn a nih hi tiin selection grade science teacher leh responsible citizen nih manah EVM tihchingpen theih a nih loh zia ka han ziak teh ang, ka ti a, SR-ah ka post a, Admin te’n min lo approve-sak a, mite chhiar a hlawh hle a, mi tam tak ngaihdan a kaihruai thei a, ka lawm hle. Kha thil kha ka ngaihtuah vang vanga sorkar-in EVM a tichingpen ni-a puhtute khan scientific thinking nei se, an mualpho hauh lo vang! ‘Scientist’ ber lah kha ka zirlai naupang hlui a lo ni ngelchel a, DDK news stringer ṭha ber tura ka hual a hming a chhe bawk!

US Presodential election 2020 zet chu a pui miah miah hle a, a chak lo pawl thu phuahchawp, conspiracy theory, false claim leh unsubstantiated claim chawktak khuka khukpui an tam hle a. Sakhuana leh politics hian mihring thluak a lo suk theihzia a tar lang chiang hle. 

Nimina kan lenna-ah naupang 1 lehkha a lo zir a, a nu leh pate chuan mathematics chu a man a, Science chu an sikul science zirtirtu a thiam loh avangin a man lo va, a awmze hre lovin an by-heart tir tawp a, a u pawh hian a man lo va, Class 11-ah pawh Science lam a zir theih loh phah an lo ti a. He harsatna hi tun hma atanga Mizoram pum huapa kan tawn tawh leh kan tawn mek a la ni zel a. Kan syllabus fuh tawk loh avangte  leh science zirtirtute inthlahdah avangin mi tam takin scientific thinking kan tlakchham phah fo. Science leh Maths hi chu a bulthut atanga inphaman leh inkhadiat chhova zirtir a pawimawh. 

Mizoramah Hlimsang theology kan hmachhuan rei lutuk a, min kaihruaitute science an thiam loh avangin min zirtirna tam tak hi consistency a nei lo va, a subjective lutuk a, hma kan sawn tur angin hma kan sawn thei lo va, rah kan chhuah tur angin rah kan chhuah thei lo.Mizo thalai lehkhathiam zingah pawh Pathian hi mahni mit,beng leh thinlunga zawn hmuh kan tum lo va, mi dang sawi (Evangelist & Tic team etc.) atanga hmuh,hriat leh thinglunga sengluha pianthar kan tum a, kan piantharna kha speaker a kal bo rualin a bo nghal duak thin!

He thu hi mi dang rilru tihnat tuma post ka ni lo va,an lo la ngaihtuah ngai loh ngaihdan zau leh thar  an lo neih theih na tura post mai ka ni a, mi rilru ka hliam palh chuan ngaihdam ka dil nghal e.

KRISTIAN TALIBAN; Kan ţhalaite nen generation gap zau tak nei tawh Evangelist-te leh  Pastor te hi kan Pathian thu hriatna hnâr an la nih rih miau si avangin Mizo zingah kan Pathian thu hriatdan hi a Taliban-na lai a awm ve thei a, mahni ngei thinlung kawngkhar hawnga Pathian thu zir tum si lo hian kan inti Kris-a kan ruh ve em em ringawt a. Bible kan zir danah hian ngaihdan tum tlang deuh nei sa(prejudiced),hnial hrat tukhum pawngho ang ziazanga mi hnial dâng tum zawnga kan zir chuan a dik hauh lo thei tih hriat a ţha a. Evolution Theory pawh hi a chepa kaia sawi si lovin perverted view nei sa run, tarmit rawng neia thil hmuh ang deuh,amah A.Thanglura’n sa-nghar mumang fiah lo deuh ruai a tih ang deuhvin Pulpit maichama an sawi kan ngaithla thin a, an sawi sual a, kan hre sual bawk a, ngaihdan dik lo kan neih phah ta bawk a.Charles Darwina theory sawi rik dek dek hian mitdel zahmawh khawihsak an sawi angin kan her vut a, thinrim zetin a sawitu chu kan tawng ta chiam chiam ţhin niin a lang.

Mihring rilru chi hnih a awm thei a, open mind leh vacant mind; Vacant mind nei mihring chuan a ngaihdan bak ngaihdan dang tha zawk leh fing zawk pawh a pawm duh ngai lo va, a do chiam thin a, chutiang vacant mind rilru pu mihring chu hma a sawn tak tak thei ngai lo a ni. Chhura rual rilru a pu e, an tih ang mihring kha an ni. 

 

Open mind rilru pu mihring chuan hmakhawsang atanga thil inhrilh chhawnna ziak chi hrang hrang atanga hriatna tam tak fawmkhawmin chu a hriatna lakkhawm atang chuan finna a pawchhuak thiam a, hma a sawn thei a, a changkang ta thin a ni. 

CHARLES DARWIN; Kum 1809 February ni 1 khan Shrewsburry, Shropshire, England ah a lo piang a, kum 16 a nihin Edinburgh University-ah medical a zir a, a zirlai a la na lo hle mai a. 1828 kumah Christ College, Cambridge-ah BD a zir a, 1831 kumah Wales ramah ‘geographical field trip’ an neihpui a, heta ţang chiah hian nungcha, fulia fate chanchin zirbingna lamah a tui thar ta thut mai a ni. Mizo khualchawm kohhran zingah ‘tic team an rawih lai,mi khual hmel hmuh laia hlim ta thuta a kohhran pum huapa,kan dak leh hma kar 2 vel kan lam mup mup lai anga a thlarau dawn fuh lai takin Charles Darwin chuan South America khawmual tuifiriat kam zawng zawng hrut-a expedition nei tur HMS Beagle lawngah a invawmlut ve thei ta hlauh mai a. Hmanraw pawimawh zet chi 2 a paipawn a; 1 chu Charles Lyell ziak Principles of Geology Volume 2 leh London Sa huan enkawltu hnen atanga a zirchhuah- ran nung thi tawh ruang vawnţhat dan; Darwin hi Pathian awm ring lo mi kan tih ang atheist a ni lo va, agnostics an tih, Kristiante’n Pathian kan tih a ni emaw ni lo emaw, siamtu leh bultantu thil ti thei tak awm ring tlat mi a ni. 

KHAWVEL A FAN THU; Kum 5 chhung teh meuh chu lawng chuan tuifinriat kam vel a hrut lai hian Charles Darwin hian thla 18 (kum 1 leh a chanve) chiah lawngah hian a awm hman a, a bak zawng chu nungcha chanchin zirin khawmual hmun hrang hrangah a vak a vak mai a ni.

Brazil ram Rio de Janeiro khawpui dai fem ramhnuai hmun zimte-ah sephung chi hrang hrang 68 zet a hmuh chuan a rilru-ah thil tam tak a ngaihtuahchhuahtir ta a. South America khawmualpui khawthlang lam an tlawh hnu chuan khawmual atanga km 1000 zeta hla Pacific tuifinriata thliarkar fianrial zet pakhat Galapagos an tih hmun an tlawh leh ta a. Mak tak maiin helaia nungcha awmte hi S.America khawmuala awm nungchate nen inlaichina hnai tak nei siin an danglam vek tih a hmuchhuak ta bawk a ni.An chenna hmun a zir leh an chaw ei azirin an lo danglam hret hret ni turah a ngai a.

Chung a thil hmuh atang chuan hetiang hian a ngaihtuah ta a. Thil nung reng reng hi thlahtu thu hmun pawh an lo inang vek lo va, vun dum leh hang lamte chuan thim tham zingah emaw, ram ngaw pik thim takah lo khawsa ta se,a eitu tur emaw, a sehtu tur khan vun var leh ngo tak ai khan a hmu fiah thei lo ang a, chu thil nung dum leh hâng chuan damkhawchhuah theihna remchang a nei tam ta zawk dawn a, chu rannung damkhawchhuak thei chuan amah ang hang leh dum bawk chi a thlahpung zel dawn ta a, chhuan 20,30-ah chuan Vai chi leh mi dum chi a chak kan tih ang hian an lo hang zel dawn ta a lo ni. Amah Zikpuii pa ţawngkamin han sawi ta ila, “A ruh no no chhuakah” tih kha a thupui fun chu a ni ber a.Chu chu ngaihdan (hypothesis) mai a la ni a, a dikna lantir turin evidence kum 25 chhung zet a khawnkhawma, a zir a zir a. Chuta tang chuan he ngaihdan hi a lo dik ngei e, tiin a rawn finfiah (proved) thei ta a ni.

EVOLUTION THEORY BUL INŢANNA;

610-546 BC; Greek philosopher Anaximander (610-546 BC) thil nung tin reng hi tuifinriata sangha atanga rawn insiam ţanin khawmuala an rawn chuan chhuah hnuin thil nung chi hrang hrangah an rawn insiam pung ta a ni ang tiin ngaihdan a lo sawi tawh.

1735 AD; Carl Linnaeus(1707-1778) chuan taxonomy zirna atana a lungphum Systema Naturae tih lehkhabu a tichhuak a. a hnu-ah thing leh mau zawng zawng hi bul thuhmun leh inang atanga ţaidarh zel an ni ang tiin a lo ziak a ni.

1830 AD; Charles Lyell(1797-1875) chuan khuarel leh khawchin avanga khuanu kutchhuak te zawi zawia a lo danglam hret hret theih dan Principles of Geology lehkhabu a tihchhuak a, Grand Canyon awmdan a zir atanga a thil hmuhchhuah a ziak a ni a.He lehkhabu hi Charles Darwin ngaihdan kaihruaitu ber a lo ni ta.

1831 AD; Charles Darwin (1809–1882) chu HMS Beagle lawngah chuang tel vein khawvel hmun hrang hrang kum 5 zet a fang.

1838 AD; Darwin chuan a thil hmuhchhuah leh zirna atangin theory of natural selection a hmarbawk fel thei ta a, a zawh hnu-ah pawh kum 20 zet a bu-a tichhuak lo vin a thulkhung. A ngaihdan hrula mi dang thil hmuhchhuah a bu-in chhuah an tum tak si avangin 1859 kum khan ‘On the Origin of Species’ tih chu a bu-a tihchhuah a nih rualin phung zinga piring vawrh an sawi angin hralh zawh vek nghal a ni!

1865 AD; Czech Roman Catholic puithiam,a thih hnu fe a, father of modern Genetics an tih tak hial Gregor Mendel (1822–84) chuan motor chana(green pea) chi inthlahchhawn zel chungchanga a thil hmuchhuah pawimawh zet,laws of inheritance chu a bu-in a tichhuak a.He a thil hmuhchhuah pawimawhzia hi khawvel hian hre lovin kum 35 a in-upbo. Mizo upate’n sakawlin sakawla hring, sunhlu kungah thei ang a rah lo,kutkem nei chhungkua chuan an thlahte thleng kutkem an nei zel,sawn fa-in sawn an thlak leh bawk,an lo tih ang kha Mendela chuan chana hmangin scientifically-in a lo finfiah (proved) thei a ni.

1871 AD; Darwin lehkhabu 2-na The Descent of Man a bu-a tihchhuah a niin hei zet hi chuan tawngtu a ngah ta hle mai a, kum zabi 19-na-ah khan khawvel hian Evolution theory bak hi sawi tur an nei lo an ti hial a ni.Mihring thlahtu thu hmun kan nei ngei ang tia a chhuina lamah Africa ram ngaw-a zawng pawh a ni mai thei ti lam hawi deuhvin subject tam tak titi phunglenga a sawina-ah a sawi tel a. A sawi ang deuh roh hian hmanlai stone-age mihring luruh ro leh tunlai mihring luruh ro chu a lo inang lo hle reng bawk si a ni.

Zawng thluaka thil ngaihtuah-chhuah-thiam-theihna leh mihring rilru-a thil zirchhuah-thiamna inthlauhzia hre chiang berin a ngaihdan pakhat a thawh ve mai-ah ngai ila a hahdamthlak ber awm e. Hetiang reng renga mihring ngaihtuahna reng renga la lut ngai lo theory a rawn vawrhchhuak a, heti khawp a khawvel mihringte ngaihtuah chhunzawn (thought-provoking) tur hnutchhiah thei thupui hi khawvel hian a la hre ngai lo hial awm asin. Pathian kutchhuak makzia leh ropuizia a sawi lang tel hram bawk a nia! (… argues that it is marvelous and worthy of a majestic creator as well).

1936-1947 AD; Modern synthesis dan hmangin Darwina Theory of Evolution leh Mendela thil hmuhchhuah laws of inheritance & Genetics kha an han suihfin ta a,a lo inchaw-be-in a inchawihrem thlap ta mai a ni.

1953 AD; James D.Watson (b.1928) leh Francis Crick (1916-2004) te chuan DNA structure an rawn haichhuak ta bawk a, chu thiamna hmuhchhuah thar atang chuan molecular biology of evolution a lo zirchian theih ta a ni.Gene leh genome te an ti a, nunna bu an keu (sequencing) ta te an ti a, thiamna a ril tawh lutuk a, ka hrethiam phak bik tawh lo!

DNA atangin nausen hi a thlahtu dik tak an hre thei nghal ta zel a, thlahtu bul hla tak thlengin an chhui thei ta. Sawn pai hmeichhia khan,dun loh rai an sawi angmaiin tap chhak zawlah ţhu tum hmukin “hmeichhe ţan-in” ţang ta tlat se , a sawnthlaktu sawi duh lo mah se emaw, a sawmthlaktu khan ‘ka ni lo krim krim” tiin bawng sual kal duh lo ţan-in ţang tlat mah se, DNA (Deoxyribonucleic acid) atangin tu nge naute ke leh ngal siamtu tih khan an hre zung zung thei ta mai a ni.( Bawng luhlul han sawi takah chuan Champhai leh Khawzawl inkar kawngpui ep-a khaw lang reng Ngaizawl khua-a bawng kha a luhlul mai mai khawp a, kaih kha a duh lo tawp mai a,kaih kal ai chuan ti ni awm takin kawngthlang khamah a zuang thla a, a thi daih!)

2000s AD; Genetics subject atangin kum sangbi engemaw zat kaltaa mihring inthlah chhawng zel leh zawi zawia kan lo inthlakthleng dan an lep se(analyse) thei ta.

KA TAWNHRIAT ATANGIN; Science background nei lo tan ka tawnhriat atangin tlem ka han sawi belh ang a. Zo pa hriathiam theih zawngin Kan lehkha zir lai kum 30 zet liamta-ah khan Paite zirlai hruaituten Thân tlanga awm  khaw pakhat Saizawl-ah an hmanlai kut chi khat Khua Do Puai a tawp berna atan an hmang dawn a,kristian-ah an inlet vek tawh dawn a, min rawn chhimpui ve rawh u,an ti a, Chin Hills-a District hrang hranga zirlaihovin kan chhim ta a, A tawp zanah zupui te an fawh zawhin far/meichher chhi-in ramhuai hnawtdarh turin mipa zawng zawngin khua an hel a,chutak chuan mak tih deuh ka neih chu an zinga mi tam tak kha,mi ang lo em ni si lo, chhâwih deuh, huihphai tih aia degree hrang hranga hniam deuh, zâwng ang deuh deuh kha an lo la awm nual mai a!An khuaa tui tlan leh an chaw ei leh antui hawp-ah khan mihring taksa mamawh nutrients a kim lo a nih tih kha a chiang em em a ni.

P.L.Liandinga te sem ang naupang damdawi leh chaw tha nutrition kha khatih hun lai Paite ramah an dawng ve ngai hauh lo tih a chiang a. Tun hnua hetiang damdawi dawng Mizoram naupang zingah thim hmul sual leh naupang ţahbelh huaibak,meng kur chunga kap ring zet zet leh mi ang lo an awm ta meuh lo pawh hi evolution bawk a ni a. 

Saizang khaw mawng pingah mi ang mang lo ang deuh deuh an tam hle ka tih laiin Thântlang khi a ram a chhiat (unproductive) em avangin Paite Sihzang hnam ţha-ho phei chu an lo vakchhuak nasa a, Zo hnahthlak zingah zirna lamah te, sipai lamah te sumdawnna lamah te a filawr ber hnam an ni lawi si a ni.Mizorama kan ngaih ang ngawt hi an lo ni lova, Zo hnathlak zingah khawvel daidar hmasa ber an niin Rangoon khawpui-ah ringawt pawh in leh lo tha tak tak nei a inbengbel Mizo aiin an tam fe a,khawvel ram hrang hrang Japan,Korea,Singapore Australia leh USA-ah te pawh bu an lo khuar nghet nasa hle a ni.

Mizo hnam sipaite India sorkar nen inremna neia Aizawl a an lo luh ni khan a hmuaktu mipui tam tak zingah ka tel ve a,MNF returnees te kha dawngpuithu ang mai hian an vun complexion kha a thu vek hlawm a, kan naupan laia kan kawmthlang pa ngei ngei pawh ka hâi hial a ni. Arakan ram ngaw-ah thosi vaihmite,vangvat siatial karah hmuihmer ei tur nei lovin sirserh nen inbuan reng rengin hun an hmang kha a ni reng a.Amah Pu Hawla tawngkam takin “Mautuai haka thi mai mai tur” tih kha a nih tak tak duh hmel riau mai! Rs.20, 000/- ţheuh an dawng a, khawchhunga an han awm rei hnu chuan an vun leh tituai pawh a lo pangngai leh ta mai reng a ni.Ruling party term 2 an nih phei kha chuan an maih kawng kawng mai a ni.

Ram buai laia Mizo hmeichhia, vai sipai pasal nei, kum 25 zet hnua H.T.Sangliana’n vai rama a zuk zawnchhuah leh kha a hmutute sawi dan chuan vai nu ang chiah chiah a lo ni tawh, an ti.Mizo te hi tlang thlengthaw nuam taka khawsa ţhin kan ni a, châkkhai leh ei leh bar, thing leh tui thlengin kan chhoh lak a ngai a.Chuvangin kan chawn a phek sek a, kan tâwr a ţha em em ţhin a,tunah chuan kan pian pawh a lo model pian ve deuh ţan ek ek chauh a ni.

Huan kan siam laiin inhnaih takah Lettuce leh Feren anţam kan ching a, a hnu-ah lettuce ni si lo, Feren anţam ni bawk si lo, a bul-ah a rawn tiak ta mai a ni. Kha anţam chi suak kha “A tirin”tih ziak anga Pathian siam a ni hauh si lo a ni. Project vaimin leh mimban chin pawlh pawhin a suak a chhuak mai zel!1992 vel atanga khan Bangalore Indo-American Hybrid Seeds (India) Pvt.Limited siam thlai chi ţha leh 1998 vel atangin Japan siam fur laia chin theih Ryozeki zikhlum chite hi Mizoram sorkarin chah nachang a hriat hma daih khan kan ţhen-âwm nûl siamho tan ka lo ma-ngai (chahchhuak) tawh thin a, Pathian siam atanga a chi ţha an thlankhawm mihring siamchhawn tawh hybrid a ni a, a thar hlawk bik em em a ni. India mithiamte hian genetically modified (GM) seeds an siam thiam tawh a, central sorkar policy-in a la khap avangin an la siamchhuak lo mai chauh a ni a, samţawk rah nausen lu tiat tiata lian an siam thei tawh a nih chu!

Artui tam chi,Bilat ar kan tih ţhin bawk, Layer (Rhode Island Red etc..) kan tih hi Pathian siam ang ngau ngau ni lovin arpui a tui awp nachang hre lo thlah kal zel an tihpun atanga siam a ni a,Broiler pawh hi ar ţhang duang bik chi tha thlanchhuah evolution atanga siam a niin kar 6-ah kg 2 a tling thei a,Mizorama kan vulh ang kg 4,5 thlenga vulh chuan arsa man aia tam tak pawisa ar chaw manah kan sengthlawn teuh tawh a, sum thuni nu a ni ringawt!America-ah chuan chhungkaw khat hian ar nuai khat atang nuai thum vel hi an enkawl a, chawlhkar 6-a upa an nih chiah hian a vulhtirtu company khan zan khat thil thu-ah processing plant-ah an talhin an puah ta vek a,cold storage Vana Pa Hall aia lian lek lekah dahkhawmin thlawhtheihna leh lawng lian hmangin khawvel hmun hrang hrangah an thawndarh ta a, keini India ram khawpuiah KFC (Kentucky Fried Chicken) dawr changkangah ngei America ar bawp kan lo petzut ve thin a lo ni.

Ran reng reng a rawng nei hian colour pigment siam nan energy (chaw leh tui ti tawh mai ang) a mamawh tam bik zel avangin a var hian chutiang chu mamawh ve lo va,sum dawna atan chuan a var zel hi a hlawk ber! Vawk-ah pawh Long White Yorkshire hi a mamawh ang chaw pek theih chuan a hlawk ber. Chu lai thuruk chu Mizo te hian kan la man lo va, a zak rang ngei hi kan la duh ber zel. Ar tui tam-ah pawh White leg-horn ngei hi a tam thamah chuan an vulh zel. An taksa a tě a, chaw a ei tlem a,a var a, a tui tam bawk si a ni.Bawngpuiah pawh a sen leh a dum hnutetui hi a tûiin a tak bik zel a, a tlem thung.Shillong Bihari-ho bawnghnute tui pawlh loh tak tak aiin Durtlang Mizo bawngpui dum leh sen hnute tui,tui pawlh deuh hlek a tak zawk! Lactometer-in lo teh ve chin teh reng u!

Natna hrik-ah pawh hian evolution a lo awm ve reng mai! Malaria natna hrik pawh hian an damdawi hi a dodal theihna an lo nei sang ve zel a, hmana malaria hrik thahna khan tunah chuan a that thei tawh lo. Chukchu pawh hian DDT (dichlorodiphenyltrichloroethane) chhuah hlim kha chuan an thihpui ngei mai a, an thlah kalzel tunlai chukchu erawh chuan DDT hi chaw-ah an ring thei tawh a ni.Nakin lawkah chuan thosi kahna hlo DDT 50% pawlh dal pawh hian thosi a tithi thei lo ang a, pawlhdal lohva kah a la ngai ngei ang.(Those that did adapt,slowly,over generations,passed on their favourable genetic mutations through their DNA, and thus their line survived)

FACT Vs. THEORY

 Evolution hi fact a ni a, theory a ni bawk a ni.Chumi awmzia chu rannung inthlah chhawng kal zel,an chenna hmun a zira an lo danglam thin hi chu finfiah a ni tawh a, fact a ni ta a.Chutih rual erawh chuan mihring hi tun ang dinhmuna kan thlen hma primitive form, zawng emaw atanga lo piang kan ni tih ngaihdan kha chu chatuan pawhin finfiah theih a nih dawn loh avangin fact ni lovin, theory chauh a la ni thung a ni.

KRISTIAN SAKHUA HIAN THIL THAR A PAWM THEI LO

Kristian sakhua hian thil thar hi a pawm mai duh ngai lo va, a do nghal zel thin a ni. Kristian sakhaw hruaitute’n thuneihna pum hlum an neih hun chhung zawng khan hmasawnna leh thil thar hmuhchhuah awm miah lo hun Dark Age (6th-13th century AD) kha a ni reng a ni. Kum zabi 14-na atanga 16-na velah Protestant reformation a rawn chhuak ta chauh va, Protestant thuziak miho chuan Dark Age kha Catholic corruption hun ti te pawhin an ziak bawk a ni.

GALILEO AFFAIR

Nicholas Copernicus(1478-1543) chuan kan awmna leilung hian Ni khi a hel zawk a ni tih thu dik a hmu chhuak a, 1616 kumah Galileo(1564-1642) ngeiin Rome khawpuia khawvela kohhran thuneitu sang ber Roman hruaitute hnenah Copernicus thil hmuhchhuah hi dodal lo tur leh khapsak lo turin a ngen a.Tichuan ro an han rel ta a, Ni khian kan awmna leilung hi a hel a ni zawk reng si a! Copernicus thil sawi hian Pathian thu thianghlim a kalh tlat a, Pathian sawi chhiatna tenawm leh Baibul sawi bawrhbanna a ni tiin thuthlukna dik lo an siam ta tlat mai a ni. Chuvangin kohhran thuneitute rorel zawng zawng hi Pathian pawm tlak leh a nemngheh a ni lo tih hi a chiang khawp mai! Galileo ngei pawh a lu an tan loh nan leh a nun chan loh nan dawt var a sawi ta ringawt mai a nih kha maw! An la ringhlel cheu va, a damchhung pawn chhuak thei lovin an hreng ta kha a ni a.

ROMAN KOHHRAN HARHNA

Roman Catholic kohhran an rawn harhchhuak ta a, keini Protestant kohhran a tir atanga keh chho zel tun thleng pawha ka kehphel mek zelte aiin an lo ngelnghetin an ngaihtuahna leh rilru pawh lo puitling ta zawk a. Pathianin a bik taka ama anpui ngeia a siam, mihringa talent a phumruk (human resource) kha haichhuahsak(develop) ila,Lal Isua neihtir bawk ila,ruling party an nih chhung chauh emaw, an dam chhung chauh emaw pawh ni lovin an thlahte thlengin khua leh tui ţha,thawhlawm thawh tam tura an ina luhchilha financial campaign ngai tawh lo mi nung-ah an chhuak zel tih kha an hrechiang em em tawh a. 1996 kuma Pope John Paul II thuchhuakah chuan Pathianin awmlo a ta thil engkim a siam a, evolution pawh hi a lo awm ngei a, mihring pawh hi tuna kan nihna aia mawl leh hniam zawk primitive form atangin zawi zawiin kan lo danglam chho hret hret ngei a,mihring thlarau siam tur erawh hi chuan Pathian kut ngei a ngai a ni.Rinna leh human evolution hi thil inkalh a ni hran lo va,Pathianin mihring bik hi chu ama anpui, a bik taka a siam a ni a.Evolution hi Pathian remruat,a kaihruaina leh enkawlna hnuaia thil thleng a lo ni zawk e tiin an inzirtir thei ta a ni. (Evolution is a planned and purposed-driven natural process guided by God).

CHARLES DARWIN HNENAH NGAIHDAM DIL; Thuhril thiam C.H.spurgeon,science background nei lo chuan  Darwin thil hmuchhuah chu “ tih tihsual lian leh rapthlak tak ( “monstrous error) a ti a, Bishop Wilberforce of Oxford pawhin Darwin ngaihdan chu a han nuihzat nasa-in “Chu zawng thlah kan lo ni reng a nih tak chu…..! tiin a elsen vel a, a hnu-ah scientist T.H.Huxley nen debate an han  neih zet chuan sawi tura bar a lo hre si lo va, a hnar kha Sihphir Iskut tiat lawihin a hmu ta mai reng a ni..chumai chu a la ni lo va, Church Of England chuan kum 155 kalta khan Charles Darwin ziak lehkhabu evolution theory chu a lo hnawlsak tawh a,2008 kum khan Darwin hnena ngaihdam dilna lehkha a tichhuak a ni. An thuchhuah-ah chuan Charles Darwin ngaihdan a lo hnawl chungchangah an kohhran thu vuakthlak dan kha a bulukin an ti lutuk deuh niin an sawi. Ngaihdam dilna hi Rev.Dr.Malcom Brown, Church Director of Mission and Public Affairs chuan ziakin, “Kristiante chuan kum 17-na-a Galileo an arsi chungchang a sawi an lo ringhlel-a an tihsual ang chiah khan Darwina theory an lo hnawl chu an tisual a ni” a ti. Darwina evolution theory an lo hriatthiam loh vang leh Midangte hnenah leh an kohhran mite hnenah ngaihdan dik lo an lo neihtir avangin ngaihdam an dil tih a ziak a ni.

• John Locke ngaihdan ‘Religious teaching must never be against reason” tih hi Kan tunlai Mizo thalaite tan a sawi ni se ka ti hle mai.

• John Locke leh Sir Isaac Newton te chuan Pathian chu engkim Saimtu a ni a, a remruatna hnuaiah engkim mai hi fel tak inremtlap-in natural laws a awmtir a ni tih ngaihdan an nei thung. 

• William Paley chuan kawng lai-ah sona(watch) chhar ta la, a chhung khawl mumal takin hun avawndik zia i zirchian chuan siamtu thiam tak kutchhuak a ni tih a hre nghal mai ang hi Leilung Siamtu pawh hi a ni tiin idea of divine watchemaker 1802 kum khan a vawrhchhuak a ni. 

• Kan sakhaw puithiamho hian Valtaire hi Pathian awm ring lo mi angin an sawichhe zing malh malh hle a, ka lehkhabu neih pakhat-ah chuan Pathian ring tak mi, kohhran kalphung dik lo sawiseltu a ni tiin a inziak ve tlat mai! Voltaire chuan “If god did not exist,then we would have to invent him!” a ti e, an ti a. Chumi awmzia chu sakhuana hi mihring nawlpui chenhona atang hian a tangkai em em a, chubakah kan chhungril nun siamthatna a pawimawh hrim hrim a ni, a tihna a ni awm e. 

• Mihring mit lawnga hmuh tham loh khawpa tê Atoms-ah pawh protons, neutrons leh electrons-te mumal nei tak fumfe(definite & systematic) namen lovin an awm khawm a,chakna zungzam energy turu lutuk an pai a ni a, Siamtu a awm tih chu a chiang em em a ni.