THISEN HNIAM ENKAWL

THISEN HNIAM (HYPOTENTION) ENKAWL DAN ZIR CHIANNA

THISEN   HNIAM (Hypotention)

~Dr. C. Lalrampana

A KAMKEUNA:

    Thisen sang lam hlir kan sawi uar a;  a hniamte pawh an awm ve fo avangin tun tum chu a hniam lam i han rut ve thung  dawn teh ang.

         Thisen sang (Hypertention) ep chiah chu Thisen hniam (Hypotention) tih a ni. Natna em ema chhal hleih theih loh, chhal loh hleih bawk si loh, a tuartu tana hrehawm tak si a ni.

ENG CHIN NGE  HNIAM?

       Thisen hniam hi thisen awm dan tur pangngai 120/80 mmhg aia hniama awm thin hi a ni. A tlangpuiin 90/60 mmhg achin hnuai lam hi a kawk bika ngaih a ni. Hetiang dinhmuna i awm chuan i thisen a hniam tih hrethiam thin ang che.

A  AWMZIA:

     'Hypotension' tih tawngkam hi Grik thumal "Hypo" & Latin thumal "tensio" tih phuah khawm atanga lo piang a ni. 'Hypo' chu hnuai tihna a ni a; 'tensio' tih chu 'fan/uai fual' tihna a ni.

Tichuan, 'Hypotention' tih chu Thisen hniam sawi nan hman a ni.

A CHHAN ENGE?

       Thisen hniam hi chhan hrang hrang avangin a awm thei a, chungte chu hetiang hian tarlang ila:

1. Tha khur/tha zam (nervous System) that tawk loh vang.

2.  Thazam hnathawh that theih  loh avanga rikrum leh inthawn thut dawl lohna vang.

3. Parkinson natna leh tluk thutna (stroke) avang.

4. Thisen var (white blood cell) leh  timur sen (Red blood cell) tlakchham vang.

5. Vitamin chihrang hrang thlak chham vang.

6. Ei leh in dik tawk loh vang emaw ei chhiat lutuk vang.

7. Gutkha leh ruihhlo tih nasat lutuk vang.

8. Thil kha ei tam luat vang.

9.  Tuisik thianghlim in tlem/ tlakchham luat vang.

10. Taksa hriselnain a zawh tawk baka thawhrim luattuk vang

      Heng bak pawh hi a chhan tam tak a la awm thei bawk.

A DAMDAWI:

      Thisen hniam damdawi hi a awlsam zawngin hlawm hniha ṭhen theih a ni awm e.

Chungte chu Vai damdawi (Allopathy) leh vai damdawi tel lova mahnia inenkawlna (Alternative treatment / home remedy) te a ṭhen theih a ni. Mahnia inenkawlna lam hetiang hian tarlang ila:

 

MAHNIA INENKAWLNA:

     Daktawr awm lohna hmun leh rawn hman loh thulha mahnia lo inenkawl vena atana tangkaite:

1. Tui chi al (salt water) in thin a tha a, rei tak erawh hmanzui loh tur.

2. Chini/Kurtai ei thin a tha a. Ei tam luat loh tur.

3. Grep rahro zankhuaa tuia chiah a tak ei leh a tui in a tha. Tin, grep hring/hmin  ei a tha bawk.

4. Rasgula/gulab jamun ei thin a tha.

5. Thei buhfai (pomgranet) ei thin a tha.

6. Almond leh sazupumpui thei (cashew nut) ei ṭhin a ṭha.

7. Badam ei ṭhin a ṭha a, a chhang ei pawh a tha.

8. Tambul thlum tui (carrot juice) in thin a tha.

9. Buluih chi khat (beetroot) tui in a tha.

10. Bekang bawnghnute (Soyamilk) emaw bekang chhum tui in leh a tak ei thin a tha.

11. Bete kan emaw chhum ei thin a tha.

12. Serthlum hmin tui sawrchawp in thin a tha.

13. Apple a kawr vel loha ei thin a tha. A tui sawr in pawh a tha.

14. Ar awm; Kel sa chhum/kan ei thin a tha.

15.  Mai tai hel emaw chhum/kan ei thin a tha.

16. Artui kan/ tomato nena kan pawlh ei thin a tha.

        Heng tarlan bak pawh hi thisen hniam enkawlna chi tha tak tak tam tak a la awm teuh a, tarlan sen a ni lo. A pawimawh ber chu a tuartuin a hmuh remchan theih apiang hlawhtling taka a hman theih hi a ni tih hriain a hun taka damdawi ei thin leh inenkawl thin hi mihring hriselna  vawnghimtu tha tak a ni tih i theihnghilh lo vang u.