JERUSALEM KHAWPUI INCHUHNA

 International news & politics:

JERUSALEM KHAWPUI INCHUHNA VANGIN JUDA-HO LEH MUSLIM-HO AN INDO TAN LEH MEK

(Israeli Jet fighters 80-in Gaza Strip an bei, Israeli Reserve sipai 5000 kohkir mek an ni, Palestinian 35 leh Israeli 5 an thih phah ta) 

May 12, 2021 (MSR) : Tunkar Thawhtanni atanga Israel leh Hamas leh Islamic Jihad (Palestinian) hote inkara buaina chuan zual lam pan zelin, nizan leh tukin zing thlengin Gaza Strip-a cheng Hamas leh Islamic Jihad helte chuan Israel chu rockets 350 chuangin an kap tawh a, chung rocket tam tak 90% chu Israeli Defense Force Iron Dome missile interceptor chuan boruakah a lo kap darh hman a, mahse, thenkhat chu kah thlak loh vangin Israel ram chhung dengin, building leh bus te a deng fuh a, mipa 5, naupang telin an thi tawh a ni. 

Israel Defense Force (IDF) te pawhin chutianga an ram chhung Tel Aviv, Jerusalem leh chhim lam ram, rockets 350 chuanga rawn kaptute chu tihtawp turin Jet fighters 80 in an beilet nghal a. IDF lam hian Drone, F-16 leh F-35 fighter jet te hmangin Hamas leh Islamic Jihad helte tawm buk nia ngaih 130 zet chu an bei zui bawk. Gaza Health Ministry chuan Palestinian 35 lai, hmeichhia leh naupang 17 telin an thih phah a, hliam 300 chuang an awm, a ti. 

Hamas leh Islamic Jihad te chuan Tel Aviv khawpuia Ben Gurien International Airport te pawh kapin, thlawhna thenkhat thlawh chhuah hun tihtlai phah a ni. Jerusalem khawpui chhim chhak Rishon LeZion bakah, Gaza Strip hnaih  Ashkelon, Holon leh Tel Aviv bula Givata'im khuaah te chuan Palestinian helte rockets rawn kah chu an tla a, in leh lo tihchhiat nasa lutuk a neilo nain, mi 5 in an thih phah, niin Israel Defence Force thupuangtu Col. Jonathan Cornicus chuan a sawi. Boruak chuan muanawm lam a la pan thei lova, Israel leh Hamas leh Islamic Jihad hotute hian nasa zawka indo turin an invau tawn ve ve a ni. 

Kum 2014 khan Israel leh Hamas, Islamic Jihad, Al-Aqsa Martyr Brigade leh Hizbollah te hi ni 50 dawn an lo indo chiam tawh a, chumi tum chuan Palestinian 2,100 in an thih phah a, Israeli 70 an thi bawk a, in leh lo tam tak a chhe bawk. 

ENGTIN NGE BUAINA  A LO CHHUAH TAN LE?

Muslim hote chawngheia inserh thianghlim hun leh thla serh (Ramadan) chu May 8 kha a tawpni a ni a, chumi hma ni chiah Zirtawpniah  Puithiam Sheikh Tayseer Abu Sunainah chuan thuchah sawiin, "Sheikh Jarrah hmun, East Jerusalem khawpuia mi chu kan ram dik tak a ni a, Al-Aqsa hmun venghim turin kan thlarau leh thisen kan hlan dawn a ni, kan inpeih e," tiin. Chuta pungkhawm Muslim 90,000 dawnte chu East Jerusalem a Al-Aqsa Mosque an tih, Muslim hoten khawvela hmun thianghlim 3na an neihna leh Dome of the Rock an tih, rangkachaka luan an biak in (mosque) bulah punkhawm an duh a ni. May 8 Inrinni zan chu tawngtaina hun danglam bik  (night of destiny) leh hlu tak (sacred prayers) Laylat al-Qadr an tih hun chu an ngai pawimawh em em a. Chutih lai tho chuan kum 1967 Six Day War-a Arab-Jordan sipaite kut atangin East Jerusalem chu Israel sipaiten an lakni May 10 a lo inher chhuak ve mek bawk si. He May 10 hi kum tin maiin Israeli hote chuan Jerusalem khawpui an lak hriatrengna  Ni-ah ngaiin, "Jerusalem March", tiin Juda kulmuk hoten  hriatrengna kawngzawh an  nei  thin bawk a, chutianga kawng zawhtute chuan Jerusalem Temple awmna Western Wall (Tahna Bang an tih bawk) ah te chuan kalin, an tawngtai mur mur mai thin a ni. May 10-ah Juda ho mi 30,000 dawn te chuan Jerusalem March tiin kawng-zawh chu neiin, East Jerusalem chu Damascus Gate atangin Old City an tih chu an kal a, chung mite veng turin Israel sorkarin Police 3000  a duty tir hial. Chutianga Muslim leh Juda hoten Jerusalem Temple an lo inchuh fo thin bul, Muslim hoten Old City lama "Noble Sactuary", Al-Aqsa Mosque an tih mai thin, Judate erawhin "Temple Mount" an tih Western Wall awmnaah chuan buaina a lo chhuak ta a ni. Juda-hoten Jerusalem March an neih hian, police ten Al-Aqsa Mosque compound luh erawh an phal bik lova. Israeli police ten Al-Aqsa Mosque lama Muslim pungkhawm chiamte chu hnawh darh tumin,  Palestinian mifirfiak (terrorist) hoten lung hmangtein an lo vawm a, Israeli Security Forces te chuan rubber-bullet leh stun grenade leh tear-gas hmangin an kap a, intihbuaina bul a lo intan chho a ni. May 8 atanga Jerusalem khawpuia intihbuainaah chuan Palestinian 700 dawn leh Police 20 te chuan hliam tuarin, boruak rit ru tak a lo inmung tan a. Gaza Strip lama Hamas leh Islamic Jihad helten Al-Aqsa Mosque vawnhim leh an mipuite chhan leh thlavang hauh nan tiin, rockets chu Israel ram chhungah an rawn kap zui ta bawk nen, chutianga rockets a kahna chu chhangletin an inkar boruak chu a lo lum zual ta zel a ni ber mai. Israeli caretaker PM Benjamin Netanyahu chuan, Police thiltih chu tan tlatin, sakhaw tina zalen taka chibai bukna (freedom of worship) chu  a thlawp tih a sawi laiin, Palestinian Authority President Mahmoud Abbas chuan, "Israeli Police thiltih chu, uchuak taka hmalakna", tiin a dem a. Palestinian pungkhawm chiamte chu "Al-Aqsa Pasalthate" (Heroes of Al-Aqsa) tiin a fak hle thung a ni. 

Thawhtanni leh Thawhlehni zingah Gaza Strip atangin Palestinian helte chuan rockets 350 zet maiin Israel ram chhung chu an rawn kap zui ta a. Israel ram pawhin an beisei loh deuhva Jerusalem leh Gaza Strip atanga buaina an hmachhawn takah chuan, Reserve sipai 5000 te chu indo tura inralring turin a kokir mek. Israel ram hmun hrang hrangah chuan, rocket leh missile laka inhumhimna turin mipui hriattirna ral khel dar (siren) a ri chuah chuah mai a ni. Hetianga siren tihrik a nih tawh chinah chuan Israeli mipuiten an in chhung emaw, compound-ah emaw bomb si per leh rocket/ missile ten a tihchhiat mai mai theihloh tura siam tawm kuk (bunker) ah an tawmim ṭhap tur a ni. Al Jazeera News chuan, Israeli jet fighters 80 laiin Gaza Strip a beih vangin mi 35 in an thih phah, a ti. Thi leh hliam zat hi BBC, NBC, AP, Reuters, Fox News, Haaretz, Times of Israel leh Jerusalem Post te ziak erawh a in ang lova, mahse, thi hi 30 chuang ni ngeia ngaih tur a ni ang. 

Jerusalem khawpui Old City hmuna Thawhtannia buaina chhuakah hian, Palestinian Red Cresent Society chuan mi 520 hliam awmin, mi 200 chu Makassad  Hospital pan pui an ni a, mi 5 phei chu an dinhmun a thalovin an hliam na hle, a ti. Dr. Adnan Forhoud chuan, hliamte chu an lu, awm leh ke-ah kah an ni deuh ber, a ti. 

Hamas hel hruaitu Ismail Haniyeh chuan, "Theihtawpin, nasa zawkin Israel ram chu rocket leh missile hmanga an kah tur thu leh Israeli firfiak thiltihna chu kan dovin, kan bei zel dawn a ni", a ti. 

Hetianga Al-Aqsa Mosque a Muslim pungkhawm hnawhdarh tumna vanga Israeli police thiltih hi khawvel ram hrang hrang leh Arab - Muslim ramten an dem hle a. Turkish President Tayyip Recep Erdogan chuan, theihtawpa Muslim ramte ṭangruala Israel thiltih dodal turin a sawm a, "Israel thiltih dan" a dem thu na taka sawiin, "Mi firfiak leh nunrawng sorkar" (cruel terrorist state) tiin a puh.  Iran, Egypt, Jordan, Saudi Arabia, UAE te pawhin an dem hnu lawkah, Arab Leaque leh Islamic Organization of Islamic Council (OIC) ang pawhin demna thu an au chhuah pui tawh bawk. Middle East Quartet an tih US, Russia, European Union leh United Nations chuan tunlaia Israeli leh Palestinian inkar boruak chu, Middle East biala indona leh boruak thalo tak thlentir thei a ni, tiin an ngaihven zual (deep concern) hle tih sawiin, boruak tidai zawnga hma la thuai turin Palestinian leh Israel ram hruaitute chu an ngen a ni. 

SHEIK JARRAH INCHUHNA VANG A NI ZAWK MAI THEI EM?

May 2 chho aṭangin East Jerusalem khawpuia Palestinian mi 58 chenna/ awmna Sheik Jarrad chu Juda hoten 'Kan pipute atanga kan ram dik tak,' tiin, Palestinian chhungkaw thenkhat chu chhuak turin an ti a. He lai Sheik Jarrad hmun hi mi thenkhat chuan, kum 1948 khan UN Refugee Agency  leh Jordan ram inremna angin Palestinian refugee-te chenna tura pek Nakba tih niin an sawi. Hun a lo kal zel a, 1956-ah te leh 1970 chhovah chuan Judaten an ram a nihzia an rawn hauh na telh telh a, Judaten Court-ah khingin Jerusalem District Court chuan chhungkaw 4, al-Kurd, Iskafi, Qassim leh Jouni te chu an awmna hmun chhuahsan turin a ti a, chu thil kal zelah chuan Israeli Supreme Court chuan May 10 thutlukna siam a tum nain, boruak thalo a awm leh tak thut avangin, Supreme Court thutlukna hun chu ni 30 in sawn hlat  a ni. 

Kum 1956-ah Palestinian 28 an cheng tan a, chung mite chu Yafa, Haifa atanga lo kalin Karn al-Jouni Area an tih lai Sheikh Jarrad ah an cheng tih a ni. Hetianga Sheikh Jarrad hmun atanga Palestinian hote hnawh-chhuah a, Judate awm tir tumna hi Rupert Colville, UN thupuangtu chuan, "Tihluihna hmanga sawn tumna chuan thil thalo zawk a thlen thei" tiin, Israel sorkar chu fimkhur turin a chah a ni.  East Jerusalem-ah chuan mi 441,000 cheng zinga  mi 200,000 chu Juda hnam an ni a, sipai leh police venhim an ni, an ti. East Jerusalem pumpui hi Palestinian te chuan Independence an lo nei/hmu a nih chuan, an khawpui ber (Capital) tura an lo ngaih ve thin a ni. Jerusalem chhak lam Givat Hamatos - Beit Saffa leh Har Homa - Jabal Abu Ghneuim leh Beit Sahour chhim lamah Judate hi an cheng tam ber a ni, niin an sawi. Israel sorkar thiltih  dan chu US leh UK Politician thenkhat te pawhin an sawisel a, chung zingah chuan British Politician Jeremy Corbyn pawh telin, Jeremy Corbyn chu Labor party hotu a ni. April thla khan thenkhat chuan International Criminal Court (ICC)-ah Israel sorkar khin an duh a, SaveSheikhJerrah tih movement siamin, Court kalna tur sum an tuak a ni. Sheik Jarrah hmuna thil inmun meng chuan Muslim - Arab hote a ti tangrual hle mai thei. 

ISRAEL-HOTE AN ENTAWN TLAK THIN

Israeli caretaker PM Benjamin Netanyahu leh Defense Minister Brig. Gen. Benny Gantz chu politics thilah in mil miah loh, an inmil loh vanga kum 2 chhunga Parliament (Knesset) inthlan vawi 4 ngaih phahna a lo thleng tawh a, tunah pawh sorkar siam thei party an awm rih lo. Mahse, hetih rualin an hmelma te chona leh beihna chhanglet turin Arpui mei tan, Tho thil ang leh Kawikawm thin ang thrap in an tangrual thei tlat si! Hamas leh Islamic Jihad helten Israel ram an tihbuai nasat avangin a chhanlet (respond) dan tur an ngaihtuah hova, PM Netanyahu leh Defense Minister Gantz leh Israeli Military Chief of Staff Gen. Avachali leh National Security Adviser, mi tlemte te chuan uluk takin thil awm dan thlirin, nasa zawka Hamas leh Islamic Jihad hote beihna chhanglet tura hmalak an remti a ni a. Palestinian helte hian an ngamloh chalah chil an hnawm dawn em ni ang? tih chu khawvelin a ngaichang thup mai a ni. 

PM Benjamin Netanyahu chuan, "Beihpui lian tak chu kan kal pui dawn a. Hamas leh Islamic Jihad te chuan an thiltih man sang tak (heavy price) an hmu ang. An thisen chu an lu chungah a awm a ni. He kan beihpui (operation) chuan hun rei zawk a duh hlek ang. Kan invenna tura thiltih chu kan tizau dawn a ni. Kan tanrualna, chakna leh theihna kan entir anga, Israeli khualehtuite chu him takin kan awm tir ang," tiin Hamas leh Islamic Jihad te chu a rawn vau leh ta chher chher mai a ni. Chutah Defense Minister Brig. Gen. Benny Gantz pawhin, "Kan tanrualzia a tilang dawn a. Tum (target) bik kan nei a, bul kan tan chho mek a ni. Hun rei zawka kan mipuite himna tha tak (quiet and security) kan siam ang," a rawn ti ve bawk. Defense Minister hian Reserve sipai 5000 te chu ko kir mekin, Gaza Strip lamah raldo thei tura inralring turin a hriattir tawh a ni. Israeli Politician te chu ngaihdan thuhmun lo angin awm thin mahse, pawn lam beihna thilah chuan an tangrual thiam thin hle. An va entawn tlak em! 

Israel hian Gaza Strip a Hamas leh Islamic Jihad hote chu an zung lam nen phoro tumin, Gaza hi a luhchilh dawn nge a hriat rih lova, tunah Fighter jets 80 rual nen Gaza-ah beihpui - airstrike neiin a bomb alh zuai zuai a, meikhu a zam ngiai nguai reng mai a ni. Hamas leh Islamic Jihad ho lahin Juda hote nena indonaa thih chu "Martar" tiin an hlau bik der si lo. 

Abu Hamza, Al-Quds Brigade thu-puangtu chuan, "Tel Aviv khawpui chu Gaza atangin a hla lova. Kan hmelmate chu a rem chan ang zelin kan bei hmiah hmiah dawn a, lo inring rawh se. Kan thiltum (agenda) a hlawhtlin hma chuan ka beiin, kan chhunzawm zel dawn a ni," tiin Israel a rawn vau zui a. Ziyad al-Nakhalah, Islamic Jihad Secretary General pawhin, "Dinhmun tha zawka kan awm hma chuan kan bei zel dawn a, Pathianin rem a tih chuan, dodalna (resistance) chu kan lantir zel dawn a ni*," a ti bawk. 

Ahmed Aboul Gheit, Arab Leaque hotupa chuan, "Israel-in thlawhna hmanga Gaza a beih dan chu hleihneihna leh mahni mawhphurhna hrelo thiltih a ni," tiin a dem hle. 

Israeli Air Force te chuan Jet fighters 80 zetin Gaza Strip hi an vir kual hneh hle a, Thawhlehni khan building pakhat, Rimal khuaa mi chhawng 12 zeta  sang chu Hamas office leh sipaite tawmna tiin an bomb alh zuai2  bawk. Associated Press leh Reuters News te chuan, he building chhawng 12 ah hian Gym, Business thil a awm, an ti. Nilaini zingah building chhawng 9 a sang Apartment, Medical Store, Dental Clinic awmna pawh bomb a ni a, Israel te hian an bomb chhiat tak tak hmain Drone thlawhna hmangin thawt lawk (warning) nan vawi 5 an han kap phawt a, a chhunga chengte an tlanchhiat hnuah F-16 hmangin an bomb chhe zui ta a ni. Israel  chuan West Bank lam tana Hamas Intelligence Office leh Command Center awmna a ni, a ti.

Hamas leh Islamic Jihad hote chuan Gaza bul hnai, Israel ram chhung *Ashkelon* leh thlaler hmun *Beer-Seva* hmun khuate chu rocket hmangin an kap a, *Lod* khuaah Arab thalaiten ralkhel dar a lo rik chuan Palestinian hote rocket kah a lo thleng dawn tih hriain, kut te an lo beng chian a ni, an ti. Gaza Strip hmuna Mosque thenkhatah aurinna hmangin, " *Allah Ropui rawh se!  Islam tan hnehna a ni. Dodalna kan nei zel ang*", tiin an au ruah ruah niin an sawi. 

*Ned Price*, US State Dept thupuangtu chuan, "Israel leh Palestinian hote inkar boruak lum tak  tidai turin hruaitute kan ngen a, Gaza atanga rockets hmanga Israel ram kahna pawh tihtawp ni rawh se," a ti. *Tor Wennesland*, UN Special Envoy to Middle East chuan, "Inkahna chu tihtawp tur a ni. Hetianga tu lam lam pawhin an thiltih an tihtawp thuai loh chuan indona puitling (full scale war) a thlen tir ang", a ti. PM Benjamin Netanyahu aiawh thupuangtu *Ofir Geldelman* chuan, "Palestinian hote chet dan chu Jerusalem atanga Gaza Strip thlengin a hma atanga ruahmanna fel fai taka thiltih a ni. Hetiang buaina (riot) awm turin an lo ruahman lawk diam a ni" tiin a puh. 

Tel Aviv khawpui chhim chhaka Lod khua *Mayor Yair Revivo* chuan, "Arab thalaite chuan vantlang rama mipui thilte chu an tichhe vak a. Israel flag aiah Palestinian flag te an lo zar pharh a, mi pakhat kahhlum a ni", a ti. Heta kahhlum hi Haaretz chanchinbu chuan Arab mi niin a sawi. 

*JERUSALEM KHAWPUI INCHUNA VANGA BUAINA KAL ZEL NGHAWNG A NI*

Khawvela khawpui upa ber zinga sawi, Jerusalem khawpui chu *Juda, Kristian leh Muslim* hote tan sakhaw thilah hmun pawimawh leh thianghlim a ni a. Judate lahin Lal Solomon hova an sak  " *Jerusalem Temple*" sakna hmun tiin an ngaihlu em em a, an chatuan khawpui (unified eternal) ah an ngai a ni. Jerusalem Temple an tih, kum *586 BC* a Babulon hote tihchhiat sak, a hnua *Zawlnei Nehemia* hun lai ( kum 445 - 432 BC) an sak that (rebuilding), tuna Temple Mount tih laia awm chu kum AD 70 khan Rom sipai General huaisen Titus-an a chhutchhiat leh hnuah, Muslim hote hmun thianghlim Al-Aqsa Mosque bula Noble Sanctuary an tiha "Dome of the Rock" tih lai chu Jordan ramin a lo awp thin hnuah, chu laia Muslim hote hmun thianghlim 3-na chu  Islamic pawl pakhat Waqf enkawl turin a ti a, a lehlama awm Western Wall tih chu Judate hmun thianghlim a lo ni bawk si. Kum 2000 khan Israeli Politician ten an tlawh tum pawhin, Muslim/ Palestinian hote nen intihbuaina a lo tichhuak tawh a ni. Engtikah tak an inkar buaina chu ching fel tak ang maw?! Khawvela Indopui 3na tichhuaktu tura mi tam tak ngaih a ni thin a ni. 

-CT LALRINAWMA