COVID DAMDAWI THAR 2-DG

 COVID DAMDAWI THAR  2-DG 

2-DG chungchang hi news-ah kan hmuin, kan ngaithla nual tawh ang a , mithiam țhenkhat pawhin a ziak tawh mai thei. Thil lawmawm lam a nih avangin ka’n tarlang ve hrim hrim teh ang .

2-DG TLANGZARH A NI TA:

May ni 17, 2021 khan  India Defence Minister Rajnath Singh leh Health Minister Dr Harsh Vardhan te chuan  India scientist-te kutchhuak Covid -19 damdawi, 2-deoxy-D-glucose (2-DG) chu an tlangzarh ta a. Covid-19 natna dona kawngah beiseina sang tak kan nei ta a ni.

2-DG HI TUTE SIAM NGE ?

2-DG damdawi hi Defence Research and Development Organisation (DRDO) hnuaia  laboratory - Institute of Nuclear Medicine and Allied Sciences (INMA), New Delhi leh Dr Reddy’s Laboratories , Hyderabad te țangkawpin an siam chhuah  a ni a; Drug Controller General of India-in  a pawmpui thlap a ni. 

2-DG ENCHHINNA:

He damdawi hi, a hmasa berin April 2020 khan Centre for Cellular and Molecular Biology - ah enchhin a ni a, Covid-19 natna hrik do nan a țha hle tih finfiah a ni. May 2020 ațang October, 2020 chhung khan Covid-19 hri vei damlo mi 110-ah enchhin a ni a , he damdawi eite hi hri vei dang enkawlna pangngaia enkawlte aiin an dam chak zawk hle tih finfiah a ni bawk. 

December, 2020 leh March, 2021 inkar chhung khan India ram state hrang hranga  Covid-19 damlo enkawlna Damdawiin 27-ah enchhin  a ni leh a, Covid damlo enkawlna pangaia enkawlte aiin 2-DG damdawi hmanga enkawlte chu an taksaa natna lang chhuakte a dam hma hle a, a hranpaa oxygen pek an mamawhna pawh a reh hma  hle tih finfiah a ni bawk. 

2-DG HNATHAWH DAN:

Natna hrik , virus-te hian an nunna leh an inthlahpun (replicate) zel nan thil nung taksa chhunga glucose an mamawh a . 2-DG hi glucose ang tak, mahse glucose tak ni si lo a ni a . Covid-19 avanga damlovin  2-DG a ei a, virus-in a ei chhiat mek (infected cell) a thlen khan virus khan glucose tak emawh tiin a lo zawm ta chat mai a ; mahse glucose tak a lo nih si loh avangin virus khan inthlapun nan a lo hmang thei ta lo va , virus pung (replicate) tur chu veng ta a ni . Chutih lai chuan damlo  taksaah chuan virus dotu , antibodies a lo siam pung ve char char thung a . 

Virus inthlahpung leh taksa chhunga darh tur titawp a lo nih takah chuan taksain pawn lam atanga oxygen a mamawh belhna pawh lo tlem tial tial ta a ni .

 

2-DG HI ENGTiKAH  NGE KAN HMUH  VE THEIH ANG ?

2-DG damdawi hi India ramah awlsam taka siam theih a ni a, a dip(powder)-in an siam chhuak ang a, tuia chawh ralin, ni khatah vawi hnih, ni 5 aṭanga ni 7 chhung emaw, doctor-te rawn ang zela ei tur a ni ang. A man hi la tihfel loh a ni a, DRDO thawhpui Dr Reddy’s  Laboratory-in an bithliah ang. Damdawi man hi to lo tura ngaih a ni .

Tunah chuan Covid-19 hrivei enkawl  mekna damdawiin leh instution pawimawhah damlo na zual bikte enkawl nan an hmang phawt ang a ; rei lo teah a nawlpuia hman theih a nih ngei i beisei phawt ang.

R.K.Lallianthanga