PAHOSS BIHCHIANNA

MILEN PUI THAM PAHOSS 

- David Sailo

Aizawl lirthei tawt lutuk tih reh nana mimal inhmuna lirthei Park na tur siamna Project, Parking House Support Scheme, PAHOSS an tih mai hi sawi teh ang.

A KALPHUNG -

Thenkhat han tarlang ila. AMC huam chhunga mimal, NGO leh Local Council zingah lirthei Park na tur hmun neite sum faia tanpui a ni ber a, lirthei pakhat hun theihnaah Nuai 1 zel niin Two-Wheeler 6 hun theihna neite ah Nuai khat bawk a ni a, hun theih zat tam lamah bithliah a awm lo. Kum 30 atan lirthei Park-na ah hman ngei ngei tur a ni a, Parking Fee pawh a in neituten AMC kalphung angin an hlawkna turin an khawn thei dawn a ni.

SUM SEM A NI -

Tukin zinga Message ka dawnah chuan Zemabawk lam, Chief Minister Bial lamah chuan PAHOSS atanga sum dawng tur thenkhat ka hmu a, Kohhran pakhat tiamin mi 4 lek dawn turin Nuai 320 chuang teh meuh a ni der mai!! Sorkar sum indaih lohna en chuan uiawm a tling. Heng mite hian Nuai 40, Nuai 60, Nuai 200 te an dawng dawn a, a hlawkna pawh an tel zui zel dawn a nih hmel. NLUP, MIP te aia chânna nasa zawk a nih hmel.

TRAFFIC JAM A TIH TLEM PHAH ANGEM?

Lungbial veng hi Beraw Tlang Tourist panna kalkawng a veng lian vak lo pakhat niin an sawi a, chuta cheng pakhat chuan PAHOSS atang hian Nuai 200 a dawng dawna tarlan a ni. He Scheme ah hian lirthei pakhat lenna tawk tura hisap hi a dung 4.5m, a vang 2.5m niin Sq.m 11.25 zelin Nuai 1 an dawng thei tihna a ni. Nuai 200 dawng tur hian lirthei dahna ringawt tura sak in, Sq.m 2250 a zau a nei dawn tihna a ni a, chu chu Football Field puitling chanve hmawk tia dawna zau a ni.

Sawlai Lungbial venga hetiang zat zat sum senral ngawt mai hi Aizawl khaw chhung Jam hian kawngro a sut phah ka ring lo. Lirthei 200 a len dawn avangin Lungbial veng chhunga lirthei zawng zawng pawh dah se a la thawl viauin ka ring. Chupawh Sorkar tan hlawkna hmuh let tur awm miah lo a la ni zui!! Traffic Jam na hi a nasa lai chu Chanmary West Road Junction, Bawngkawn, Vaivakawn, Zodin Square, Zarkawt, Dawrpui etc. a ni ber a, veng hmawr lama Aizawl khawchhung lunlai Jam tih ziawm tuma sum vawm tawlh tawlh mai chuh 'Tlawng vuaka Mat dap' te pawh min hriatchhuah tir. Lungbial chu sawi loh Zemabawk lam pawh hian a rawn vaikiang pha in a rinawm loh. Mahse Bialtu an nei tha a ni maithei.

SORKAR HIAN HMA LA TAK TAK ZAWK SE -

Veng khat atang pawhin Nuai 500 chuang semral a nih rau rau chuan veng hrang hranga senral tur hmang hian Sorkar hian ram leiin a lûn lai Jam sutkian hi tum tak tak zawk se kan chhawr zawk a rinawm. Thil tak tak phêna thil lem lem tak phûm kan ching fo hian kan Goal kan thelh phah thin.

A SCHEME HI -

Mahni Sorkar Term thlir map lova kum 30 chhung atan tutu emaw kan vur tawlh tawlh thin hi thil tha lo tak a ni. Term khat lekah hian tla ta mai se, Sorkar tharin kum 5 hnu lekah a Scheme hi bansan ta sela sum dawngtute tan chuan hlep hlang, 'Huai taka' tihna tur a ni anga, mihring luah theihin an cheibawl zui anga, Sorkar in Vaibelchhe tel teh meuh a sengthlawn leh bawk ang.

RAWTNA -

A Scheme hi Sorkar mek Term chhung ang turin ruahman chhin phawt nise, tanpuina dawn tur pawh hi Sorkar tan a letleh tur awmlo a nih avangin Nuai 1 hmanga Garage pakhatna hisap chhuak tawp lo hian Matching Share anga kalpui ni bawk se. A satu leh Sorkar in an intum sem dan tur ruahman fel vek zawk sela, Parking Fee ah pawh heti teh tawp lo hian ram neitu leh Sorkar in Share siam fel bawk se. 

PAHOSS hmanna tur atan hian veng hulum lai, Traffic Jam a kan buaina lai deuh hi thlang chhuak bawk se hei ai chuan a hlawhtling ngeiin ka ring.

Source : Zoram Politic leh News (FB)