CHINA RAM A ROPUI ZUAL!!

 CHINA RAM A ROPUI ZUAL ZEL E! – 

Familia Fanai Lalţansanga

Kan dam lai ni a tlak hma ngeia, khawvel communist ram ropui, The Union of Soviet Socialist Republics (USSR), kum 1991-a a tluchhe rup lai kan hmu hman kha thil lawmawm tak a ni a. Kan dam lai ngeia German philosopher ropui, economist, historian, sociologist, political theorist, journalist & socialist revolutionary, Karl Marx(1818-1883) ngaihthuah chhuah, Communist ideology (The Communist Manifesto leh Das Kapital) hmanga China ram hlawhtlinna par kan hmu a, a par kan tlan hman hi thil lawmawm tak a ni bawk a. Ka lawmna a thuah hnih a nih ber chu. 

Communism hmanga China ram hmasawnna thopa zuana a zuang lai hmutu ngei ka ni hi nihlawh ka inti a, vannei ka inti bawk a, mi hamţha ka va ni teh lul em! July ni 1, 2021 khan China ram ropui takah khian Chinese Communist Party (CCP) din champha kum 100-na an lawm a, an lawm ropui khawp mai. China President Xi Jinping-a’n a sawi zet mai chu, a sawi ring vak lo na a, tu pa zukhawn chang lo thu sawi ang mai mai ni lovin, a thusawi chuan khawvel a deng chhuak nghal pang mai a ni. 

President Xi Jinping chuan Modern China din thar lehna kawnga Chinese Communist Party pawimawhna a sawi a, “China ram hmasawnna hi Chinese Communist Party kutkawih liau liau a ni a, CCP leh China mipui hi thliar hran theih a ni lo. Chinese Communist Party leh China mipui kara hem thlak tumtute chu an hlawhchham zel dawn a ni,” a ti. 

“China chuan Taiwan ram nen insuihkhawm leh hi a thupui ber a ni a. China leh Taiwan insuihkhawm leh tumna, China ramin tihnghin rual loh khawpa thupuia a neih hi eng ram mahin min ngaihnepsak a thiang lo va, China mipuite hian an ram leh hnam inpumkhatna (national sovereignty and territorial integrity) hi an humhim thei a ni,” a ti bawk. 

A sawi zelnaah President Xi Jinping chuan, “Socialism chauh hian China ram hi a chhanchhuak thei a. Chinese hnam ziarang nena inmil Socialism, (only socialism with Chinese characteristics) chauh hian Chiana ram chu hma a tisawn zel dawn a ni. China ram hi tu mahin an chungtlak emaw, an hnuaichhiah emaw, an thunun emaw kan phal ngai dawn reng reng lo va. Chutianga tih tum an lo awm hlauh chuan China rama mihring 1.4 billion@ 1.4 x 1,000,000,000 te siam Kahpathir Kulh Bangin an lu kan hem ţhuai ţhuai man dawn a ni,” a ti. 

President Xi Jinping sawi “Socialism with Chinese characteristics” leh Burma ram, kum 1962 aţanga kum 1988 thleng ram thim ram rova chantirtu General Ne Win-a “Burmese Way to Socialism” ka han khaikhin a, Awi, awi, awi! Sawi teh suh, sawi teh suh! Lei leh van, thim leh êng, a dum leh a var angina an inthlau. “Socialism with Chinese characteristics” chuan China ram chu khawvel ram ropui takah a hruai thleng a. Burma rama “Burmese Way to Socialism” ve thung chuan e! Thihna, retheih pachhiatna, ţah leh haţhialna, mipui rumna a thlen a nih hi le! Thim thuah hnih chu nep tê a ni. Thim thuah sarih a zing mek a ni, Myanmar ramah khian! Awi! Ka tlak leh ta duah ţhin a, ka lei brake a fail leh ta. 

Hong Kong leh Macau chungchang a sawinaah President Xi Jinping chuan, “Hong Kong leh Macau te hian mahni thuneihna leh ro inrelna an nei sang hle a. An rama mipui thlantlin thuneitute hian 'One Country, Two Systems" principle hmangin ro an rel tur a ni,” a ti.

CHINESE COMMUNIST PARTY KUM 100 LAMTLUANG

1921 –  Chinese Communist Party din kum

Kum 1920 chho velah hian China ram chu buaina hlirin a khat a. Hmun hrang hrangah Lal an awm a, anmahniin sipai an nei a, an indo reng a. China ram pum pui ram pum khatna siam tumin Kuomintang (KMT) chuan ţan a la a, mah se a hlawhchham let der a. China ram hmar lamah ţam a tla leh ta nghal a, mi tam tak ei tur nei lovin mei alh an en a, an thi zawih zawih mai a. Chutiang boruak chhhe tak karah chuan Karl Marx leh Russian revolutionary Valdimir Lenin te ngaisangtu mi tlemte chuan khatih laia France ram colony Sanghai khawpuia in tê tak te-ah mi 13 lekin Chinese Communist Party an din ve ta thawr mai a. An thil tum: Mipui chakna hmanga rawlrala chet lak a, thuneitu paihthlak. Kum 1949 kumah Mao Zedong kaihhruai Chinese Communist Party chuan  China sorkar, Chiang Kai-Shek kaihhruai Kuomintang sorkar an paihthlak a, The People’s Republic of China an din khan an party din tirha member pahnih; Mao Zedong leh Dong Biwu te chiah an party-ah hian an tel tawh a ni. Mi dangho chu an ţilţiak vek hman. 

Kum 100 a liam hnu chuan CCP hi khawvela political party lian ber a ni a, member hi maktaduai 95 dawn lai an awm a. Chu chu China ram mihring awm zat aţanga za zela 7 (7%) an tling thuak a ni. An tamzia kan hriat chian theih nan kum 2011 India ram pum chhiarpuia Mizoram din hmun ka han tar lang zawr ang e. Mizorama mihring awm zat: 1,091,014. Kristian hi za zela 87 (87%) kan ni a, a lu nungin han chhut ta ila: 94918218 vel thuar kan ni. “Kristian zaa za awmna Mizoram,” an tih fo hi a dik lo. Mizoram state-ah hian Mizo hnama inchhal duh mi maktaduai khat kan tling lo va, Kristian pawh maktaduai khat kan tling lo bawk. 

1934: The Long March

Indo leh tlan chhiat an ţan ta a. Khatih laia China ram pum thuneihna lak tum mek Chiang-Kai-shek ho, Kuomintang (KMT) chuan Chinese Communist Party, Red Army chu rawt chimih ţhak tumin an nuai a, an um ta. An tlanchhiatna thui zawng hi km 10,000 lai a ni a. He an tlatchhiatna kawng thui namen lo takah hian Mao Zedong chu rawlrala indona kawngah leh mipui rilru hmin theih kawngah tu khaw kha han khin phak rual loh, mi dang el phak rual loh hruaitu nihna nei mihring, mi tak takm mi rintlak a nihna a lo lang ta a. Mosian thlalera Israel fate a hruai ang khan Mao Zedong hian a tirah China rama thuneitu Chiang Kai-shek a do khan mi 100,000 a hruai a. An zinga mi 75,000 lai chu ral kâp mi an ni a, a bak mi 30,000 chu ral kap mi ni lo, non-combatnat an ni a. Mao Zedong hian heng Communist party ruhkawlte hi tlang 18 lawn chhuahpuiin, luipui 24 a daikaipui a. A rang an vahvaihna zalamtluang a thui vawng vawng hle mai! Mi nuai khat lai a hruai zingah nung dama Yun’an khawpui a thlenpui chu mi 7,000 vel chauh an ni a. He khawpui aţang hian a ni, Mao Zedong chuan China ram, khawvela ram ropui ber pahnihna ni tura a rawn din thar lehna chu ni. 

1949: People’s Republic of China, ram thar a piang ta!

Khawvel Indopui II-naa khawchhak lama Japan ral lo lian thla kher kher kha Mao Zedong kaihhruai, Chinese Communist Party tan chuan malsawmna inthup (A blessing in disguise) a nihna lai a awm tlat mai. Chiang-Kai-shek-an Chinese Communist Party nuai chimih a tum mek laiin Japan ral a lo lian ta si a le! “Blood is thicker than water” an ti mathlawn lovin Japan ral do rawn nan China rama party lian pahnih thawh dun a ngai ta a ni. Kum 1945 khan Japan chu a tlawm ta a. Chiang Kaishek sorkarah eirukna a hluar nasa mai si a, indo lamah eng ual an lo ni bawk si lo va, Mao Zedong chuan China mipui rilru a hmin thei zel a, lo neittute hnenah ram leh leilet  a pek tur thu a han puan hnu phei chuan ram a la ta duai duai mai a ni. Tualchhung indonaah thisen a luang nasa hle mai a. Mao Zedong pawl an che ţha zel a, America sangawi zawnpui Kuomintang (KMT) ho an talbuai ta a, a hotupa Chiang Kai-shek hovin mei kawhin tak meuh meuhvin Taiwai an tih, thliarkar te reuh tê-ah an tlanchhe ta a ni. 

Tin, heti hi a ni a. Kum 1949 October ni 1-ah Mao Zedong chuan hnehna tumkau chawiin Beijing khawpuia Tiananmen chhip zawl, Van Thlamuanna Kawngkharpui-ah dingin, China ram thar, “People’s Republic of China” (PRC) a pian thu a puang ta a ni. 

1958: “The Great Leap Forward”

Khawvel Indopui II-na a lo tawp tak hnu khan khawvel ram hrang hrangte chuan an ram sum leh pai dinhmun siam thar lehna kawngah a bung suau suau hlawm vek a. China ramah pawh Mao Zedong chuan kum 15 chhung ngeia Great Britain ram umpha turin ‘The Great Leap Forward” thupui hmangin agrarian economy aţanga zan hnih khat thilthua industrial powerhouse han nih tum thut mai chu a karkalak a zau lutuk a, China ram a hahchhiau va, a petek a. China mipui tam zawk, huan leh leilet-a ei zawng ţhin, kahpathir siamna industry-a an han thawk thut mai chu a ngaihna an hre hlawl lo. An chal an dawm. An tukkhum an hiat an hiat ringawt mai a. China ram pumah ţam a tla ta! Kum 1959-60 mautâm ţampui mitthi-ah khan China ram puma chaw ei tur nei lova mipui thi zat hi khawvel historian ho hian an inrinsiak vel ta mai mai a ni. A ţhenin maktaduai 20 an thi an ti! A ţhen, thu basa ngam deuh chuan mitthi zat kha maktuduai 30 zawk alawm, an ti! Hmasawn chak lutuk tum manah chhiatna zakhua a tawng ta. Tun a san poh leh tlakna pawh a sang ve tur reng alawm. Thu lai la taka ziak Wikipedia chuan thi zat hi maktaduai 15 aţanga maktaduai 55 inkar a ni ang, a ti.  

1966: The Cultural Revolution

“The Great Leap Forward”, China economic policy a hlawhchham tak siah chuan Hotu Mao Zedong chuan an party chhungkaw zingah hmelma a lo ngah ta hle mai a. Amah duh lo tute leh a ngaih dan ţawmpui thei lo apiangte chu dah ţhat a, thenfai hnatlang neih a lo ţul ta thung a. Chu chu The Cultural Revolution an tih chu a ni. Mizorama ram buai lai vel khan China ramah pawh inthen faina beihpui an thlak a. Communist party chhunga pawl leh pawl bik insuatna hian hun a awh rei viau mai a. Kum 1976 khan Hotu Mao Zedong a boral khan he insuatna hi a reh ta chauh a ni. Kum 10 leh ni 143 chhunga in dah ţhat hri len vanga nunna chân zat pawh hi hriat chian theih a ni lo. An chhinchhiah dan tlangpuiah chuan mitthi zat hi sang tam tak aţanga maktaduai eng emaw zat a ni thei an ti leh thawng mai a ni. Communist ram hi chu langtlang sorkar a ni tlat lo alawm le. Cultural Revolution sawhkhawk chu na tak leh rapthlak tak a ni. Kum 1981 khan Chinese Communist Party chuan kha thil duhawm lo takzet lo thlen dan leh a nghawng a zir chiang a, “Communist China ram hun tawng zingah kha thil thleng, Cultural Revolution khan Communist Party leh China ram pum leh China mipuite tan tuarna rapthlak tawpkhawk a thlentir a ni,” tiin thuchhuah (resolution) an siam hial a ni. 

1979: Reform and Opening Up

Khawvel ram rethei zinga ta rawn tho chhuak a, khawvela ram ropui leh ram hausa lo ni thei tura China ram hmasawnna hnuk rawn siamtu dik tak chu Deng Xiaoping a ni. A pa tê na vang vangin hmathlir (Vision) a lo nei ţha êm a ni.  Mao Zedong boral hnu khan China ram Communist Party a fawng chelhtu chu Hua Goufeng a ni a. Kar lovah Deng Xiaoping chuan Hua Goufeng chu a rawn lehthal a, Deng Xiaoping chu Communist party chairman a nih veleh party thuneitute zingah a dinhmun a sawh nghet sauh sauh va. Chutah le, Ram hnuk khawih pha siam tharna leh inkharkhip bansana khawvel ram dangte nen inpawh taka insumdawn tawnna, “Reform and Opening Up” bul a rawn ţan ta chiah mai chu, Palian mu hil a ţhangharh ta a, China ramah khua a var a, kawl a êng ta. Hei hi kum 1979 a ni a. China ram hmasawnna kawnga rahbi pawimawh, chhinchhiah tlak kum a lo ni ta.  He “Reform and Opening Up” hi ram pum huapa political party pakhat chauh hnuaia inrelbawlna kalpui reng chung si a, sumdawnna kawngah leh mimal zalenna kawngah sorkar khuahkhirhna thlah dul hret hret enchhina a ni ber a. He ruahhmanna thar hi China ram kalphung a her danglam ta bawih a, strict planned economy aţangin capitalism kalphung rimnanah a hlangkai ta dawrh a ni. Lo neitute leh leilet neituten anmahni thlai thar leh buh thar an ei sen lohte an hralh thei ta. Sum leh pai peipun lama chemkalna nei bik te leh sumdawnna lama a ngaihna hria, entrepreneur ten sumdawnna (business) bul an ţan thei ta. China sorkar chuan heng sumdawn thiam mite tan special economic zone a siamsak a, khawvel pum huapa zalen taka an sumdawn theih (free trade) nan hma a lakpui ta bawk a. 

“It doesn’t matter whether the cat is black or white, so long as it catches mice,” – Deng Xiaoping

1989: The Tiananmen Square Massacre

China ramah capitalism kalphunga sumdawnna kalpui (economic liberalization) a nih hnuah hmasawnna chu a zuanin a zuang tak meuh meuh va. China rama mi nawlpui an lo hausa ta thur thur a. Mipuiin zalenna famkim an duh a. An ram inrelbawlna kawngah Communist Party in thuneihna a la nei zau hle si a. Hmasawn thutna hian eirukna leh hlemhleatna a hring chhuak nasa ve bawk a. 

Kum 1989 April ni 1-ah khan China rama democracy ngiattu zinga mi lar tak leh mi challang tak a boral a. He pa thihna denchhan hian mipui chuan democracy ngiatin China sorkar lakah lungawi lohna an lantir a. Beijing khawpuia Tiananmen Square-ah mipui a maka maka tam an pungkhawm ta chiang mai a. Chuti khawpa tam mipui pungkhawm chu China Communist sorkar hruaitute chuan eng tin tak ti ang maw? tiin thaw dep dep chungin khawvelin  a thlir ţhuap mai a. Chutah le, May ni 20 a lo thleng a. China sorkar chuan martial law a puah hnan ta rup mai a. Sorkar dan zawm duh lo mipui pungkhawm chu a pawngpawrh tial tial a, Tiananmen Square-ah chuan an inkulh tlat a. June ni 4 a lo thleng ta. China sipaite chuan Tiananmen Square-a mipui pungkhawm chu an kap ta. China sorkar thuchhuakin a tarlan dan chuan mitthi zat hi 241 a ni. Khawvel ram ropui zawng zawng deuhtawin China sorkar an dem luai luai a. An insumdawn tawnna chu a pangngai reng tho va. Hemi hnu hian China sorkar chuan economic liberalization chu chak lehzualin, vung takin a kalpui chho ta a ni.

2001: China joins WTO

China chu thil siam thar leh dehchhuah kawngah hma a sawn chak hle a. Mutan pakhat a la nei. A ram chhunga industry tam taka a thil dehchhuahte chu hralh zung zungna a la nei rih tlat lo. Engvang nge tih chuan; China hian World Trade Organization (WTO) pawl a la zawm loh vang a ni. 

World Trade Organization zawm tur hian kum 15 an indawr a. Barack Obama US President a nih lai kha China a duhsak vangin China ram ropui tak, thil dehchhuah ngah lutuk tak ram chu World Trade Organization member a lo ni ve ta hlawl mai a. Pheichham a man a ni ber mai. Kum 2001 December thla khan China ram chu WTO member a lo ni ta a, a sumdawnna a kaltluang ta hle mai a. China ram GDP chu 8.7% in a pung nghal pang mai a. Kum 2007 phei kha chuan, ngai teh, China annual GDP pung chu 15% dawn lai a ni ta mai. Zep thu a cheng lo! China ram sum dehchhuah hnemzia hi Mizopa hisapin a chhut pha ţhaţhum ta meuh lo achha chu ni e. 

2008: The Beijing Olympics

Kum 2008 khan China chuan Beijing khawpuiah Summer Olympic Games a dawl a. Olympic Games neih tawha zawnga sum leh pai insenzo tamna ber a ni a. Olympic Games azawngah a ropui lawt lak âwm e. China chuan khawvel mit hmuhah a ram ropuizia a pho lang thei a. Communist Party tan hlawhtlinna ropui a tling tak meuh meuh bawk a ni. Kha Beijing Olympic Games atana China sorkar inbuatsaih dan aţang khan China ram hi a lo hausa tak zet a, sum leh pai mai ni lovin, thiamna lamah pawh a duai bil lo va, khawthlang ram ropuite, western power ngheng lo pawhin amahin a khawsa thei a, ama kein a ding thei tawh a, khawvel ram ropui berte zingah a inhlangkai tawh a ni tih a lantir thei ta a ni. 

Ram pakhata thuneitu party pakhat kaihhruaina, non-liberal political system hnuaiah hian a ram mipuiten zalen takin sumdawnna hlawhtling an kalpui thei em? China rama Party thuneituten an thuneihna hloh phah emaw, chan phah emaw si lovin mimal leh pawl hrang hrangte sumdawnna hlawhtlina zar chu an zo tak tak thei ang em? tih zawhna chu Beijing Summer Olympic Games-ah khan chhanin a awm a. A theih ngei a ni tih khawvel hriatah an puang chhuak thei ta a ni. 

2012: Xi Jinping takes power

Kum 2012 November ni 15-a Xi Jinping hi General Secretary of the Communist Party a lo nih khan khawvel mi ropuiten a mizia tur an lo inrinsiak nasa a. US Secretary of State Hillary Clinton chuan Xi Jinping chu liberal reformer a nih a rinthu a lo sawi a. Singapore ram, thliarkar te tak te, nawhchizuar veng ang leka an ngaih, ram thianghlim leh ram intodelh, leh ram changkang taka siamtu Singapore Prime Minister hlui Lee Kuan Yew chuan Xi Jinping, hmana China ram Communist Party Vice Premier lo ni tawh fapa hi Nelson Mandela te anga mi chak, mi tumruh, mi sehhel a nih a rinthu a sawi bawk a ni. Kum 2013 khan President a lo ni ta a. Chinese Communist Party din ţan tirh aţanga thuneihna hum hnem ber hotu a lo ni ta a ni. China rama thuneitu ber a nih aţangin China ram chu kawng engkimah hma a sawn chak lehzual ta em em ringawt mai a. Tun ang zela hma an sawn chuan kum 2028-ah chuan sum leh pai dehchhuah hnem lam, economy-ah khawvela ram ropui ber America an tluk thuak ang a. Kum 2031-ah phei chuan America ram hi economy-ah an khum thei hial dawn ta a ni. 

2021: Kum 100 dang atan

German mi nunrawng Adolf Hitler khan German ram kha kum sang Lalram, Tausendjahriges Reich din a tum a, mahse a hlawhchham let der a. Chinese Communist Party hian China ramah kum 100 hmel a lo hmu ta a, President Xi Jinping, mi chak, naupan tet aţanga Communist ideology thisena ţhanhnan tlat, Communist ideology ngei hi China hnam himna kulhpui mai ni lovin hnam pum huapa zawhzazo thangchhuahpa diar khim theihna a ni tih a hre chiang a. Thu  (Communist political ideology) chu tisaah a chantir (fully implemented and mission accomplished) thei ta hi ropui ka ti thlawt a ni. Mi hlim chu ni ila, Hallelujah vawi sarih ka pe ang.  Chinese Communist Party hi maurua anga tuai thartir zelin kum 100 dang thuneihna a la chelhtir thei ang em? A rana rana lo, hunin a lo rawn hril mai ang ti ila, Zawlnei der nih kan pumpelh ang a, a finthlak zawk bawk ang. 

Tin, ngai teh, heti hi a ni a. Zawlnei ropui Isaia ziak, “Thuhnuairawlhte hnenah chanchin ţha hril tura LALPAN  hriak mi thih avangin Lalpa PATHIAN thlarau chu ka chungah a awm; ani chuan, thinlung lungchhiate tuam tur te, salte hnena chhuahna thu leh mi tângte hnena tân in hawnna thu sawi tur te, LALPA lungawi kum thu leh kan Pathian phuba lak ni thu sawi tur te, lungngai zawng zawng thlamuan tur te, vut aiah pangpar ţhihrui te, lungngaih aiah hlimna hriak te, nguina thlarau aiah fakna silhfen te an hnena pekah Zion-a lungngaia awmte tan ruat tur tein mi tir a ni: ani chu chawimawia a awmna turin, felna thing, LALPA  phunte, tih an nih theih nan,” tih chang ka chhiar zawh hnu hian China ram, khati khawpa rethei, Kumpinu-in a duhtawka a sawp hnu, Japan ralin kum tam a sawp hrep hnu, America ram ropui finna leh chakna tinreng nen CIA hmanga tihchhiat a tum ram chuan Communism thuthlung avangin khawvel ram ropui tak a lo ni ta a, a ram mipui tam tak chu nuamsa takin, zahawm takin anmahni tui zawng ţheuh ti theiin an lo khawsa thei ta hi a ropui ka ti hle mai a, “Hei ngei hi a nih hi Integral mission chu,” tia ka ngaihtuah lai mekin ka lo chhing sek a, mumang ka nei zui hi a lo ni a.  

Ka mumangah chuan Pathian Ram kawtchhuahah Chinese Communist hotu ropui pahnih, Mao Zedong leh Deng Xiaoping te ka hmu tlat mai!

cp/paste.