THIL ṬHENKHAT KAN HRIAT TLAN ATANA PAWIMAWH KA TIH ZUALPUI TE

 THIL ṬHENKHAT KAN HRIAT TLAN ATANA PAWIMAWH KA TIH ZUALPUI TE

~Dr. R. Lalthangliana

12th. May, 2021

I.    A hmasain India ram dinhmun han tarlang ila. Hri kai tawh zat - 2,33,40,592 niin, thi zat hi 2,54,225 an tling tawh a. Darkar 24 chhungin hri kai thar zat hi 3,48,555 a ni a. Hemi hun chhunga thi zat 4198 an tling bawk. Hmarchhak States-ah darkar 24 chhunga kan dinhmun - New cases 8718 an awm a. Assam 6258, Manipur 592, Tripura 466, Megalaya 450, Nagaland 269, Sikkim 241, Mizoram 237, Arunachal 205.

II.   Mizoram dinhmun tlangpui - (IDSP Report hi a rintlak ber e) hri kai tawh zat 8032, boral tawh 23 an awm a, hri kai mêk 2007 an awm bawk. District hrang hrang dinhmun :—

1. Aizawl -1425

2. Serchhip -153

3. Kolasib -103

4. Lunglei -93

5. Siaha -69

6. Mamit -55

7. Lawngtlai -41

8. Saitual -31

9. Khawzawl -29

10. Champhai -8.

11. Hnahthial - NIL

III.  Dy. CM zahawm tak, Pu Tawnluia te chhungkaw dinhmun a ṭha a. Khawsik leh taksa sil ang chi kha an nei ta rih lo a, a lawmawm hle mai. Hetih lai hian P&E Minister zahawm tak, Pu R. Lalzirliana erawh chu Doctor te’n ZMC lama enkawl ngaia an hriat avangin lak phei tuma buaipui a ni a, a Oxygen level han hniam deuh vang te a ni a, an nu erawh a ziaawm a. Kan ram hruaitu pawimawh te Civid-19 hri laka an dam lehna turin Pathian hnenah ṭawngṭaiin i hlan ang u.

IV. Vanneihthlak takin 11.5.2021 khan Switzerland chuan Ministry of Health & FW kaltlangin bungrua ṭhahnem tak min pe a. Tin, Ireland leh Taiwan aṭangin Oxygen Concentrator kan dawng bawk a. Switzerland-in min rawn pek  Health Ministry Delhi aṭangin ni 10.5.2021 khan oxygen concentrator 100, power adapter 100, Oxygen Nasal Cannula 5000 kan dawng bawk a, hmanraw pawimawh min petute chungah thinlung takin lawmthu ka sawi a ni.

V.   SBI Regional Manager Pu Changkima nen kar kalta khan kan inbia a, Covid-19 vanga nunna chânte ruang phurhna tur lirthei ngaihtuah tura rilru an lo sen tur thu min hrilh a. Vawiin 12.5.2021 hian kan inbe leh a, Covid vanga thite ruang phurhna tur bik (Morgue van) Bolero Pickup chu CSR aṭanga min pek theih dawn thu leh, a motor pawh a lo thlen thuai an beisei thu min hrilh a, SBI hotute chungah lawmthu ka sawi mawlh mawlh a ni.

VI.   Central lama kan lo thlen tawh angin, Covid-19 damdawi pawimawh Remdesivir vial (injection) chu Joint Secretary, Deptt. of Pharmaceutical. Govt of India chuan Mizoram Quota Allocation 2000 ruahmanna min siam sak thei ta a. Remdesivir vial 600 a rawn thleng tawh a. 400 dang pawh hmuh leh thuai tura beisei a ni.

VII.  Covid-19 damdawi vâng leh manto em em, ‘Tocilizumab’ pawh Health Ministry-a kan zuk ngen angin Mizoram tan Allocation 30 min rawn pe thei ta a. A tirah chuan NE State te pêk ve an tum lo a nih kha!. Kan lawm hle mai.

VIII.    Ventilator chungchangah kan Chief Minister zahawm tak phalnain a ṭha chi 35 lei turin chak takin kan indawr mek a, a lo thlen hun tur erawh sawi theih la ni chiah lo mah se, ZMC lamah Ventilator indaih lohna leh harsatna kan la tawk rih lo hi kan lawm hle a ni.

    Tin, May ni 8, 2021 khan Ministry of H&FW aṭangin Ventilator min donate-tu tur USIBC kaltlangin NITI chuan 10 kan hmuh tur thu hriattirna min rawn thawn a. Ventilator min pek tur Quality erawh kan hre lâwk bik lo a. Nikum lama hman tlak loh min pek ang kha chu a nih tawh loh kan beisei.

IX.  VACCINE CHUNGCHANG :-

    Kum 45 chunglam vaccine pek kawngah harsatna awm lutuk lo a kan kal thei hi a lawmawm a. Ni 11.5.2021 khan Covid-19 dona leh Vaccine pek kawnga state ti ṭha ber zing a mi kan nih avangin Health Ministry-ah vaccine min pe ṭhahnmen deuh turin ngenna ka zuk siam nghe nghe a.

    Hetih lai hian Vaccine inpêk kawngah Mizorama pawl hrang hrang te’n tihsak turin ngenna an rawn thlen ṭhin a. Mahse, Govt. of India Ministry of H&FW lamin dan khauh leh strick tak an lo nei a. Duh anga kan intihsak zung zung theih loh avangin pawl ṭhenkhatin sorkar dinhmun an hriatthiam hrâm a ngai a, chutih rual chuan kum 18 - 44 te tana vaccine a lo thlen hunah hêng pawl hrang hrangte tan hian ruahmanna siam kan tum dawn nia.

X.   Lunglei Civil Hospital-a awm turin cheng nuai 781/- senna tur Laboratory set up lian tham tak (Laboratory Block & Installation of RT-PCR) din turin central ah DPR thawn thlak mai tur kan peih fel tawh a. Hei hi a hlawhtlinna kan hmuh chuan Siaha, Lawngtlai leh Hnahthial District te tan pawh an hnemhnampui theih tur a ni ang.

XI.  ZMC-a TB Laboratory kan hman ṭhin kha, hman a ngai tawh lo a. ICMR lama kan ngen angin Virus Research & Diagnostic Lab. (DR&DL) chu a thlawnin min pe a, tunah hman mêk a ni tawh a. Heta thawktu tur engemawzat pawh ICMR (MH&FW) lamin min tumsak a. Heng bakah hian ka zuk dil angin RT-PCR Test Kit 25,000 (Rs. nuai 200 man dawn tur) a thlawnin min pe bawk a, an chungah kan lawm hle.

XII.   Oxygen genarating plant atan NESID aṭangin Mizoram chhim lam leh hmar lam leh District thenkhat tan ruahmanna kan kalpui mek a. Mahse, Covid-19 vangin Mizoram pawn aṭanga mi thiam chahlut turin a Installation buaipuina lamah harsatna kan tawk a. Hetih rual hian ZMC lama kan Oxygen leh Ventilator chungchangah boruak danglam tak a awm a nih loh chuan thlaphanna tur a la awm loin kan hria.

XIII.    Vanduaithlak takin ZMC VR&DL laboratory-a thawk mi 3 nimin lamah an positive hlauh mai a, thawktu dangte Quarantine an ngai bawk si a. Anmahni thlaktu turte awmna turah harsatna kan tawk a. Most Rev. Bishop Stephen Rotluanga Roman Catholic hotupa hnenah Montfort School chu kan Staff te awmna turin ka dil a. Ani’n min lo phal sak a, kan lawm hle a ni. Tin, heng kan Lab. Technician te mutna tur âwngphah (Mattress) 40 zet mai, Prof. F. Lalnunmawia MLA, Aizawl South III bialtuin a pe a, a chungah pawh thinlung takin lawmthu ka sawi a. Heti hian ZMC RT-PCR chu kalpui lehnghal mai turin inbuatsaihna kalpui leh nghal mek a ni.

XIV.  SUM SENSO NGAI ṬHENKHAT :

     Mizoram pumah CCC 42 kan nei a. Hetah hian mi 2295 an leng thei a. Aizawl AMC huamchhúng bikah CCC hi 13 a awm a, mi 1083 an awm thei a ni. Heng bak CCC dang pahnih mi 140 awm theihna tur pawh peih thuai beisei a ni. CCC-a enkawl mekte tan hian nitin cheng nuai 8 vel, thlakhatah nuai 230/- vel sen a ngai a.

     CCCC hi Mizoram ah 48 awmin mi 1165 an awm thei a. Aizawl bikah CCCC khum 811 a awm a. District dangah khum 520 a awm bawk.

     ZMC bika inenkawlna hi a hautak hle a. Covid vei leh Medical Staff dahna tur 100 chuang tunhnaiah ruahman belh a ni a. Damlo zawng zawng enkawlna leh an test-na te, PPE, Diet leh bawlhhlo dang zawng zawng a tan ni khatah cheng nuai 20/- vel sen a ngai ziah a. Tun ang renga kan kal chuan thlatin cheng nuai 600/- sensoah a kan hmang ziah dawn tihna a ni a, a hautak duh hle mai.

   Awle, a tawp berah chuan kum khat chuang zet he hripui hian kan nunphung a ti khaihlak ta a. Hetih lai hian Sorkar anga mawhphurhna ka neihna-ah in mittlun lohna tam tak ka nei ang tih ka ring reng a, ṭawngkam úchuak deuh hman palh châng te, mi rilru tihnat châng pawh ka nei ṭhin ang tih ka ring a. In mi ngaihdamna leh hriatthiamna ka ngen tak meuh meuh e.

    Hetih rual hian Mizo mipuite hnenah lawmthu ka sawi a. Kohhran te leh Sorkar hnathawk zawng zawng, NGO, LLTF, VLTF te leh pawl hrang hrang, mimal ṭhahnemngaihna vangte leh kan Health Department leh Police Department hnuaia thawktu hrang hrang, Covid Volunteer theih tawpa tun thlenga thawktu zawng zawng kan zavaia ṭhahnemngaihna luangkhawm avangin state dangte lakah; dinhmun ziaawm takah kan awm theih phah a. Theihtawpin ṭangho zel ila, a pawimawh berah chuan engkim ti thei, kan Pathian hnenah ṭawngṭaiin, kan harsatna te thlen ila. Pathian râwn chung zelin he Covid-19 hri lêng thawh hnihna hi chu kan hneh ngei ang tih i ring tlat ang u.

Ka lawm e.

Pu Thangtea hi chu a mimal tak pawh hian a ṭha ngawt mai. A dept. chan a piang mai a hneh em em zel hi kan vannei tak zet a ni.