LADC A MDC NAUPANG BER

~RAUTHLA DAILY NEWS LAWNGTLAI

May 11, 2021

C.Biakthansangi hi Pu C.Lalzarliana (L) leh Pi A.Lianzuali fanu niin Ni 14.March,1994 khan a lo piang a. Naupang zawiawi leh lehkhathiam thei tak a ni a,uanau pali niin naupang ber a ni nghe nghe a ni. 

Kum 2015 khan B.Com chu HATIM atangin a chhuak a. Mizoram ah pahnihna dinhmun a hauh hial a ni.Hemi hnu hian MZU ah M.Com zir chhunzawm leh in Kum 2017 khan M.Com chu tha takin a zirchhuak leh ta a. Hemi tum hian MZU ah M.Com ah a ti tha ber nihna a hauh leh bawk a. Lehkha zir zel duh mah se, 3rd May 2018 a pa ber in a boralsan tak avangin a chhunzawm thei ta lova. Zirtirtu hna mi aia  thawkin a inhlawh thin a ni.

C.Biakthansangi hi Nutei tia koh a ni a. Lai Autonomous District Council a Pu Manghmunga Chinzah kaihhruai sorkarin Nominated MDC atan an ruat chu lawmawm a tih thu a sawi a. A pa Pu C.Lalzarliana (L) kha a boral thlengin MNF party ah rinawm taka awmin District Hqrs, Lawngtlai ah Treasurer anih laiin a boral a ni. Nutei chuan, 'Ka pa sulhnu chhunzawm thei tura hetiang dinhmun a min dahtu Pathian hnenah lawmthu ka sawi a. He nihna chanvo pawimawh tak luah ve thei a, kan ram hruaitute rilru a kan awm ve ngawt pawh hi lawmawm ka ti tak zet a, an mi duhsakna hi a hlu ka ti hle a ni,' a ti.

Nutei chuan, Politics hi mi ṭha lo leh mi pamhamte tualchaina hmun tur chauha ngai kan awm ṭhin hi a pawi ka ti a. Politics hi anihna takah chuan Ringtuten kan mihringpuite hnena rawng kan bawl sak theihna leh kan ṭanpui theihna kawng pawimawh tak a ni zawk a. Chuvangin hemi kawngah hian politician te kan pawimawh ka ti a, thianghlim taka kan hman chuan a ṭha  ka ti, a ti bawk.

Tunah hian Nutei hi Kum 27 a tling ve ta reng mai. LADC ah chuan MDC naupang ber record a siam hial mai thei a ni. Mi tam takin engati nge sawrkar hna a beisei zawk loh tih zawhna tam tak pawh a awm bawk a. Mahse, a pa sulhnu chhui thei tura hotute duhsakna chu lawm taka pawm a, ram leh hnam tan a theih ang tawk in, a thiamna leh finna hmang chung zela ke pen chu a tum ber pakhat a ni. MNF party in 'Pathian leh kan ram tan' a tih ang taka ram rawngbawlna kawngah pawh Pathian dah hmasak ber chu a duh ber a ni.