HNA I THAWK NGAI EM ???

~Rt Hauzel

     Hnathawk kan tih hian enge a kawk ni a kan hriat ber le??

     Nang hna i thawk ve ngai em?

'Pi Mawi, nang in makpa chuan enge a thawh ve?'

'Engmah a thawklo, a ṭul ṭul ah a inhlawh kual mai mai,'

'A nih chu mawle, Makpa ṭha deuh inneih kalo rin vei nen in fanu a hmelṭhat tehlul nen.'

Pi Chhuani - 'Keini chu kan makpa chu 'JE a nia; kan fanu pawh a ngaihtuahawm loh khawp mai, inchhung che tur pawh Awmpui pahnih chu an neih kha maw.'

Pi Mawii, 'A nih chu. Nangni zawng makpa innei ṭha hle mai, hnathawh a nei ṭha bawk si.

      Chutichuan Pi Mawii makpa chu Thing mistiri ani a, nitin inhlawhin a kalchhuak ṭhin a, nikhatah cheng 800, a hlawh ṭhin a, thlakhatah cheng 20000 vel a hlawh chhuak ve ṭhin a, an chhungkua chu a chawmzo in hlim takin an khawsa tlang a, mahse mi zah an phur chuang lemlo.

   Pi Chhuani makpa chu JE lai a ni a, thlakhatah cheng 80000 vel a hlawh a, chutah a eiruk nen thlakhatah cheng 100000 chuang daih a lalut a, an khawsak a sangin, an che nuam hle a, mi zah an phur em em mai bawk si.

     Nang eng hna nge i thawh ve le? Hna zahawm nge i thawh a, hna ṭha?

     Kan ramah hian a biktakin kuthnathawk tute ngaihsan lohna a lian em em a, kut hnathawk kan hmusit a, kan hmu hniam a, Makpa atan pawh kan duh heklo. Mahse kan ti teh ang, kei a thlir tawiber leh hre tlem ber hian kan Är mit ṭet khuanpui ve chiam teh ang. 

Khawvel Ram changkang leh Ram hausa tehi han thlir teh, Office hnathawk nge Kut hnathawkin hlawh hnem, Ram tamtak hi kuthnathawk te avanga Ram ropui, Ram intodelh, Ram hausa an ni asin. Farmer chu an hmusang a, office hnathawk aiin Hnarim (hardworker's) ten an hlawh hnem zawk a, kut hnathawk tute an chawisang a, chutiang Ram chu an dingchhuak ṭhin.

    Keini Zoram kalphung hi han thlir ve teh. Kum 1980 bawr vel khan  Govt servant  B grade leh Mistiri hlawh a in tluk tawk a, tichuan Kan sawrkar ten mizoram an han enkawl tak tak a, kan lo changkang ta hle. Kum 30 a lo vei meuh chuan sawrkar hnathawk a hna hniam ber 4th grade hlawh chu Mistiri hlawh aiin alo tam ta zawk a. Hetiang alo nih tak avang hian Zoram mipui ten Lehkhazir kan uar ta em em a, lehkhathiam kan ngah a, Sawrkar hna erawh a pung em em chuang silo. Lehkhathiam hna neilo kan lo ngah ta em em a, Kut hnathawk kan lo ngaisang lo ve laklawh tawh bawk si; lehkhathiam ve si, kut hnathawk nih kan lo zak tumhrang vei bawk nen, chawmhlawm hlir mai kan lo ni ta. Thawhchhuah neilo Ram, thawnchhuah neilo Ram kan lo ni ta. Nuho lahin Sawrkar hnathawk lo chu hnathawklo ni ah an ngai a, Makpa ah an awt heklo. Sawrkar hna chu hna ropui, hna sang, hna zahawm alo ni ta. Kan fate kan tumpui ber pawh sawrkar hna vek a lo ni ta. 'Mami/Mama zir ṭang ṭang la, Doctor ila ni dawn nia. EE, ila ni anga, BDO, SE, ila ni dawn alawm,' Lehkha kan in zirtir nachhan pawh chutiang chu a ni vek hial awm e. Mama, BA i pass hunah Balhla hmun i siam anga, ti emaw, Vawk farm i siam anga emaw, Ar farm i siam anga emaw, Leilet khawkhat chawmzo tur i siam anga tihlam chu a ri hriattur a awm ka ring meuhlo. Chutiang chu kan lo nih takah chuan enge Zoram hian kan hmabak lo ni ta ang? Engthilah nge kan intodelh ve anga, Silchar vai ho telloin engtin nge kan dam khawchhuah tak ang? Keini aia lehkhathiam awmlohna Ram, keini aia mimawl Ram zawk tello a khawsa theilo, keini aia mawl zawk te ho chawmhlawm kan lo ni ta. Lehkhathiam thatchhia, lehkhathiam thawhchhuah neilo  Ram kan lo ni ta. Sawrkar hnathawk kan ngaisang a, kan duh bawk a, tunah chuan kan ram budget 80% sawrkar hnathawk chanpual alo ni zo ta. Mipui chan chu sa ṭahchhuak pek an sawi ang vel a lo ni ta. Hawh u, i harh ang u. Lehkhazir ah chauh hian BA, MA na hi a awmlo Kuthnathawh ah pawh hian BA, MA a nihtheih tih hriain ṭan ila thar teh ang u. Keipawh hi, ka thawhna kawng (line) ah hian MA chu ka nichiang khawp mai. Kuthnathawk te Lalna ram, Kuthnathawkte ngaihsanna Ram niturin hmalam panin kal i siam ang u aw.

 Aw Zoram, harhla tho la phengphe khua a tlai hma ngei hian.......