KOHKHAWM TEN AN KO KHAWM DAWN

 KOHKHAWM TEN AN KO KHAWM DAWN

23rd June                                    - David Sailo

Sorkar berin a chánga a koh khawm zinga mi CYMA chuan "All Party" a ko khawm ve dawn ta.

KAN DINHMUN -

Lockdown puan leh puan loh turah hian CM hnenah  RAWTNA thlen a ngai zel a, chu rawtna thlentu lah chu a ki hrang hrang a ni a, a changin Medical Operation Team (MOT) ten an thlen a, achangin Health Minister ho a ṭhukhawmim an thlen a, a changin MKHC rawtna angin kan kal nawk nawk bawk a, kan in Lockdown dan pawh a phuahchawp telh telhin a lang bawk. Hri leng thawhkhatna a Lockdown awmze nei a thlahdul hret hret ang kha kan ni ta lo tawp. 

INKHUNG HMANGA UM BO TUMNA -

Chawlhkar 9 kan hmanna ah pawh Record thar kan siam ulh ulh reng a, vawiin thlengin kai thar ngawt pawh 430 kan la ni!! Inkhung lo phei ila ti awm ta se Inkhung hi a damdawi a nih chuan Chawlhkar 9 ah chuan damlam pan ve tawh tur chu kan ni. Sorkar hian Plan A (In khung) a kalpui a, eizawnna, chhungkaw dinhmun tuar fe fe a langchhuak ṭan a, hetiang kan nih takah chuan ti a Plan B hman mai tur kan neilo nge ni kan arkhawthim dai deuh ta nawk nawk mai a tih theih.

CYMA AN LO LANG TA -

'An ngawi thei mange,' titu tam tak an awm hnu ah, Sorkar in kalpui zel dan tur a hriat meuh tawh loh anga a lan hnu ah, Party dangten All Party Meeting neih a ṭha e an tih lawm lawm hnu fe ah, kan Budget siam rema, Relief Fund ngawt nilo, Budget atang ngeia thapui thawha hri leng do a ngai a, 'Budget siamṭhat (Re-Appropriate) a hun e,' kan tih sup sup hnu ah a engmah hlawhtlinna kan hmu thei lova, All Party Meeting chu a lo ṭul ngang a ni ang, naktuk dar 11 am hian CYMA Committee Room ah NGO lian dangte nen CYMA chuan a ko khawm ta rup mai.

HETI ZAWNG HIAN NISE -

1. RAgT Test (50% rintlak) rinrawl bera kan hmang lawi si hi tih tlem nise, hei hi kan tawrhna ber pakhat a ni tih hmuhchhuah a hun.
2. Lunglei mai nilo, District tinah RT-PCR khawl bun turin chak taka hmalak nise.
3. Containment Area/Zone a puan reng reng khuahkhirh satliah tawp lova Random Test kalpui nise, RT-PCR hmanga Confirm ni thei se.
4. Aizawl leh District Capital ah Random Test kalpui nise.
5. Chief Minister Relief Fund ngawt lo deuh kan Budget ngei hi hri leng beihna atan hman dan tur ngaihtuah nise.
6. 4C leh 3C te hei aia changtlung zawka thuam nise, heng hmun atanga chhuak turte RAgT ringawt nilo, RT-PCR hmanga Confirm ngeia Release nise.
7. Sorkar hnathawk, hri leng vanga Pisa kal ngai lo te hri leng dona ah tun aia hman ṭangkai dan dapchhuah nise.
8. Sorkar aṭangin sum faia ṭanpuina mumal a awm thei si lo a nih chuan lirthei a sumdawng dinhmun chau tawh tak te, sumdawng dangte tan awmze nei zawka ruahmanna siam thuai ni tawh se.
9. Hri kaite hmunpui ZMC hi thuam that leh zual nise, 3rd Wave nen kan zawm chho dawna a lan avangin thawktu indaih lohna te, ICU leh Ventilator dinhmun te a lêt a thuam ṭhat dan ngaihtuah nise.

TLIPNA -

Sorkar ber hian kal dan a vâia a lan avang leh kan kal mek danah hlawhtlinna hmuh tur a awm mumal loh avangin CYMA chuan  hma a la ve ṭan dawn a ni a, engtiangin nge, tute nge tih leh eng ruahmanna nge tih te chu kan lo châng ṭhup a ni tawh ber e.