ENGVANGINNGE ṬHÁL RUAH A SUR CHÁNGIN CURRENT AN OFF ṬHIN ?

ENGVANGINNGE ṬHÁL RUAH A SUR CHÁNGIN CURRENT AN OFF ṬHIN?

~B. Changa

    "Kan ram current chuan ruah hi a ngam hlawl lo, ruah a sur chuan a thim nghal zel," kan ti fo a, a dik pawh a dik hle. Tun ang huna ruahsur hian ken tel pahnih a neih hi current-in a thim phah ber chu a ni ṭhin a.  A ken tel, current tana hmelma lian tak te chu:

1)   Thli:   Ṭhal ruahsur hi thli nen a thawk duh em em a, thli na tak avang hian ram changkângah pawh power a khaihlak fo va, China rama 220KV Transmission System pawhin thli vanga line fault hi line fault statistics-ah 10% vêl a ni ve.  Kan ramah erawh chuan 50% vel zet chu a nih a rinawm. A chhan chu Transmission line hian mauhmun a paltlang hnem ém ém a, line bul hnai hi sátfai viau mah ila, thli a lo tleh meuh chuan hla tak aṭanga mau rawn kúr hian a rawn vaw trip phak tlat thin a ni.  "Engatinge mau tlawn kúrin a vuak phák loh tur khawpa hla thlenga in clear fai mai loh?"  tih zawhna a awm nghál mai thei a. Kan transmission line eg. 132kV line hi mau vuak phák tawk leka sáng a la ni si a (India ram standardah chuan 132kV line hi '6.1mtr aiin a hniam tur a ni lo,'  tih a ni a. Mauhmunah chuan mau in a hawlh phák viau a ni. Tin, a conductor  leh conductor inkar hi 9.0m vel a ni a, 15.0m vel  a zau tal hi clear turin instruction min pe a, hei hi conductor aṭanga 3.0m vela hla a nih chu. Heti chin hi chu kan clear ṭha thawkhat viau. Mau rawn vuak phak loh tur erawh chuan conductor hnuai zawn aṭanga 15m. vela hla-a maute chu va sah vek a tul ngei ang. A tawn tawn chuan 39.0mtr vel zeta zau sah a ngai hial ang.  Line kal tlangna hi ram ruak a awm mang lova, mimal ram a ni ṭhin a, tin, miin an huanah Kuhva, Zawngṭah etc an lo ching a, compensate-na tur sum neih loh chuan chutiang ém éma zauva khawih sak vak hi a inthlahrunawm in thiltih chi pawh a ni lo a ni.

Fùrah erawh chuan ruahsurin thli a tel ve vak lova, ruahsur chángin line a trip duh lo deuh.

2)   Ṭék: Ṭhál ruahsur hunlai hi khawpui rik dur dur leh Ṭék tlák duh hun lai a ni a,  Ṭék hi electric voltage maktaduai téla sáng discharge a nih avangin hemi lakah hian theih ang anga electric bungrua a tihchhiat lohna tura venhimna te chu awm tho mahse, Ṭékin line a rawn den palh thulha lo trip vat hi a venhimna chi khat a ni ve pah thei. Ram changkang ah chuan power trip-na chhan tam ber 52% vel hi Ṭék vàng a ni. Kan ramah hian chutiang taka record awm lo mahse 35-40% chu a ni ve mai thei.

Ṭhal ruah, Ṭék leh thli a lo thawh lai hi chuan power lo cut-sa mai te hi power line & apparatus te chhiat rupna lak a lo in ven lawkna preventive maintenance te pawh a ni ta zawk mah a ni.