ENG SORKAR NGE KAN MAMAWH?

 ENG SORKAR NGE KAN MAMAWH?

 ~David Sailo

Ṭhenkhat chuan, "Tuna kan Sorkar hrawn hi chu kal mai mai tawh se, 2023 ah ngaihdan kan tarlang ang chu" an ti bai bai a, a tam zawk ngaihdan hi eng tak ni maw!

POLICY ZUANGLAWR -

Zuanglawr tih hi tute emaw kah nan kan hmang lar hle mai a, Party zuansan hi mi tam tak, Minister thleng hian an lo awm tawh a, mimal takin Policy emaw Ram hruai danah emaw, Party kalphung turah ngaihdan an nei a, chu an ngaihdan chu an Party in a kalpui hleithei si lova, ngaihdan in persan avangin an chuanna lawng pil mek atangin tlanchhuak pawl an awm ṭhin a, an ram hruai duh danah an chuanna Bus chuan an kal tum lohna lam hût ah a phurh luih reng avanga chhuk ta sawi tur pawh an tam tawh hle. Ṭhenkhat chu an mimal kan teh sakin ti fuh tak tak an awm a, a ṭhen chu zuih ral ta pawh an awm. Kan tehna hian RAM a la thleng ngai chuang lo.

Policy zuanglawr hi mimal zuang ai chuan kan tuar zawk. Hman atangin Lakhuihtheih, tung, Oil palm etc ah kut hnathawktute hi Policy ah min zuan lawr san nasa tawh lutuk a, a hlawkna mimal leh ramin a têl hma in Sorkar in kan zuan san a, pipu aṭanga lo nei ṭhang, zirtir ngai hlek lo chu "BULṬANNA" kan ti thar fo reng mai a nih hi!! Mimalin Policy avanga a zuan ai chuan Ram hruaitute Policy zuang lawr lutuk hi vawiin thlenga kan sawngnawina a ni.

KAN HUN TAWN MEK -

RT-PCR kan ti, chakai Farm kan ti thul, Brandisii atangin Rawmi ah kan zuang bawk, kut hnathawktu tana han dinchhuahna tur Project/Principle mumal tun thlengin kan la nei lova, kut hnathawk kher lo pawh Ram tan Flagship emaw hmalakna lian tham 2023 a thlan tlin leh kan batna tur chhan chhunzawm tura dah hmuhtur a vang hle bawk. PAHOSS aiin Covid in Traffic Jam Free a thlen chiang zawk a, PAHOSS pawh Policy zuan lawr san tur a lang, Nuai 2000 dawn kan thehthangna, State Sorkar pachhe takin a lo lut leh tur (Investment) hisap hlek lova hausa sa ṭanpuina a hawi lek lek zawk a ni.

ENG SORKAR NGE KAN MAMAWH -

Kan ramah hian Resource chi hnih kan neih ropui chu lo neih (Agriculture) leh zirna (Education) a ni. A dang hi tih tlak a ni lo tihna a nilo.

Agruculture hi "Kuthna thawktute chawikan" kan tih ve fo in nghahna Department a ni a, State kan nih atanga kum 30 liamah pawh Kut hnathawktute dinhmun chu awhawm loh ber pawl, tharchhuah chhun pawh hralhna (Marketing) a la buai reng an ni a, MR a Sorlar hnathawh pawh kan la ngainhlu zawk reng mai a nih hi. Loh theih loh a thlawhhma neih ngai kan tam si. Heng ho siam lenna tur aiin an chilputna tur Scheme, an ṭhan ve theih hauh lohna tur nisi, an duhthlanna khuahkhirh sak tlat thei si hi kan siam thiam em em a, Vote pek thleng chauha hmangaih thiam hi Politician ropui ah kan la ngai si a ni!!

Mawlmang deuh pawhin :

Kan ram leilung mil deuh thlai chi(Variety) 10 tal thlang chhuakin Sorkar hian leisakna leh a thawn chhuahna tur, a sawngbawlna  (Processing) thlenga in ruahman at ngam, kut hnathawk ten a hlawk dan tur chhût lawk sa diama hna an thawhna tur Policy hi vawiin thlengin kan la nei lo. Hetiang hi awm se, Raw buaipui aiin Sorkar hna tenau thawk ten an bansan phah hial zawkin ka ring.

Mizote Talent ropui "Zirna" hi kan sawpchhe chhunzawm zel a, Sorkar Policy piah lama tlan thei thei an hlawhtling pheuh pheuh chauh a ni. A General in kan Pass huk huk a, khal fal ngam tak tak Product kan neih hleih theih si loh chhan hi Education kan hlamchhiah vang a ni. Zirtirtu chi hrang tam lutuk te, hlawh la hleithei lo Zirtirtute dinhmun chhe lutuk te hian Zirlai nih atangin ngaihsan tawk lohna an nei lian nghal a, Academic mai nilo, State hrang hranga CS turte, Parliament Secretariat a kan Minister te ṭi duka an khawsak lohna tur tal pawh hian kan Mizo IAS an ṭhut nghuk a ngai a, chutiang tur chuan Coaching Centre, State dang elphak mai nilo, an rawn êl khawp kan neih a hun tawh zawk a ni. 

TLIPNA -

A thui hma si a, duh tawk phawt ang. Hmalakna fahrah tih hriat ngawih ngawih, sum siamna tih langtlang buaipui reng ai chuan Agriculture leh Education bika CHANGE nei thei tur, sawi ringawt nilo, ruahmanna leh kaihhruaina duang at, bawhzui nghal theih duangchhuak a THUPUI a nei ngam, inzawrh nana hmanga ṭan ngam 2023 ah beisei ang aw.