THINGṬHANGCHAK CHI (PAULOWNIA)

April 06, 2021

THINGṬHANGCHAK CHI (PAULOWNIA)

THINGṬHANGCHAK Rs.nuaih 20

Thingṭhangchak chi (Paulownia), Mizoram a ching tur kan pung zel e.

HMA LA TURA KA DUHTE

Ram, phunna tur nei te.
YMA Branch ram neite, Mitthi Kuang leh Ṭhutthleng atan.
VEC te, khaw tin VC /VEC ten Social Forestry atan. Mamawh huna thing zai atan. Tui hna tihpun nan. Mahni khaw ram remchanga phun ni se. Khaw pakhatah chuan VEC ten an khaw rama chin chhin an tum niin kan lo hre bawk.
Forest Deptt. Range tinah kuiṭiak a plantation siam nan. Hetianga tih tum an awm mek bawk. Hma la la ve lote chet vat chi. LADC a Forest Deptt. lam pawhin enchhin an tum niin kan lo hria.

A HLAWKNA

Mizoram a khaw thuma enchhinah a ṭha duh vek a. Kum 5-10 ah zai theihin an sawi.

Thingṭhangchak kung 500 nei ta la, kung khatah Thingzai Rs.5000 man chhuak ta se. Rs.2,500,000/- (Nuaih sawmhnih panga) man chu i thar chhuak thei tlat. A aia tam pawh a ni thei. Duhsak zawngte hrilh darh chi.

CHIN CHHIN TUR

He thing hi YouTube leh Google lamah en thei tan hmuh tur a tam. Lo en phawt la. Khawvel a thing ṭhang chak ber te zinga mi hi kan ram ngeiah a lo ṭha duh reng si a. NE Khawdungsei, Mimbung leh Hortoki lama enchhin, kum 5/6 vel aṭanga lo chin tawh pawh a ṭhang chak hle. Pathian zara kan tih fuh chuan kan ram sum dinhmun chawikang dawrh thei a nih ka ring a, kan buaipui ta hut hut mai a nih hi.

Kumina kui hi kumin veka phun nghal chi a ni.

A DUH TAN

Kan rama a chi ngei mai ching ve duh tan a hnuaia contact no ah biak theih ka ni a. A chi hi pack khat Rs 200 man a ni a. Dak kaltlang pawhin kan in thawn thei e. A Chi hi chu a daih chin chin kan in pe ang.

Kum 2-naah pawh a ngaw deuh khap thei niin a chingtute chuan an sawi.

Rs.2,500,000/- hahdam taka neihna ni lovin mi taima tan a ni e.

Mizoram khaw tin hian ching ṭheuh thei ila a duhawm hle mai.

Engpawh nise, chin chhin duh chuan ngaihven thuai ni se. Khaw tinah he thu hi theh darh phal a ni bawk a. Ṭha i tih zawng a nih chuan i theihna zawn zawnah che nghal rawh le.

KHAW TIN MAMAWH

Mizoramah chuan Mitthi an awmin Kuang kan mamawh zel a. Tunah chuan Thingzai tur hi a vang ta hle mai. A mangan thlak ṭan chu a nih tak hi. Chu bakah kan ram ngaw a chereu tial tial bawk si. Engtin nge kan tih tak ang le ?

CHHANNA

Thingṭhangchak (Paulownia) hi kan ram chhungah khaw thum(3) ah ching ka hre tawh a. A thlalak nen ka kawl a. NE Khawdungsei ami phei chu kan pafain a hmunah kan en a. Kum 6-naah chuan a kung lian ber chu teh kualin 60 inches vela lian a ni hawlh mai! A san zawng hi 30ft zet chu a nih ka ring. Kum 8 aṭanga kum 10 ah chuan zai theih niin an sawi. Thing duap lam chi, nel tak ni si, niin an sawi.

THINGZAI ATAN kan mamawh a. Zuang, Pang, Tei etc aiin a ṭhang chak bawk.

YMA TEN NGAIHVEN CHI

Khaw tina YMA Branch te hian Thingṭhangchak hmun hi siam ta ṭheuh ila. Mitthi Kuang atan a remchang viau thei bawk. Buh Ṭin khat hmun tal nei ṭheuh ila chuan rei tak min daih theih a rinawm.

CHING CHHIN DUH VE TAN

A Chi kui tur hi Rs.200 man a pack kan nei a. A lam hmasa sa kan in pe ang a. A daih chin chin kan pe ang a.

He Thing chungchang hi ka ziak tawh a. Kan ramah a ṭha ve thei tih ka hriat hnuin zau zawka tlangzarh ṭula ka hriat vangin ka han sawi leh a. A duh tan post darh ka phal zawng tak a ni e.

Kum khatah teh kuala 16 inches a lianin a ṭhang thei nia !

A Chi kui hun hi February velah a tawk turah ngai ila. A kui dan chu hun dangah la sawi kan tum dawn nia.

A Chi ka chah thlen belh vangin ka han ziak thar leh a ni e. Kan ram tan a ṭangkai beisei chung leh Khaw tin mamawh ni a hriat vangin.

RAM NGAW ṬANGKAI SIAM NAN

Thingṭhangchak (PAULOWNIA) hi kan ramah ching uar ta ila a ṭha hlein ka ring. LADC ah chuan Forest Deptt.in an enchhin dawn a.

He thing hi NE Khawdungsei, Mimbung leh Hortoki ah enchhin ni tawhin a ṭhang chak hle a. Kan ram ngaw chereu siamṭhat nan leh tuihna tih pun nan pawh a ṭha hle turah ka ngai a.

Kumin 2021 hian Forest range tinin a chi pack 5 (Rs 1000 man) hi kui ta ṭheuh se ava duhawm ve le. Kum 5/6 velah a lian pawl chu teh kualin 60 inches a tling tlat mai. Thla 9 velah teh kualin 16 inches a tling hman tlat bawk.

MGNREGS a ram ngaw siam nan VEC tin te hian kuiin hma han la ta bawk i la chuan, khaw tinin kan chhawt ṭangkai ngei a rinawm bawk.

Hetianga kan ram a ṭha thei tih chiang sa hi chu han enchhin atan ka it em a, ka han sawi chhuak ve tawp mai a ni. Youtube lama en pawhin a ṭangkaina alo tam hle bawk tih a hriat theih a. A chi mamawh tan pack khat Rs 200 in kan pe a. A daih chin chin kan pe mai ang chu. A hnuaia contact no ah hian biak theih ka ni bawk e.

Ṭhahnemngaih thuin ka han puangzar leh a ni e. Youtube leh Google lamah zir thei tan zir chian chi a ni bawk ang.

A CHI SAWNGBAWL

Tuilum zen ngam tawk a sa in Sarang ah emaw, bucket var lam deuh i neih chuan chutah chuan chiah la, sarang fim in i tuam phui tlat anga, chuan nisa ah i pho dawn nia. Nitin pho la, zantin tuilum in a tui kha i thlak ṭhin dawn nia. Tui thlak dawn hian a chi a chhuak duh viau mai a, filter eg. Thingpuife thlitna hmang mai ang che. Chuan a chi ngun taka en in alo var de ṭhet ta tih hun ah pot ah emaw sangha bawm ah emaw, i kuina turah i sawn dawn nia.

A huh chung a theh/kui chu a rual duh lova, chuvangin theh awlsam thleng nisa ah pho leh la, pho reilo la, a theh theih chuan a tawk mai.

Tichuan i kui ta a, sprayer in a chi huh khawpin i spray leh dawn nia.

A kuina tur tih huh hmasak kha chu sawi ngai lovah ka dah a.

Chumi zawh ah sarang fim bawkin i khuh phui leh vek dawnnia.

2020 May thla-a phun, 2020 Oct thla-a lak, tehkualin 16inches a ni hman.

NE Khawdungseia 2015 vela phun, 2020 khan tehkualin 60inches a tling.

Please Contact :

Ramte-a Ngopa

📞: +918414048497

Paulownia(Thingthangchak)

Chanchin Part I & II

-Maka Ralte.

26.2.2021

Chanchin Part I

1. Paulownia kung puitling atanga thingzai chhuah hi a thing quality hrang hrang a awm avangin khawvel market ah a rate pawh a in ang lo nual. A kung puitling tawh upat dan azirte, a zai len zawngte, zai hnua sawngbawl leh dan a zirte in a man hi a in thlau ve viau mai. A tlangpuiin a phun tan atanga ngun taka a enkawl dan tur tha thei ang bera enkawl a, a ngeih zawng tak leilung atanga rawn puitling a nih chuan kum 7 ah cubic feet 35 hi kung khatah thingzai a chhuak thei a. A thingzai hi khawvel marketah chuan a quality a zirin cubic feet khatah Rs 450 atanga Rs 1450 a ni thei.

2. A hlutna bik tlangpui: Khawvela thing ṭhang chak ber Paulownia hi thing ṭhang chak dang hriat tawh zawng zawng zingah a ṭhan chak dan hi a lawrlak a ni tih hi officially a pawm a ni chho zel. A kui ṭiahna lei sawngbawlte, a than lenna tur hmun a phun sawn dan dik leh enkawl zuina te, a leilung duhzawng tak leh climate a ngeihna hmunah chuan kum khatah 18ft to 24ft thlengin a thang hman hial. Duhthusam leilung leh climate a nih lem lohna hmunah pawh a tlangpuiin kum khatah 9ft to 15ft a ṭhang hman tho tho. Tin, hetiang dinhmun pangngaiah chuan a puitling ṭhankin hi 50ft aṭanga 90ft a sang a ni thei bawk. Kan hmuh phak zinga thing thang duh ve tak Eucalyptus (Nawhalh thing) hi kum khatah 6ft atanga 8ft a ṭhang ve hman thei. Paulownia chu a tluk lo nasa viau. He tiang khawpa Paulownia hi a than chak avang leh a puitling tawh aṭanga thingzai chhuah hi a hmanna a tam avangte, a kungpui, a zar tang leh a hnah te hi heng - ran chaw leh damdawi atan te, cosmetics siam nante, rimtui siam nante, biofuel atan te, a par atanga khuaiin khawizu quality ṭha ber chi siamchhuah nan te, leilung luang riral tur vengtu atan te, leimin vengtu atan te, a hnah a len avanga boruak chhia CO2 a eiral chakna te, boruak tangkai oxygen a pek chhuah tam bikna te, enkawl awlsam leh eng leilung leh sik leh sa pawh a ngeih theih zel avangin khawvel ram hrang hrangah kum tin Paulownia chinga eizawnna atana hmang an pung chho mek a ni.

3. Paulownia Varieties : Paulownia hi chi hrang hrang a awm ve a. A variety a zirin khawvel ram dang lo ching nasa tawhte chuan thingzai atana tha ber tur variety an ching uar ber a. A variety a zira dam khawchhuak duh bik leh chin chhan a zirte, ram leilung a zirte in a chi variety pawh an thlang thin. Amaherawh chu a thing hian khawi ram leilung leh sik leh sa a ngeih theih deuh zel avangin eng variety pawh ching ila tihsual a awm tak tak thei lo. Paulownia thing variety hrang hrang awm mekte zinga lar deuh te.

Shantong - He variety hi variety dang Fortunei leh Tomentosa chi 2, thlahpawlh (hybrid) atanga siam chhuah a ni. A ṭhang chak a, a kung a len bik avangin thingzai atan a hlawk a, a thing quality a sang bawk a, natna leh eichhe tu rannung lakah a tuar a fei a, sik leh sa inthlak nasatna hmunah a tuar a fei bawk a, kih hnuah a kihna bul atanga lo chawr lehin a puitling leh awlsam bik bawk. A ching uar ramte chu China, USA leh Europe ramte an ni.

PaoTong Z07 - He variety hi chi 3 (Fortunei, Tomentosa leh Kawakami) thlahpawlh (hybrid) tho a ni. A ṭhang chak a, a thingzai quality a sang bawk. Sik leh sa inthlak nasatna hmuna chin chi tak niin a bikin khawvawt nasa -33°C ah pawh a chin theih. Hei vang hian Europe hmar lam ram vawtah an ching uar a, chin atanga kum 2 chhungin 18ft aṭanga 25ft a ṭhang hman. A puitlin hnuah a buk luai loh avangin hmun zim deuhah pawh zing deuh hlekin kung tam tak a chin theih a ni. A kungpui hian a zar bawk a neih vak loh avang leh a thing quality a that avangin thingzai atan a hlawk bik hle.

Kawakamil - He variety hi an ching tam lo, a thing a lian lemlo a, a par a mawi thung. Inbul leh park vel a chinmawi atan te, daihlim atante an ching deuh ber.

Elongata - He variety hi a ṭhang chak a, a puitling chu 90feet vel a ni thei. A thingzai quality erawh a sang lem lo. A ṭhan chak leh a thing len theih avangin ram ṭhenkhatah chuan biofuel atan an ching ber a, thil siam chhuahna factory ah a thing aṭanga siam chhuah biofuel hi meituah atan a ṭangkai hle. A thing a zang a, transportation cost a tlem a, thing dang aiin a hlawk zawk fe a ni.

Fortunei - He variety pawh hi a ṭhang chak chi zinga mi a ni a, a puitling hi 90 feet vel a ni thei. A zar a darh hluai loh avangin zing deuh hleka chin chi a ni. Ram lum deuh va chin chi a nih avangin China ram chhim lam, Europe chhim lam leh Africa velah an ching deuh ber. A thing quality hi Paulownia variety zingah a ṭha bera ngaih a ni.

Tomensota - He paulownia variety hi a hnah a len bikna leh a zar darh len avangin daihlim siamtu atan in bulah leh park vel ti nuamtu atan an ching ber. A par a len bakah a rimtui tak avangin cosmetics siam nan an ching bawk. Khawvawt nasa tak -27°C thleng pawh a tawrh theih avang leh kum 100 thleng a dam theih avangin ram vawt ah an ching uar.

4. Paulownia ṭangkaina hrang hrangte-

1) Khawvela thing thang chak ber a nihna leh leilung leh sik leh sa hrang hranga chin theih a nihna te, a thing a zan avangte, a quality a ṭhat tho si avangte in thingzai atana chin a manhla ber. Kum 7/8 velah thingzai cubic feet 35 vel kung khatah a awm thei.

2) Lei tiṭhatu atan leh leilung luang ral tur vengtu atan a ṭha hle.

3) Boruak thianghlim siamtu a ni. A thing puitling 1 hian ni khatah boruak tha lo carbon dioxide kg 22 a hip ral theih rualin kan mamawh Oxygen hi kg 6 a pe chhuak thei bawk.

4) A chin a hautak lo. Eng ram leilung leh sik leh sa pawh a ngeih theih zel avangin chin a awlsam a, enkawl zuina a hautak lo.

5) A hnah lian leh a thing zar buk tha chi hi khawpui vawng daitu atan in bul leh park, hmun awl apiangah an ching uar tan hle. A ṭhan chak avangin a manhla hle a ni.

6) A hnah hi ran chaw atan a ṭha hle. A hnah hring hian Protein 20% lai a pai a, a hnah vuai tawh pawhin 12% lai a la pai a, pai tawih a awlsamna hi 60% lai a nih bawk a, ran vulhna hmunpui tak tak atan a thar a hlawk a, kum 1 chhunga a hnah hi ran chaw atana a quality leh quantity a hlawk ber lai a ni a, micronutrients a pai tam avangte in ran chaw atan hrim hrim a ching an tam hle. An ran vulh chawm thau nan a thain a hlawk hle. Kum tinin an ching thar a, kum 1 chhungin hectare 1 ah ran chaw ton 35-40 a thar thei.

7) Damdawi atana paulownia ṭhatna pawh hi a lo hlu khawp mai. A hnah hi thin thalo damdawi atan te, kal tha lo atan te, phing hrisello atan te leh chuap chak lo atan a ṭha hle.

8) Cosmetics industry lam atan a par hi an hmang ṭangkai hle. February, March bawrah a par a, a par hi tawtawrawt ang deuh niin a par parh lai len zawng hi 6cm vel a ni. A par hian vanilla rim leh almond rim a pawl deuh a, rimtui siam nan a ṭha hle.

9) Khawizu (honey) siamna atan a par hi khuaiin an bawm duh hle a, a mawina leh a rim chak tak hian parzu eichi rannung a ko chak hle. A par zu atanga khuaiin khawizu an siam hi khawizu tha ber zinga ngaih a nih mai bakah a hlawk bik em em a, Ram hectare 1(tin 2.5) hmun a paulownia par hian khuaizu kg 800 aia tam mah a pai thei a ni. A par aṭanga khuaizu hi a rimtui bik a, a fim lam niin a lang thianghlim bik a, hralh a tla bik em em a ni. Paulownia thing hian eng leilung pawh a ngeih theih zel avang leh ei chhetu rannung a awm ve loh avangin chemical damdawi lam hman a ngai lo va, hei vang hian a par aṭanga khuaizu hi a natural bik a, ei atan leh cosmetics lam siam nan tunlai khawvela organic products ngaihsang tu ten an ngai hlu bik. Tin, a thing puitling tura chemical lam thil hman a nih loh avangin khawizu siamtu khuai in an hrisel phah a, a par behchhana khuai khawi a hlawkin an damrei bik bawk. A par mawi leh lang thianghlim tak hi European ho chuan restaurant velah cream, dessert leh ice cream chei itawm nan an hmang uar hle bawk.

10) Paulownia thing chin a manhla em em na pakhat leh chu a kihna bul atanga a lo chawr thar leh thei leh a puitling leh thei tlat hi a ni. A kihna bul zung hi kum 70-100 lai a la dam thei a, hei vang hian ran chaw atan leh a hmanna dang atan chin a man hla bik hle. A chawr leh hi a puitlin leh theih tho avangin a bul aṭanga chin thar fo a ngai ve lo. Kum khat chhunga eng hunah pawh kit ila, a kihna bul aṭang hian a lo chawr thar leh thei reng bawk. Hei vang hian a chinna hmun tur hi vawi khat hahpui tawh chuan bul ṭan ṭhat leh ṭhin a ngaih loh phah a, a man hla bik em em mai a ni.

11) Paulownia thing aṭanga thingzai hi a zia a nalh a, a thing ti khawih a nuam a, a tle nalh a, a rim a na lova, inchhhung cheimawi nan a ṭha hle. A thing a zang em em a, a nel em em bawk a, tui a hip na lova, a chang ve thei mang lo bawk. A thing ti rawng hi eng dal deuh riai leh sen dal riai lam a ni tlangpui. A thing a zan avangin (cubic feet khat hi kg 6-8 lek) phurh sawn man a tlawm bik a, company bungrua pack nan te a tha bik em em a ni. Hengte avang hian lawng sakna atante, thlawhna chhung chei nante, motor leh train chhung chei nante, surfing board leh musical instrument atante an hmang nasa hle. In sakna lamah chhuat phah atante, concrete building sakna ah a dotu leh dawhsan atan a remchangin a zangkhai a, a nel si a, a man hla bik hle. A thing ti hian tui a hip loh avangin rawng/varnish hnawih duh pawhin a hek lo bik. A thing hi sik leh sa inthlak nasatna hmunah pawh a chang mai mai loh bakah a hmuar chhe mai mai thei lo bawk. A thing ti hi a fei a, a thawp deuh bawk si avangin khermawi atan an hmang nasa a, a keh mai mai loh avangin perek kilh a dawl em em bawk. Paulownia thingzai hian mei a ngam viau bawk, alh mai tur chuan 400°C vela hliau sat a ngai. Hei vang hian a ching hmasatu zinga Japanese pi leh pute chuan an rohlu dah ṭhatna bawm siam nante an hmang ṭhin. A thing hian rannung, fanghmir leh thing nget hrikin an duhloh rim a neih avangin rannung eichhe tu a nei ve lo. Tin, a thing mur hian kua tereuh te te a neih avangin thlasik laia inchhung vawn lum nan leh pawn nisa laka inchhung vawn daih nan inchhung bang leh ceiling te lining na atan a tha hle bawk.

PART II THUHMA:

Part I ah khan Paulownia thing tangkaina tlangpuite, khawvel market rate mek tlangpuite, a chi hrang hrang (variety) chanchin tlangpuite internet atanga lakkhawm kan tarlang thuak thuak a. A variety thliar hran dan hi chiang taka hmuh tur a vang rih khawp mai, he lam subject thiamte rawn sawi belh chi a ni. Paulownia thing chanchin ka rawn sawive hi internet atanga Mizoram leilung leh climate nena inmil deuh tur hnuhkhawm a ni a, zirbingna nei lo leh a taka chin tawhna atanga experience la nei lo tan chuan a dik ber e tih ngam pawh a ni vek lo. Thahnem ngaih thilah Pu Pu Ramtea of Ngopa hnung kan zui ve mai mai a nih hi. A ni hian whatsapp group pakhat atanga bul rawn tanin thil tha tak ni dawna ka hriat avangin ka ngaihven ve nghal a, a chi pawh kan chahve nghal mai a, ka la kui tiak hman rih lo leh nghal😃.

Kan Zoram khaw hrang hranga kut hnathawka vanglai hun hmang liam mek leh hmang mekte atangin Paulownia thing tuipui tura rin deuhte hui khawm zelin Pu Ramtea hian whatsapp group a rawn siam chho a, tunah chuan group 4-na thlenga siam ngai in kan pung zel a nih hi. Heng group pathuma kan thu in share tawn atangin kan kut hnathawhte atanga beisei ang kan nihpui lem loh dante, a beidawn thlakna lamte kan hreve zel a, hei hian kawng thar tha zawk tura ngaih zawh kawngah min nawr kal hlawm khawp mai. Kan ram mamawh em em mek leh kan la mamawh zual zel tur thil a nih bawk avangin kan phurpui hlawm ta viau a nih hi. Thil thar a nih angin Internet atanga zir chawpin a tangkai tur awm chin la khawmin group member mi thahnem ngai ten induhsak tawnna nen paulownia thing chanchin chu google hmang te, youtube ami link te induhsak takin group lamah an han dah chhuak thin a, a bengvar thlak thin khawp mai. Mahse, mi tam zawk ten a lem leh video atang ringawt chuan a tul zual pawh hriatthiam a har ang tih ringin thiam ang ang leh hun awl neihte hmang tangkaiin mizo tawng ngeia kan lo chhiar tlan theih turin ka han buatsaih ve rawih thin a nih hi. Thu ziak thang lo kutchhuak chu hriatthiamna nen chhiar a ngai leh ang aw. Mi puitling chin awmna group a ni hlauh a, ka inrawlh ve ngam mai mai a nih hi.

A chi kan kawl fur tawh a, a tam zawkin a kui tiah lamah hma kan la nual tawh a, a che hmasa deuhin an kui tiak tawh bawk a. A chi lei mek leh lei tum an rawn awm belh zel bawk. Part II ah hian paulownia thing chi kui ṭiah dante, a phunna hmun tur buatsaih dan leh enkawl puitlin dan turte kan tarlang leh chhin a. A kimchang lo viau thung ang. Sawi tawh angin kan thu lakna hi khawvel hmun hrang hrang atanga a lo ching tawhten an tawnhriat tawh an sawi, internet-a an dahchhuah atangin a ni a, a ching tawhte sawi dan leh tihdan in ang lo pawh a awm nual mai. Thing pakhat a nih ve mai avangin rin thuin tlang hrang hrang ami a tuipui tu ten a kuiṭiah lamah hma kan han la chho sap sap a, an hmalakna hlawhtling chho mek te chanchin group ah an rawn share nghal zel baw k a, la ti ve lo te tan a hlawkthlak ṭhin khawp mai. Ṭang tlang zel ang u.

Khawvela thing ṭhang chak ber ni a hriat Paulownia hi Mizorama chin hlawhtlin theih Thing a ni tih ti chiang turin Mimbung, N.E Khawdungsei leh Hortoki lamah an lo ching puitling mek a, a chi kan lei, kan kui tiah mek pawh hi Mimbung-a a kung puitling tawh rah a ni. Eng variety ber nge tih erawh hriat a la ni chiah lo a, kan inrinsiak vel mai mai rih a ni. Amaherawh chu internet atanga han enkual a, Mizoram chin puitlin tawh ho kung leh hnah enin tuna chin kan tum mek hi Thingzai atana tha ngei tur variety ṭhenkhat zinga pakhat chu a nih ngei hmel e. Khawvel ram danga lo ching nasa tawh ten an sawi dan hmuh chinah a variety awm mek zat leh thliar hran dan mumal hmuh mai tur a la vang khawp mai. A variety awm zat leh sawifiah dan in ang lo nuai karah ramdang mithiam ten an zir chiang reng bawk a, an zirchian tawh (tested and confirmed) zingah - Elongata, Kawakami, Tomentosa, Catalpifolia, Coreana, Taiwaniana, Fargessi, Fortunei te hi an tel a. La zirchian hmabak, khawvel ram hrang hranga awm tawh si hi chi 25 vel zet a la ni bawk.

Engpawhnise, Mizorama chin puitlin theih thing a ni tih a chian tawh avangin a tuipuitu mi engemaw zat chuan hma kan la mek zel a nih hi. A chi kui tiak tawh, kui tura hmala mek, a chi lei tum mekte leh group a rawn lut thar zelte tana tangkai tura ka rin deuhte part 2 ah hian tarlan a ni.

PART I

Source : Internet

A chi hi a rah pum khatah 800 atanga 1000 lai a awm thei.
A kung kum 5/6 a upa a nih hunah rah a chhuah tan thin. A chi tur hi a kung pian mar tha leh hleitling, thingzai atan pawha itawm tak rah ami ni ngei se duhthusam a ni. A kung mal din ami aiin a tamna hmun ami rah atanga a chi tur lak a tha zawk bawk.
A chi lak khawm hun tha chu a rah hring a lo uk tan a, a puah keh hma siin lawh tur. Hei hi Sept, Oct vel a ni.
A rah chu nisa ah a puah keh tep thlenga pho ro tur a ni a, a chi hi thli chhem len tham leka te leh thla nei deuh reuh a nih avangin a rah rawn puak keh atanga a thlawh bo loh nan polythene a fun chunga pho a awlsam.
A rah hi patling ke zungpui tiat bawr vel a ni ber ang, a lian deuh leh te deuh a inpawlh ve. A rah chang tha, uk khak tawh nisa a kau tuar khawpa pho tan chu han keu phel ila a mu ni awm tak bawmtu thil var tereuh te te, thliin a chhem thlawh delh delh theih tura thla ang deuh nei tam tak lo awm chu paulownia chi kan tih tak chu a ni.
A chi hi kum leh atana dah that duh chuan a rah atanga lak chhuah tawh chu boruak luh theih lohna bawm, sarang ip etc ah dah a, refrigerator chhung, a vur bawm ni loah dah that theih a ni. A kum leh atan a la chin theih a, duhthusamah erawh chuan a rah thar zel ami a tha ber.
A chi tha leh tha lo test duh tan - a rah 1 ami vek a chi 100 vel chu plate darah puan huh tha tak chungah chap darh in sarang fim in khuh tur, ni chhuak dawng hmunah ni 8-12 vel pho hnuah a rawn ui ngho tan ang, a chi 100 zingah 50 tal a ui ngho theih chuan a chi tha pangngai tihna a ni ang a, 50 hnuai lam a ui ngho chuan chin tlak vak a ni lo ang a, paih mai zawk a tha.
A chi kui tiah that nan ni eng tha leh hnawng reng lei a ngai a. A chi kuina bawm, nursery bed emaw tuia chiahna bawm emaw chu tui luang ral zung zung theiin siam tur a ni. A Kuina lei chu lei thawl leh dip tha, tui pai thei si ban silo tur a ni. Lei chunglang tih dip, balu, peat moss, perlite te nena chawhpawlh hman theih a ni. A plantation hlawhtlin pui tawhte sawi 1 chu - a kui tiah nan leichunglang pangngai teh-khawng 80, vut dur tehkhawng 10 leh leitha(ran ek thi tawh/hnim tawih) tehkhawng 10 chawh-pawlh tur a ni. A kuina lei hi dip tha tak ni se duhthusam a ni. Balu te, cocopit te, peat moss te an hmang tel bawk.
A kui hun tha ber chu February thla tawp lam leh March tir lam a ni. Hemi hma deuh leh hnu deuh pawh Mizoram ang sik leh sa nuamah chuan a tha tho ang. A tiak tir hi a thang nghal vut vut lo a, Feb thla tawp leh March thla tira kui tiah hi a phun sawn hun tha ber May thla vela phun sawn tawk velin a thang hman ang.
A kui tiah dan hi chi hnihin a tih theih a. Pakhat chu a chi tuia chiah uingho hmasak phawt a ni. Pakhat dang leh chu a kuina tur bawm emaw nursery bed emaw hman a ni.
A chi tuia chiah ui ngho phawt dawn chuan a tui hman tur hi ruah tui emaw tuikhur tui emaw lui tui emaw chemical a tih thianghlim ni lo se a tha ber. A chi tuia chiah nan hian Plate, plastic bottle tan bun, dispo cup etc te a hman theih vek. A bawm hi ni engin direct a a em loh nan sarang fima tuam theih a nih chuan a tha vek mai. A chi chu a chiahna tui dap chhuak tawk vela chap darh tur a ni a. Ni engin direct a a chhun loh nan a chi chiahna bawm chu sarang fim a tuam/khuh tur a ni. A chiahna bawm chu Ni chhuahna lamah pho tur a ni. Ni 7-15 velah a chi tha pangngai chu a rawn ui ngho tan ang. He a chi rawn ui ngho tawh hi a hnawng reng tur a ni a, minute hnih khat chhung lek pawh tui hnawng a hmuh loh chuan a thi nghal mai duh khawp mai. Tuia chiahna bawm hian 30°C vel lumna a hmuh reng theih a tha, zan lamah chuan electric bulb hmanga tih lum theih nise duhthusam a ni. A lo tiah tan a, a ui ngho tawh chuan inches chanve vel an nih hunah lei thawl, tui paih hul thei awmna bawm or polypot ah dim tein sawn luh tur a ni. Pot leiah hian tui a tling thei tur a ni lo a, tui in a zung a chiah reng chuan a tawih chhe vat thei.
Tuia chiah hmasak kher loh pawhin nursery bed, polypot, bur engpawh ah a kui tiah theih bawk. Lei tha pangngai, balu, peat moss, cocopit te nena chawhpawlh hman theih a ni. Lei chunglang tha pangngai dip tha taka sawngbawl pawh a hman theih vek tho. A kuina tur lei chungah a chi chu theh darh den den hnuah a chi lang lo tawk lekin leitha buatsaih sa bawkin pan te te in theh vur tur a ni. A lei hnawng tawk lek turin tuiin phuh, spray tur a ni. Tui hi a leih a leih loh tur, a chi a tet em avangin phuh huh seng seng tur a ni. Ni 7-15 vel chhungin a rawn tiak tan ang. A tiak tir hi tui pek hnawn reng tur a ni a, tui a tling thei tur a ni lo, a zung no tak hi tuiin a chiah reng chuan a tawih thi hma em em a ni. Chemical lei tha, a dip or tui chi hmanga spray loh tur a ni, a hnah no tak hian an thihpui hma em em a ni. Polypot or nursery bed a kui tiah hi feet chanve atanga feet khat vel an nih hunah a phunna turah phun sawn theih a ni tawh ang.
A phunna tur ram leilung chu lei tha pangngai leh thawl, tui in paih ral zung zung thei a ni tur a ni. Hmun zawl leh awi deuh pawh ni se tui hip ral chak, lei pangngai chin feet 4-6 tal awmna, pialtlep lung hnaivai lo a ni tur a ni. A lei thur zawngah pH value 6 vel ni se duhthusam a ni. Paulownia thing hian hnah hlai tak a neih hmangin ni eng atangin chaw a mamawh tam a, chuvangin a chinna hmun chuan ni eng a hmu tha em em tur a ni bawk.
A phunna nghet tur pana phurh sawnna lamah polypot ami lei chu a lo insawh thawl ve hman thin a, a kung lo naupang tak zungte chu a lo chet telve thin avangin phunna tur ramah chuan a polypot lei lo thawl chu nem muk that leh a, daihlimah ni 3-5 vel an lo in adjust ve leh nan dah phawt tur a ni.
A phunna khur hi a zau poh leh an ngeih zawk, a khur thuk zawng chu feet 2-3 ni se, a zungin lei hnawng tui a hip luh vat theih nan. Thuk lutuk a phun loin a pot lei seh chin zel kha a khurah a rawn dak chhuak chiah tur a ni ang. A khur hnuai lam chu leichung lang lei a vur hmasak leh mai tur a ni. Phun hnuah a khur laihna lei chunglang bawkin tha taka vur tur a ni a, boruak thawleng, tui tlin ruk theihna awmlo turin. A khur chhunga lei chu a hnawn kim that tawk theihna turin tui leih nghal tur a ni.
A khura phun atanga kum 1 chhung chu tui hmu tha hram se. Duhthusamah a kung bul leiin tui a pai hnawn rengna turin hnahchhawl, hnim ro etc remchang hmanga chhah deuh taka vur hnan(mulching) a tha. A kung bul dek fu si lo a vur hnawn tur a ni. Tui pek tur nei rem chang chuan kar tina tui pek hi duhthusam a ni(ruahtui awm loh laiin). Pek hneh lutuk erawh a zungin a hua, an thihpui thei. Tui pek tur nei lo tan pawh a zungin lei hnawng chin a thlen tawh chuan hlauhthawn tur a awm lo a, a than chak lehzual nan tui a mamawh tam tihna zawk a ni. May to Aug hi Mizoram ah ruahtui kan dawn tam lai ber a nih avangin a phun hun May a phun tum hram a tha berin a rinawm. Hemi thla 4 chhung chuan a zung pui leh peng ten leihnuai chhungril ami tui chu an hip pha tawh tura ngaih a ni.
Paulownia thing hi a tet laia derdep tak, thang no nghulh mai a nih avangin a dip khawlo leh ti chhe theitu hnim leh a zikno leh hnah no eitu ramsa/rannung ten an tih chhiat loh nan vil ngun hun lai tak a ni. Hemi hun lai hian thli thaw na deuh pawhin a tih chhiat theih avangin a chelh nghehna engemaw siam sak a tha bawk. A than san tawh hnuah chuan a zung te a lo in phan nghet tawh a, a zikno lai a than chakna lai berin lei hrul a tlansan tawh bawk a enkawl zui ngai em em loin amah leh amah a in veng thei tawh ang.
Mizoramah chuan thingzai atana tha chi variety ni a hriat kan buaipui avangin a phunna hmunah hian feet 12 atanga feet 15 inkar hlatin phun a tawk ang. Hetiang ang inkar hlata phun chuan ram hectare khat(Tin 2.5) a zauah kung 600-800 vel phun theih niin ram danga plantation lo siam tawh ten an sawi.
Paulownia thing hlawk taka phun tawh te zir chianna atanga an sawi pakhat chu - REGENARATION hi a ni. Paulownia thing hi a chinna hmun climate pangngai a nih a, a mamawh tui leh chaw tha a hmuh that chuan a chin kum khatna ah feet 12 vel tal a thang hman tura ngaih a ni . Hei hi a phak loh a feet 6-9 vel chauh a thang hman a nih chuan chung thang tha lo ho chu regenerate turin suat daih tur a ni. Regenerate dan chu - chin kum thlasik hmasa ber a lo thlen hnua a hnah a tlak kawlh vek hunah a leiseh chinah a kung hi an tan chhum a, a tan chhum dan turah pawh rual tha taka tan chhum a, ruah sur leh huna a tanna laia tui a tlin theih lohna tura awih deuh hleka tui inpaih ral zung zung thei tura tan tur a ni. Tui a tlin theih chuan a kung bul hi a tawih hret hret ang a, a thihpui daih thei. Hetia tan chhum hnuah a tanna kung bul atangin a lo chawr leh ang, a chawr leh zinga a pian nghet tha, dawng tha ber chu feet khat a nih ve leh a chawrve dangte chu phih bal vek tur a ni. A tha ber zuah tur a nih chu. A chawr thar kan zuah tak ber a than chakna chhan chu a zungpui leh zung peng ten lei hnuai thuk zawk ami tui leh chaw tha an lo hip pha tawh a, A kung hmasa aiin a hrisel zawk a, a rawn thang chak zawk ta a ni. Hetianga lo ti tawh ten an sawi dan chuan a kung hmasa kha paih ni lo ta se, a kum hnihna a a sanna tur aiin a chawr leh rawn thang chho sanna hi a tam zawk an ti. Thingzai tur thing mar tha leh lian, a zar bawk tek tuk awm lo kung a rawn nih theih nan a zar tur rawn chhuak hmasa apiang bal tur a ni a, hetiang a zar thar tur hi a kungpui atanga chawr chhuak ve tho a hnah lian invuahna laiah a rawn chawr chhuak thin a, hemi rawn chawr chhuak tak hi lo bal zel tur a ni a, a hnahpui erawh chu zuah zel tur a ni, ni eng atanga chaw siamtu ber an nih avangin. A zar paih tur chin hi a kung bul lam, a kung san zawng hmun thuma thena hmun khatna vel thleng a ni ang. Hetianga enkawl thing puitling chu a mar tha bik a, bawk leh sek lai a nei lo nge nge a, thingzai atan a tha bikin a hlawk bik a ni.

Pi Rki of Dinthar Aizawl in West Serzawl rama Paulownia engemaw zat kui tiak tawh ziah hi kan CP e.

PAULOWNIA (Thingthangchak)

Pi RK-i

Kan Thing buaipui hi buaipui tham pawh a ni reng a, hlawhtlin ngei pawh kan tum tur a ni a. Mahse a chi kuitiah ah kan han buai nghal mai bawk si a... mahse beidawng mai lovin i bei sauh sauh teh ang u....

A chi kan han kui chiah khan tui pek hnawn ṭhat hi a pawimawh hle a. hnãwng/huh tha se la, a chi a inchiah puam hma bik a, a ṭiak hma a ni...

A lo ṭiah chiah aṭang kha chuan tui pek kha chu uar lutuk lo ila. Kan duat lutuk avangin tui kan pe tam lutuk thei a. A lãwng/pul duh tein ka hre ve deuh a. Polypot-a phun chhuah pawh te lutuka phun chhuah chu a thi duh bawk a. Tin, kan phunna hmun turah pawh ft 1 aia te loin phun ila duhthu sam a nih ka ring.

Tin, kan phunna tur kha a theih phawt chuan KHUR lai thei hram bawk ila. Ṭha taka kan enkawl zawh tawk kha phun ila. Enkawl ṭhat theih loh tur kung 1000 phun ai chuan uluk taka enkawl theih tur kung 500 kha a hlu zawkin ka ring a.

Youtube lama kan hmuh leh kan rama kan phun kan enkawl nen chuan a inang lo mai thei a. Keini chuan a hmun samfai ringawtah pawh harsatna kan nei pawh a ni mai thei.

Tumah beidawng lovin i beizel teh ang u hmiang.

CHIN DAN ṬHA

A hmun vah a, hal hnuah Hrui zamin a phunna tur ft 15 dan velah Bawngtu-thlawhin lei chek khuar zel la, a thu lutuk a ngai lovang. Ruah sur hunah leiṭha leh thing kangvâp a tlingkhawm ang a, chhinchhiahna i siam zel ang. Buh tuh pawhin a hnai lutuk lova tuh ni se.

Mahni ram mi dang Lo a neih tir dawn pawhin lo khen lawk a ṭha. A tlar ngil mawi tak ni zel se.

A theih chuan phun dawnah Meihawltui (Woodvinegar) tui a pawlhin a khur kap thei ila, rannung lakah a veng thei ang.

Ni eng hmu a phun tur a ni a, Chul rit a phun tur pawhin sam fai a phun a ṭha. Hliahtu a ngai thei lo, a hliahtu awm chuan a ṭhang ṭha thei lo thung.

Buh Ṭin khat hmunah kung 200 - 250 phun theih a chhut a ni. A pot sa lei duh an in-report zel a, in report zel ni.se. ka lo chhinchhiah zel dawn nia.

A DAM REI DAN chu kum 150 thleng dam thei leh, a tlangpui (average) a an dam chhung chu kum 40 - 70 vel a ni e.

Kung khatah Rs 5000/- man thingzai chhuak angin han chhut chhin la, a hlawk dan tur i hre mai ang. Midang hrilh ve zel mai rawh.

Ramtea Chawngthu. Ngopa

Dt.26/10/21

Paulownia (Thingthangchak)

Chanchin Part III

-Maka Ralte. 14.11.2021.

Part I-ah khan khawvel hmundanga Paulownia thingzai market rate chungchang tlemte leh a thing hlut bikna /tangkainate, a chi variety hrang hrangte thai lan thuak thuak a ni a.

Part II-ah chuan Paulownia thing chanchin ka ziah thinte hi zir thiamna leh experience atanga sawi tur la awm bik lo, ka mimal thahnem-ngaihna atanga mi tam zawk ten an lo tuipui leh hlawkpui phah beisei chunga internet atanga hmuh theih ang ang rawn chhawp chhuak ve nawk nawk ka nih thute, kan Zoram dung leh vanga kut hnathawk mite thawh hah man awm hlei thei lo veiawm ziate sawi langin, beiseina thar danglam tak min neih tirtu- Paulownia thing thang chak em em mai, kum 10 chhung chauha hralh sum chang thei ngei tur a nih thu leh Mizoramah ngei a puitling thei tih hriat chian tawh a nih thute, Mizorama kan chin pun tan mek hi a variety dik tak erawh kan la hriat chian chiah theih loh thute (tunah chuan Elongata nita berin kan hria), a chi awm dan tlangpuite, kui tiah hmaa a chi sawngbawl dan turte, a kui tiah dan leh kui hun, ram danga an lo practice tawh dante, a ngeih zawng ram leilung chanchinte, phun dan tur leh a hnua enkawl zui dan tur tlangpuite, a puitling tawh kihna bul ngai vek atanga vawi 7 vel lai a chawr puitlin leh theih thute kan tar lang tel bawk a nih kha.

Part III ah hi chuan..

Kumin 2021 kum tir atanga khaw hrang hranga Paulownia chi kui tiah tuma theihtawp chhuah tu ten an kui tiah ve mai theih loh thute, vawi engemawzat bei nawna hlawhtling ta hramte, beidawnsan ta maite kan hre ta nual a nih kha. Hetianga harsatna kan tawh hlawm takah chuan Paulownia thing chi bik hi a kui tiah that dan rintlak leh awlsam, kan ram kilkhawr ber thlenga mi ten kan tih ve mai theih tur si a awm takin tiin internet lamah bawk ka han zawng kual leh a, ka hmu mai rih lo nain thing chi hrim hrim an kui tiah hmaa an sawngbawl hmasak dan erawh hmuh tur a tam khawp mai. Chung zinga a rintlak ber tur nia ka hmuh atangin thing chi hrim hrim kui tiah that dan tur nia ram dang mithiamte sawi hi kan tarlang ve leh chhin teh ang. A that tak tak dawn leh dawn loh thuah erawh chuan thing variety, ram leilung awm dan leh sik leh sa a zir a ni thei tih erawh hriat tel a tha. Chuvangin kan hriat duh ber Paulownia thing chi kui tiah that zawk dan, rintlak leh kan lo tih ve theuh theih tur, awlsam, sum heklo zawk si chu mi thiam zawk leh mahni tawnhriat atanga lo hre tawh ten rawn pho chhuak zel bawk sela, a buaipuitu tan leh kan ram tana tha ber turin hma i la tlang zel ang u.

Internet atang chuan:

Mithiam, zirmiten an sawi dan chuan Thing leh thlai chi zawng zawng hian an lo tiah hma hian siamtu duansa danah an tiah theih hma hian mut hilh veng veng hun chhung an neive hrim hrim a, he an muthilh hun chhung hi kai harh an nih loh a, an awm awma an awm chuan tiak lem loin rei tak tak an mu bo hle hle mai thin a ni. An mahnia chi nung inphum chu lo harh a, an chaw lakna tur ni eng, tui leh chaw dang an mamawhte hmu thei tur chuan an chi nung tuamtu kawr an rawn nek hawn a ngai a. An chi tuamtu kawr nek hawng awlsam tur hian lo tanpui ve an ngai thin a ni. Thlai chi pangngaiah chuan an hun bik zelah lei hnawng kara an awm a, ni leh ruah, khawpui ri ten engemaw chen an puih hnuah an lo tiakve ta mai thin a ni.

Paulownia chi bik kui tiah that dan tur hi kan hriat duh ber a nih avangin ram danga lo ching hlawhtling hmasa tawhte sawi dan hi lo tarlang zui ila.

Paulownia chi kan lakna tur rah chu a kung puitling than kin tawh, pian tha leh hrisel tha atanga lak tur a ni. Kung mal din rah aiin kung tam tak awm khawm zing ami rah nise a tha ber. A chi atana a rah lak hun tha ber chu a kunga a awm laia uk deuh khak tawh, la puak keh si lo a ni tur a ni. Hei hi Sept atanga Oct thla chhung a ni tlangpui. Mahse a chinna ram a zirin Dec thla thleng pawh a ni thei tho bawk.
A rah uk khak tawh chu kuta keu phel theih khawpa a rawn kau tuar thlengin nisa ah pho tan hmasak tur a ni. A rah chhunga a chi hi te reuh tete, thliin a chhem thlawh mai theih tur an ni tih hriat takin thla ang reng deuh an nei a. A rah rawn puak keh hmasa atanga a chi te tak tete te chu thliin a len bo mai loh nan a phona hmanrua chu buatsaih tur a ni a, a rah rawn ro chho mek atanga tuihu hnawng lo chhuak hmasa te chu an kal ral zung zung thei bawk tur a ni. Ni sa in a chhun tlang theih bawm emaw polythene emaw hman theih vek a ni ang.
A rah pho keh phuk tawh hnu chu keu phelin a chi chu lak chhuah tur a ni. A chi lak chhuah tawh chu kui tiah turin a hnuaia tarlan ang hian sawngbawl hmasak tur a ni.

Thil mamawh turte tarlang phawt ila. Heng mamawh tarlante hi khaw hrang hranga kan neih mai theih turte an ni ang chu maw.

Paulownia thing chi tha, pho tan tawh.
Tui vawt, fridge tui vawt (in tura kan dah thin ang tui vawt hi). He tui vawt hi a chi kan neih zat chiah huhna tham tura tam ni se.
Ran ek lei tha emaw ramhnuai lei chunglang tha emaw balu emaw toilet paper emaw. (A chi vawng hnawng rengtu atan). Heng hi a vaiin neih kim a ngai lo. Enge maw ber khi a tawk mai.
Bawm lang tlang thei, phui tha, boruak lut leh chhuak thei lo tur eng pawh. Hemi bawm atan hian dispo cup lang tlang thei chi te, kuhva pack-na polythene angte hi a remchang vek ang.
Hlo thahna damdawi. A chung no 3-a mamawh tur kan tarlan - leitha or balu a hlo dang chi leh thing chi ti chhe thei thil dangte thenfaina tur.
Kut leh hmanraw dang - bawm or polythene tih thianghlimna tur - spirit emaw hand sanitizer pangngai emaw.
Refrigerator, kan hman pangngai ang theuh hi hman theih a ni.

A chi kui hmaa sawngbawl dan turte.

Thing chi sawngbawltu kut bawr zawng zawng leh thing chi dahna tur box, dispo cup or polythene te chu spirit emaw in tihfai hmasak tur a ni.
Leitha or balu or toilet paper hman turah khan hmuar siamtu leh thing chi ei chhe thei thil dang a lo awm palh theih avangin fungicide hmangin ngun taka tih thianghlim hmasak bawk tur a ni.
Thing chi, nisa a pho tan that tawh chu fridge tuivawt ah darkar 6 atanga darkar 12 chhung chiah tur a ni.
Fridge tui vawta chiah tawh chu lak chhuah a, a let thum vel a tam leitha dip emaw balu nen emaw chawhpawlh leh tur a ni. Leitha dip emaw balu emaw nei remchang lo tan toilet paper/tissue paper huh in fun mai theih a ni bawk. Leitha/balu/toilet paper te hi hman hmain fungicide hmangin tih thianghlim hmasak tur a ni.
Thing chi leh leitha or balu or toilet paper chawhpawlh tawhte chu tlem te te in bawm, box, dispo cup or polythene chhungah khan khung tur a ni a, boruak lut leh chhuak thei lo tura sawngbawl tur a ni. Bawm or polythene te hi a te lam zel hman a remchang zawk. Khawi bawma mi pawh kha a lo tha tawk lo palh thei a, hmuar leh thil dangin thing chi te kha an tih chhiat theih avangin bawm lian deuh pakhata khung teuh aiin bawm te zawk hrang hranga dah kha a finthlak zawk. Bawm then khat ami a lo fuh loh palh pawhin bawm dang ami a tha kha a la awm thei dawn a ni.
Fun felsa tawhte chu refrigerator (fridge) chhuar pangngai(a vur bawm ni lo) ah thla 1 atanga thla 3 chhung dah vang vang rih tur a ni a, a khat tawkin en zauh zauh tur a ni. A chi thenkhat tiah tuma rawn ui ngho hmasa an awm hunah a dang la uingho ve lo te nen lak chhuah a, a kui tiahna tur hmunah seng luh tur a ni.
A kui tiahna tur lei hi tui pawm rei chi lei ban, tlak lei ang hi a tha lova, tui luang ral nghal zung zung thei, lei hnawng pangngai a ni zawk tur a ni. Paulownia thing chi tereuhte hian a tuamtu kawr a rawn nek keh tan atanga a phunna hmun ngheta phun hnu, a zungpuiin leihnuai tui hnawng chin a thlen tan thleng hian a zung hi tuiin a chiah huh lutuk tur a ni lo. Chuti lo chuan, an zung hi a tawih thuai thei a, an thi leh duh a, an thih loh vek pawhin an than a thu duh bik a ni.

Awle, khingte khi internet lam atanga ka rawn chhawpchhuah ve mai an ni a. A lo tha ber em tih erawh a takin ka la enchhin bik lo. Tan a na tlang ang reng si a, tihian ka han chhawpchhuak ve leh rawih mai a ni e. A tak taka kan ram chhung khaw hrang hrang a mi ten kumin 2021 kum tir atanga an lo kui tiah tawh dante group hrang hrangah an la rawn sawi zelin ka ring. Tih dan in ang rengah a thenin an kui tiak tha em em a, a then an beidawng der a, a chi lakna hmun khat nisi hian a then tiak tha, a then tiak theilo lai tak hi a chhan hriatthiam a har rih khawp mai. Ka mimal rin dan sawi tel lawk teh ang.

A chi hi hmun khat atanga lak vek ni mahse, a chi nung leh nunglo a awm a ni ang.
Tui pek hneh lutuk vang a ni ang.
A kuina leiah a chi ei chhe thei engemaw a awm a ni ang.
A lei hi a thur or al lutuk a ni ang. Paulownia chi kuina tur lei hi Ph value 6 to 8 tur tih a ni.
A rah puitling tha leh tha lo a awm a ni ang.
A rah hi a chi lak hmain ni sa ah an pho tang tawk lo a ni ang.
A kuina tur leia hlo thahna chemical hman khan a chi a ti chhe tel a ni ang.
Khawvel mithiam thenkhatin an sawi angjn paulownia chi kui tiahna hmun hian eng duh khawp an hmu lo a ni ang. Ram thenkkhatah chuan zanah pawha eng reng turin electrict eng an chhit sak thin.

Thing thang chak(Paulownia) chi lei theihna te:

(Updated 8.1.2022)

SIAHA : Pu Lalrinliana(Puia) 8414924222
CHAMPHAI: Upa H Sapchhawna In, Kahrawt Veng. 9615553060
SELING: Pi Mami Ralte, Seling Zero point. (Samaritan Riangvaite Rûn bul) 6009740173
RAMHLUN 'N', AIZAWL: Pu Maka Ralte, India Shoppe / Diams Enterprise. 9862950234 (Thingtlang khaw hrang hrang tan Sumo in an thawn thei).
KOLASIB: Pi Chawngpuii 9612195449 Ṭumpui, Kolasib.
SAITUAL: Pu Zama, Saitual. DC Office hnuai a ELECTRONICS Dawrah. 8974396457
LUNGLEI: Pu Zualtea DENGRO PRINT Dawr, Lunglei Bazar Veng, SBI Main Branch Office bul. 9436147189.
BAWNGKAWN, AIZAWL: Pu Buata 9612442341 (R.B.Furniture Works, Presbyterian Shalom Biak In bul).
POT LEH A CHI: A ṭiak Pot khat Rs 50/- rate in hrut rual a ni a. A chi hi Pack khat Rs 100/- a ni thung. Pack khata a chi awm zat hi a tam khawp mai, sing chuang a ni ang. Hrechiang duh tan Pu Ramtea Chawngthu, Ngopa 8414048497 a call theih reng e.
SERCHHIP: Pu Masiama 8413847895 Serchhip Bazar veng, Zion.
BIATE: Pu Zitea (Lalzidinga) 8257036359
KHAWZAWL: Pu C Pazawna 9862873103 Hermon Veng. Khawzawl.
MAMIT: Upa R Lalsawmliana 8729878247.
HNAHTHIAL: Pu H Lalnunmawia 9862751397. Hnahthial Chanmari.
CHHINGCHHIP: Pi H.Lalhlimpuii (Nautei) - 9612388851
THENZAWL: Pi Zamtei - PC DRUGS STORE - 8974742361.
CHHIAHTLANG: Upa R.Lalthantluanga (Mathana) - 8974964865