Constable to IPS

CONSTABLE AṬANGIN 

INDIAN POLICE SERVICE(IPS)-AH!

By: Zairemthanga

A chanchin kan sawi tur Feroz Alam hi Delhi Police ah Constable hna kum sawm chuang lo thawk tawh niin a tumruhna leh beidawnnain a nunah hmun a chan ve loh avangin tunah chuan IPS Officer a ni ta luah mai le.! A chanchin tlemte i han tar lang teh ang.

Feroz Alam, UP

Feroz Alam hi UP-a Pilkhuwa District, Hapur khua (thingtlang)-ah a lo piang a. Muslim chhungkua niin an chhungkua a zir sang ber chu a pa niin pawl 6 thleng a zir ve a ni. Kum 2010 khan pawl 12-a zawh hnu, Graduate a tum ve lai takin Delhi Police-ah hian constable-in a lut a, hemi hnu hian a graduate zui ta tho a. Delhi-a PCR Unit-ah a post a ni.

Ama sawi danin an Officer te a hmuhin nih ve a châk thei em em a, an chet vel dante, an uniform te thleng chuan a chil a ti pût nasa ṭhin a ni àwm e. Tichuan, UPSC exam tur chuan a inbuatsaih ve ta a, mahse police ah pawh a lal lo ber a nih miau avangin leh a chhungkaw chawmtu a nih bawk si avangin coaching pawh a kal ve lo. Duty zawh hnu-ah leh duty lai pawhin hun ãwl a neih apiangin phone-a note a neih ang angte chu a zir ve thin a. Vawikhat mah a hranpain chawlh a la lo a ni. A exam hmasak ber kum 2014-ah chuan Prelims clear mah se Main a paltlang lo. Beidawng loin a exam leh a, Main bawk a pal tlang lo leh. Mahse, a hma aiin mark a hmu sang hret a, a lawm hle thung. A kum lehah a exam leh, a la paltlang chuang lo! Mark a hmu sang leh hret chauh a ni.

Mahse, beidawn tum lova a beih hram hramna leh a tumruhnate chuan par an chhuang ta a, a tawpna ber, a vawi rukna kum 2019-ah chuan a suangtuahna chu a puitling ta! All India Ranking-ah 645-na a rawn ni pha ta a ni. An khuaah leh an thlahteah UPSC paltlang an la awm miah lo a, an chhuang ve khawp ang. "Ka thawhpui leh ka thiante, 'bhai' ti-a min ko reng tawhtute'n 'Sir/Saahab' min han ti tur chu a hé deuh hu hian ka hria a, a awkward riau a ni" tiin a sawi.

Amah hi Delhi ah tho hian Asst Commissioner of Police (Hetah chuan SDPO ang hi) ni tura ruat a ni a, tunah hian Delhi Police Training Centre, Jhadodakala ah a training mek a, damtea a awm chuan nakum march 2022-ah a hna a zawm dawn a ni. 

'Hlawhchhamna hi hlawhtlin-na kai lawn a ni. Tlu mah i la, ka tho leh zel ang. Mahse, ka tum ngai reng kha tih hlawhtlin ka tum tho ang, 2nd choice a awm tur a ni lo'           ~ Arnold Schwarzeneger

Thu belh: Ka tluk lo hle a ni. Mi fate tan bawk a tangkai leh ang. 'Mi fate' nih a ngai' an tih kha maw..!