Nungchate Suasam Suh

Fisheries Department in luia nungchate suat khapna leh mipui hriattirna chhuah

No.404/2021-2022

Aizawl, the 5th May 2021: Tunhnaiah ruah a sur har avang leh ramngaw lo chereu zel avangin kan rama lui tui te a lo kam nasa a. Hetih lai hian mi tam takin luia nungchate dan phal loh in a suasam nasa hle a hriat a ni a. He thil hi sawrkar chuan ṭha a ti lo hle a. Kan luidunga nungchate an inthlahpun zel theihna tur te leh dan bawhchhetute hrem an nih theihna turin a hnuaia tarlan ang hian Fisheries department chuan thuchhuah leh hriattirna a siam a. Mipuite ṭawiawmna a ngen bawk a ni.

Tunlai hian khua a ṭhâl rei avangin kan ram luitui te a kam nasa ta hle mai a, hemi hun hi remchangah hmangin mi nunrawng, pawisak neilo ten luidung nungchâ te dan phal loh (tûr, Bomb, Rù, Chinai etc.) hmangin an suasam ṭhin a ni tih hriat a ni a. Hetianga dan phal loh hmanraw hmanga luidung nungchate man a nih hian, a te leh lian pawh thliar loin man telloh thlengin kan suat tihna ni a, an inthlah pun zelna tur ah harsatna nasa tak siamna a ni a, hun lo la awm tur atan hian an rêm mai a hlauhawm hle a ni. Hetiang a uchuak taka luidung nungcha te suasam a ni ṭhin hi Sawrkar chuan a ngai thutakin pawi a ti hle a ni.

The Mizoram Fisheries (Amendment) Act. 2016 section 6 sub-section (1) tlawh chhanin lui/tui khuah/dil a nungcha te hi phalna nei lo tan chuan eng hmanraw hmang mahin man phal a ni lo a, Department aṭanga phalna nei tan pawh Tûr, Bomb, Chinai, Dynamo, Rù hman khap tlat a ni. Dan phal loh hmanga luidung nungcha man tute hi lungin tan leh pawisa chawitir a hrem theih an ni.

The Mizoram Fisheries Conservation Rewards Scheme, 2019 section 3 sub­section (a) hnuaiah hetiang dan phal loh hmanga luidung nungcha man tu te hrem an nih theihna tura thu neitute hriattir tute chu Department in lawmman a pe thei dawn a ni.

Kan ram rohlu luidung nungchate an lo pun zel thei nan duat taka enkawl a, venghim zel turin Mizoram Fisheries Department chuan Zoram mipuite a ngenin a sawm a ni.

Source : DIPR edited by Malsawmsanga, MIS, Deputy Director

Hetih lai hian, Serchhip lam pawhin thuchhuah an lo nei ve mek bawk.

SERCHHIP  DISTRICT  HUAMCHHUNGA  VANTLANG  TANA  HRIATTUR PAWIMAWHTE :

Mizoram, kan ram chhung ngeia Luidung Nungchate hi a kum telin kan ti chereu zel a, hetiang renga a ram neitu zofaten, kan duat loh a, kan humhalh that loh chuan mang mai thei dinhmunah an ding mek a ni.

Hetiang hi alo nih tak avangin kan ram a Luidung nungchate humhalh a, an chenna hmun leh an inthlah pung tur tihbuai a, abik taka kan ram lui Sanghate, Kaikuang leh Chakai leh Chengkawlte tihlum vek thei Electric khawl hmanga man leh Dynamo hmanga man te, Chinai leh Tur lam chi reng reng te hman  khap vek a ni a.

(I) The Mizoram Fisheries Amendment Act, 2016, Section 6, Sub Section (I) in a sawi angin Mizoram chhunga Lui leh Dil a Sanghate, Gelatine leh puakthei thil chi hrang hrang hmanga man te khap tlat a ni. Serchhip District huam chhungah hetiang dan phalloh hmanga Sangha/Chakai/Kaikuang/Chengkawl etc. man thinte chu dan anga man leh hrem theih an ni. (The Mizoram Fisheries Amendment Act 2016, Section 6, Sub-Section 1(a),(b), (c), (d) & (e) ).

(II) Luidunga Sanghate, Gelatine(Bomb) emaw puakthei thil dang hmanga mante chu thlakhat atanga thlathum thleng Lungin tan bakah Rs.5,000/- thleng chawitir leh Lungin tan leh pawisa chawitir theih an ni ang. (The Mizoram Fisheries Amendment Act 2016, Section 6 (1), Sub-Section 1(a) ).

(III) Chinai leh Tur lam chi reng reng (Bleaching Powder, ru) hmanga Luidung Sangha man te chu thla 6 atanga kum 1 thleng Lungin tan leh Rs.20,000/- thleng chawitir emaw thla 6 lungin tan leh pawisa Rs.20,000/- chawitir kawp theih an ni ang. (The Mizoram Fisheries Amendment Act 2016, Section 6, Sub-Section 1(b) ).

(IV) Fisheries Department atanga phalna nei an nih loh chuan Nghafuan ven, Ngawidawh, current hmang chi khawl leh Dynamo hmang chite, Len leh Nghakuai hmanga Sangha man leh Luidung nungcha ti chereu zawnga che te chu ni 15 atanga thla 1 chhung Lungin tan leh Rs.2,500/- chawitir emaw ni 15 atanga thla 1 Lungin tan leh Rs.2,500/- chawi kawp tir theih an ni ang. (The Mizoram Fisheries Amendment Act, 2016, Section 6, Sub-Section 1(e))

           DFDO, Serchhip

Serchhip District.