LEHKHA IP MÂWI, LOCKDOWN, ECONOMY, SAFETY

LEHKHA IP MÂWI, LOCKDOWN, ECONOMY, SAFETY

~James Ramdinmawia 

Presbyterian Kohhran, Electric Veng, Aizawl chuan an Kohhran Area huam chhunga Lockdown vànga harsatna tâwk thei mai tura ngaih, Sorkar hnathawk awm lohna chhungkua, sumdawnna leh eizawnna danga dinhmun ngelnghet sà ni lo, an Kohhran mi leh Kohhran dang mi pawh thliar hrang lovin, hnam dang (Kristian leh Kristian lo) pawh huamin, chhungkaw 159 hnenah Lehkha ip mâwi a sem a. Chu Lehkha ip mâwi chuan pawisa fâi Rs. 3,000/- (Cheng Sangthum) țheuh a keng tel a ni. He Lehkha ip mâwi dawngtute tan chuan a hlu tak zet. Heng bâkah hian hmalâk tawhna dang nen kumin chhunga chhawmdawlna / țanpuina an semchhuah tawh zawng zawng hi Rs. 11.80 Lakh a ni.

Hetianga ti ve hi Kohhran dang an awm nualin ka ring. Hei hi Chanchinṭha chu a ni. Billy Graham-a'n, "The poor and the oppressed have always been very much a concern of the church... I challenge myself and those in the church to love the poor and the sick and the needy..." a tih te kha min tihrechhuak zawk mai. Total Lockdown-ah hian a tuar nasa bertu chu mirethei tê tê, Sorkar-in thutlukna a siam dâwn pawha ngaihdan thawh phâk ve lote an ni. 

Partial Lockdown leh Total Lockdown te kan han nei chho ta ngat ngat a. Kan Lal Covid-a lah chuan kìan zâi rêng a rel lo emaw tih mai turin nîtina a vei hmuhchhuah zâtin kìam zâi a rêl hlei thei lo. Mithiamte ngaihdàn chuan he natna țihbáiawm tak mipuiin kan inkàichhawn zel tur chhut chah nan leh mi tam zawk nunna humhim a nih theih nan Total Lockdown neih rih a la țûl a ni tih a ni a, a țûl rêng bawk niin a lang.

Hetih mêk lai hian ngaihtuah tèl loh theih loh chu kan Economy hi a ni. Sorkar hian khawi ațangin nge pawisa a lâkluh kan tih chuan Central Sorkar ațanga sum lo kal bâkah mipui leh sumdawngte hnen ațanga chhiah a khawn hi a ni. Sumdawnna a chawlh țhuap chuan Sorkar pawh sum leh pai-ah a pachhîat phah hle ang tih ring ila, a innghahna awmchhun chu Central Sorkar ațanga pawisa a dàwn ang ang daihzái taka hman a ni mai. Sumdawnna chàwl țhûap hian Sorkar chauh nghawng lovin sumdawngte a nghawng a, chumi-in a nghawng kal zelah chuan a tûar nâ ber ber chu sumdawnna ațanga eizawnna hniam tê tê nei ve, inhlawhfa, miretheite a ni.

City Bus, Taxi, Maxi Cab, etc. Driver te, mi dàwra thawk te, mahni sumdawnna tênâu kalpui te, nepnawi zuara khawlai fang te, nîtin inhlawhfà te, etc. hian rim taka an thawk chung pawhin cheng tam an hlawh lo tih kan hre vek. Thla hnih chhung sum lâkluh neih loh avanga tâlbûai tak tak tur vek an ni. "Chhuanchham tur kan awm a nih chuan kan inkêp thei vek alawm, tumah rilțâmin kan thi lo ang," kan ti ngawt. Ei leh in chauh a ni lo, in luah man, tui bill, electric bill, gas lâkna, chanchinbu bill, khawtlang leh pâwl thila khawntesep, etc. a awm țeuh.  Kan inkêp reng sêng lo. Chubâkah Mizopa rilru-ah chhuanchham anga in-report duh tumah an awm lo ang. Lockdown vànga harsa vak lo tura kan ngaih zingah an dinhmun han belhchhian a, "Kan chhungkua chuan mei-alh kan en tlawk tlawk mai a ni," ti tur an awm nawk ang.

Hetiang hi kan dinhmun a ni. Mahse nunna chu a hlu si. Mi tam takin hrî an kài belh a, nunna chân an pùn zel loh a țul bawk si. Kan him tlàn nân Total Lockdown chu kan han thlang leh ta phawt chu a ni a. Engtin nge Regular Income nei lo, miharsa tê tê te harsatna hi kan sutkìan tâk ang le? Kohhran hnenah kan papêk zel mai dawn em ni? 

Chief Minister Relief Fund (CMRF)-a mi inphalte thawhkhawm hi heng miretheite 'relief' nan hian kan hmang ve dawn lo em ni? Disaster Management & Rehabilitation Department hnuai-ah State Disaster Response Fund (SDRF) leh hemi-a indaih lohna a awm a nih chuan National Disaster Response Fund (NDRF) pawh a awm tak e. Disaster râpthlâk (Covid-19 Second Wave)-in min nuai mek a. Hemi avanga an nîtin thlatin sum thawhchhuah tur thawkchhuak thei lo miretheite 'relief' leh 'rehabilitate' nan he Fund hi kan hmang ve mai dawn lo'm ni? SEDP-a Rs. 400 Crore pawh hi a țûl anga pàwh pèn mai theih a ni ang. Tun dinhmunah chuan Cheng Nuaithum dàwn hi tumahin an beisei ngamin ka ring lo a, Rs. 30,000/- or Rs. 3,000/- pawh dawng se an dam khawchhuahna a nih dawn avangin an tan chuan a hlu hle ang!

Kan zir tur țhenkhat :

1. Saving : Mizote hi a nawlpuiin Financial Saving-ah kan hniam. Vai Mistiri leh Mizo Mistiri chu sum khawlkhawmah inthlau tak an ni. Hnamdang hi chu an thawkchhuak tam emaw, tlem emaw, sum an khawl thei viau. Mizote hi chuan kan thawhchhuah chhun chhun hi hmalam hun ngaihtuah lêk lo hian kan hmang ral pawp pawp mai a. Han damloh thut te, tun ang hna thawh theih loh hun a lo thlen te hian ka tâlbuai ta țhin a ni. Kei ngei pawh hi ka băng bîk lo, inenfiah ka ngâi nasa hle. Savings lam i uar thar ang u.

2. Insurance : Vaiho bawk hian Insurance an uar. Life Insurance chauh ni lo, an in leh lo te, an huan thlài te, an lirthei te, an sumdawnna te, etc. an lo insure vek zel mai a. Khûarèl chhiatna leh Accident a lo thlèn pawhin Insurance an claim a, hloh nasa lutuk lo turin an lo invêng lâwk țhin a ni. Mizote pawh hian Insurance hi i uar teh ang u. Covid vàng emaw, Covid vàng kher lo pawhin kan la thi vek dawn. Chhungkaw eizawngtu ber a thih chuan a kalsan tâk a chhungte an baihvài nghal ringawt zel. Life Insurance Policy neite erawhin chhungte baihvài lutuk lo-in an kalsan thei. Thih kher loh pawhin a Insurance-a a pawisa dah kha a mature hunah a pung țha tak nen a la let leh dawn, chu chu hmalam hun atana inhmakhùa-na țha tak a ni.

3. Private Sector tihlen : Ram changkangte changkàn chhan chu an Sorkar hausak vàng leh Policy neih mumàl vàng te, dik taka hnà an thawh vàng te a ni. Sorkar hausa chu khawi ațangin nge a hausak? A hausakna chu Private Sector sumdawnna leh thil siamchhuahna (Service and Manufacturing Industry) hlawhtling leh lian tak tak an nei a, chung Private Sector-te chuan chhiah tam tak Sorkar-ah an chhunglut a, chu chu Sorkar sum hnâr ber a ni. Mizoram State Sorkar hian Private Sector ațanga a sum hmuh ve chu beitham tak a la ni. A sum hmuhna hláwmpui chu Central Sorkar ațanga kumtin Budget min rawn pêk hi a ni. Chu chu Central Sorkar laka kutdawhna, Central Drip khâi kan tih fo chu a ni. 

Mizoram Sorkar hian Private Sector / Entrepreneur te bulțanna nasa takin pui se la, nakin lawkah Mizote ta ngei Company (Service & Manufacturing) lian tak tak a lo ding ang a. Chu'ng Company-te chuan Mizoram Sorkar sum bâwm-ah Cheng Vaibelchhe tam tak an chhung lût ruih ruih ang a. State intodelh, Central Drip khâi ringawt ni lo deuh kan lo ni tawh ang a, tun ang Covid Pandemic-ah pawh hei ai hian a che fuh leh zual thei ang. Tin, inenkawlna mumal taka din Company lian tak tak kan lo neih hunah chuan mi tam tak eizawnna an siamsak ang a. Hnathawktute pawhin Service Rules, Promotion Scheme, Medical Reimbursement, Pension Scheme (EPF, etc.) mumal tak hnuai-ah hna an thawk tawh ang. Sorkar hna inchuh vak vak ngai tawh lovin Company ațanga hamțhatna chi hrang hrang awmte'n chhungkaw tin fairel bêl a thleng tawh ang a. Mipui leh Sorkar sum dinhmun a lo káng dawrh ang, chu chu Economic Development chu a ni. Tuna kan buaina tam tak ang hi kan pumpelh thei ang.