Covid Hlimthla

Aizawl Dam lo kantu Thingtlang mipuite u,

In thlawhhma kawng zawh Car changkang leh lir thei mawi-hnai deuh nena kan tlan pelh vuk vuk lai che u khan maw, in thuamhnaw tet hriphrep leh in thlantui far khan a tam zawk ngeng a chhun pha lo. Hmanhmawh takin kan pel puat che u a; kan vei zui lo che u. Fur ruahsur leilung hnawng kara Vailenhlo leh Buarzen ham faia in nileng tur lainat nachang hria an lo awm a nih pawhin, chhiar tham lek bak va ni suh! Chuti khawpa ngaihven leh vei zui ngai lo tute tana in thil ropui rawn tih chuan min chiah zawp a, kan tui ral zo ta a nih hi! 

Lawm em em a in thlai thar kan khai haw  rual hian, in lakah kan inthlahrung thar hle tih hi min lo hriatpui  teh u.

Tuk loh ram daiah riah buk sualin riah run in rem a. Thomitchhaih leh Vaihmite karah, Hnim hling nei leh Thing chang (ram chang) kum hlun vat darhin Thlawhhma insual chhuak a. Kut durh pawh pawisa thei lova in thawhchhuah thlai hring thar hmasa , Aizawl dam lo  kan nan in rawn hlan zui a! Thlalakpui leh Mizo nunhlui Flim siam nan baka Thlawhhma hlutna hre fumfe tawh mang lo te nen lam in thawh rah kan seng ta suau suau mai hi a mak a, a ropui a, a lawmawm dangdai takzet a ni! 

Lo neitu te u, Aizawla Mizo mipui thinlungah in hlu thar zual e! Ngaihsan ngawt hlawh lova, ngaihsak in hlawh ni her chhuak mawlh rawhse.👍

Hripui leh Chawhmeh inthleng tawn thei dinhmun hlauhawm hre reng a, Aizawl in rawn daidar ngam ngat hi Vanapa leh Taitesena thisen kai pasaltha chu in lo ni e! In hnathawh ropui leh inpekna hian patling hnuk a khawih a, nutling mittui a fartir asin! 

Hlemhle tak leh kut tling lova inhaivur hreh lo, thi reng chunga nung hming-pu te, thawkrim chunga nuar ngai lo nangnin min rawn luh chhuah azarah harhna dik a par chhuak ngei ang.

Nangni hi kan Darthlalang, khawpui luahtute kan inen fona tur chu in ni.

 In chan tur min hlan lai hian. In chan ai kan eiru bik ang tih ka hlau ta ber mai! 

Aizawl dam lo kantu Thingtlang mipui te u.👍

Reuben-a pa

Bethlehem Veng, Aizawl.