HIMANTA BISWA SARMA HI TUNGE?

Assam CM Himanta Biswa Sarma laka Mizoram fimkhur nan he thu hi ka hlan e.

Bih chianna :

Dr HIMANTA BISWA SARMA

Vanlalhuma Kawlni

Sailulâk

TUNGE HIMANTA 

Himanta Biswa, Assam CM

Assam Chief Minister ni mek, Himanta Biswa Sarma hi 1st Jan 1969 ah Jorhat ah piangin  Bengali hnam niin eng hunlai leh khawi hmun a tanga Assam hi rawn luhru nge an nih hriat maitheih a ni tawhlo.

Mi vengva pangngai tak niin lehkha pawh a thiam thawkhat hle a, Guwahati University hnuai a tanga MA (Pol Sc) Phd & LLB a ni. Kum 1996 --2015 chhung INC ah awmin, kum 2001 ah Jalukbari a tangin MLA a tlinga, tun term thleng hian vawinga a bial ngaiah thlan tlin tawh a ni. Assam Congress vanglai nang chhovin Cabinet Minister (Health, Finance, PWD) te chang tawh a ni. Kum 2014/15 chho khan hmingchhiatna nasa tak neiin inhumhimnan BJP a zawma Cabinet Minister nih chhunzawmin NEDA Chairman ah dah a ni bawk. Nikum inthlan khan tling leh in Sonowala luahlan in CM a ni ta a ni.

Kum 1985 chho a, AASU movement lai khan Himanta hi Higher Secondary zirlai chauh a la ni. Tuna AGP hruaitu Praffula Kumar Mahanta leh Atul Bora  te kaihhruai AASU ten Assam state a tanga Bengali leh Bangladeshi Hindu / muslim te hnawhchhuah leh thawnhaw an tumna kha Central Congress  sawrkar khan tihpuitlin sak se chuan, Vawiin hian CM a tan hnamdang (Mulëk CM) an neilo anga, Mizoram chhunga Assam inlulinna pawh hi a thleng kher in a rinawm loh 

HIMANTA POLITICS

Himanta chungchang hi sawi tur tamtak awm mah se, tunhnai thil chauh sawi tum ta ila -

Kum 2018 Mizoram inthlanpui vil tur khan Central BJP khan Mizoram  Election incharge a tan an ruat a, Mizoram BJP Candidate ho hnenah chuan hetiang hian a sawi a. 

India rama INC in kum 60 chuang ro a rel chhung hian, retheihna leh corruption a hluar em em a, India chu khawvel ramdangte nuihzabur a ni. BJP a sawrkar hnu hian India chu khawvel ramdangte zah leh ngaihven niin, Nuclear power nei ram a ni ta bawk. India Economy chu hmuh theiha ṭhangin khawvel ram thangchak ber zinga mi a ni ta. Hei hi India mipui hian hre chiangin BJP hi sawrkar tir zel an duh a, a lo berah kum 30/40 hi chu a sawrkar ngei ngei dawn a ni_ Mizoramah pawh nasa takin tunhnaiah hmasawnna hmuh tur a awm a, Tun inthlanah hian a mala sawrkar siamtu kan nih loh pawhin BJP kaihhruai sawrkar chu a ding dawn hrim hrim a, MLA kan nei a nih phawt chuan sawrkar ah kan tel dawn chiang a ni. Kan tel lovin tuman sawrkar an siam dawn lo, tiin.

Khi thu ti awihawm tur khian Mualpui hmunah State Level BJP Workers Meet koh a ni ta a, R Dengthuama Hall (chung leh hnuai) khat vek leh kawtzawl zawng zawng khat in mipui an pungkhawm a, Union Home Minister leh BJP President Pu Amit Shah chuan ropui a ti ve deuh nge, Kum 2018 christmass chu Mizoram in BJP sawrkar hnuaiah a hmang dawn tia puangin, Mizoram BJP President Dr JV Hluna chu MLA bial zawng zawnga Candidate dah turin a hrilh zui ta a ni.

MI PHAKAR, HIMANTA

Mizoram BJP chuan, bial zawng zawnga Candidate dah tur chuan ruahmanna a siam ta, mahse hun a tepter tawh a vangin Aizawl South bial pakhat chu an Candidate inhnuhdawh a vangin an hnawhkhat zo ta lova, bial 39 ah Candidate an siam ta a ni.

BJP Candidate 39 te hnenah chuan Himanta chuan, Theihtawp chhuaha puih an ngaihna a pianga puih an nih tur thute, tling ngei tura ṭang tura fuih in, Campaign fund pawh  lungngaih tur a awm lo. Winning chance an nei a nih ngat chuan, (tunlai Covid dona sum ang deuh hian)  limit a awm lovang tia sawiin kut an beng dar dar a ni awm e.

Inthlan Campaign a kal chhova, Candidate ten, "Party puihna ring lovin anmahni in theihtawp an chhuah phawt tur a ni, an hmasawn dan mil zelin party in fund a pe ang" a han ti leh ta rih a. Khatih lai BJP khan Mizoram chhim bial leh Khawthlang lam chu engemawzat an la mai awm mange tih a nih hman nghe nghe.  Ti chuan Campaign fund chu remchem takin 1st & 2nd installment te te in Candidate A/C ah dahluh bek bek a ni ta a. Chutih mek lai chuan, Hnam hnatlang chuan CAB issue ah BJP chu a tinzawnin mipuiin an kawh rawn chho ta hlauh mai a. BJP Candidate ho in an sum an hmangzo tawh si, party fund lah a beitham si, an buai takzet hlawm.

Himanta chuan thil awmzia a man thuai a, BJP thupui chu - India ram a tanga Congress umbo a nih zulzuii ko thlak a tum ta. Mizorama Congress paihthla thei ber chu MNF a ni tih chu hrilhnawn a ngai lo chiang hle. Ti chuan a party phatsan in, a hmingṭhat zawkna tur NDA partner MNF lam chu veikhawr lo takin a hawisan ta a ni. Ti chuan, BJP Candidate ho final installment tur sum thahnem tak chu Central BJP hmingin MNF party a pe ta a. BJP an rum a, MNF an zuang thung. He mi chungchang hi tu dang hriat ve phak a nih loh avangin, Himanta hian Sum tam tham fe chu a sen ngei rin a ni. Hetiang a nih avang hian BJP Candidate zinga a tam zawk chu election zawh rualin leiba rulh ngaiin an awm phah ta a ni.

MISUAL HIMANTA

1.  Hetiang a nih avang hian, BJP Mizoram Pradesh President thar Pu Vanlalhmuaka nen pawh party khat ni chungin an inmil loh phah hle.

 Himanta hian Mizoram State Election ah khan, Mizoram BJP te chu a ma ṭanghma vangin a lo phatsan tawh a, Mizoram pawh a lo kal nawn tawh lo. Khami ṭum khan MBJP hi phatsan lo se chuan, MNF hi a  sawrkar phalo deuh maithei a, BJP pawh hian MLA 3 vel a neiin tun ai hian an dinhmun pawh a ṭhat zawk fe a rinawm.

2.  Himanta hi Bengali hnam tih takah thil ngaihtuah thiam tak a ni. INC MLA a nih kumin Assamese nula chhuanawm tak Miss Riniki Bhuyan Sarma chu nupui ah neiin Assamese zingah a tlangtla chho hle a. A nupui hi lehkhathiam leh hawiharh tak a lo nih bawk a vangin NE live TV channel te dinin tunah chuan Assam mi challang chhungkua an lo ni ta.

3.  Kumin Assam Gen Election khan BJP chuan, Hindu chhungkua in/ hmun neilo tan inhmun nuaihkhat pek a tiam a. Assam hi ram zau tak angin lang mah se, mihring nuai 140 vel chenna a nih a vangin mihring chenna tur hmunhim a tam viau tawh lova,  hmun leh ram neilo zingah Assamese aiin Bangladesh aṭanga Hindu lo lutte (CAA chhawr thei tur) an tam uchuak hle. Hengho hian Mizoram hnaih Cachar, Hailakandi leh Karimganj District an bawh ber avangin, tun hnaia ramri (border conflict between Assam & Mizoram) buaina pawh hi lo irh chhuak a ni. Assam CM hian Mizoram chhung anga kan ngaih ṭhin, Assam forest ho enkawl chhungah hian heng a hnampui hote hi hmun pek a tum tih hi rinhlelh rual a ni lo.

Assam CM hian an election manifesto chu in ziahṭhat siak ngawt lovin tih hlawhtlin a tum hle a, heng thuah hi chuan entawn tlak tak a ni thung awm e. 

Heti hian sawi teh ang - Himanta CM aṭanga reilote hnua Mizoramin buaina kan tawh zozai hi a tam ta hle mai. Assam feeling chawk  thoa rawn bei thei a nihna hi mi fing a nihzia lantirtu a ni bawk. He thil a chianna chu Ai-tlang, Chuhvel leh Buarchep  lamah kan hmu tawh a,  26 july 2021 khan Vairengte lamah kan hmu leh bawk. Vai sipai dawih tak tak leh Civil mite khan Mizo huatna thlarau an chang chhah hle tih an chet dan aṭang khan a hriat a, heng thil zawng zawng hi Himanta thluak aṭanga chhuak vek an ni bawk. 

He thil ah hian, a hmalakna a hlawhchham dawn pawha a anpui (alternative road/solution) hmu zat zat thei a nih thin avangin, Himanta hi ngaihṭha taka en liam mai chi a nilo tih a chiang. (Mizoram election ngaihtuah let  ila)  A tum tihhlawhtlin nan tih hreh reng a neilo tih kan hriat a pawimawh hle.

4.   Himanta hian 27 july plan kha a siam fuh hle tih a lang. Sipai 200 chuang kha Pathian remruatna vanga umkir thei kan nih chauh kha hria ila. A plan hlawhchham chhan chu, hmuhsitna rilru chapo pui chunga an huaisennain a tlinlo kha a ni. Plan ang khan hlawhtling ta se, sipai   200 rual khan Camp siamin Vairengte dai khu ṭhutchilh ta se, umchhuah an harsa tawh hle ang. Hmun dangah ti zelin kan tawlh zel a nih phei chuan duhtawk in inhmun chu a sem tawh mai dawn a ni. Mizoram min beihna chhan kha, forest reseve encroachment awm vang leh Assam Constitutional boundary humhim tih lam a hmatheh hlauh a nih kha. Mizoten kan hriatthiam ṭhin loh lam, India Constitution leh Forest Conservation (Act 1922) lam a rawn hmatheh kha, silai hmanga chinfel a ni ta hlauh kha kan vannei rih chauh a ni.

Himanta thusawi kha in lo chhinchhiah em? Nagaland leh Arunachal ramri chu Court lam thu a ni a, Meghalaya nen chuan reilote ah chinfel a nih a beisei a, Mizoram erawh hun a la duh rei a rinthu a sawi a nih kha. Hun la duh deuh tura a ngaih nachhan hi enge ni ta ang le? 

Ramri chinfel a tih hi, Assam in ILRF (Assam enkawl)  a pumbilh hun tur sawina a nih hmel a,  Mizoram hian kan dodal ve hlek turah ngaiin hun tlem mamawh turah a ngai a nih a rinawm. 

Tunah hian, Ramri lamah Assam police tha Commando 3000 deploy an tum thu leh Supreme Court lama kal a tum thute a la sawi zel a, state dangin Mizoram min dem theih nan LMG hmanga Assam police te kaphlum bik ang (anni paw'n an hmang tho) ten min puh a, Assam police kaphlumtu hrilh thei hnena 5 lakh pek te leh Mizoram MP (RS)  man tura Police CID Delhi lama tirh an nih thu nen thu te sawiin, tuna ILRF ah hian Mizoram in Myanmar  raltlan dah a tum etc etc tih zawng ten thu a vaivir nasa hle tih kan hria. Heng thil zawng zawng hi Himanta game vek niin, Assam mi dik tak a nih loh vanga politics lama a dinhmun sawhngheh nan Assam hmangaihtu, party election manifesto ti hlawhtlingtu anga hmingthat khum tumna vek a ni. A rilru hi  Amah a nuih theih phawt chuan, midang chu engtiang pawhin awm se, pawitihna a nei lo mi a ni.

5.  Tichuan Assam chuan, an CM rilru ang zel in, Kan ei bar lakluhna kawtchhuah an nih hriain, Rail kawngte ti chhia in National Highway 306 te an dang ping ta a, hetih lai hian Mizoram Supply Minister chuan Mizoram thla hnih ei buhfai kan neih mek thu sawiin, mipuite lungngailo turin min hnem a, i ringtawk ang u. 

Tunah chuan, sawrkar kan duhkhawp lo deuh a nih pawhin insum ila,  sawrkar in ramri ah sipai tamtak a tirh liam avangin, tualchhungah lo in control ila, buaina dang insiam belh lovang u. Ṭanrual hun a ni e.

Assam hian min repchâr in engmah lalut theilo mah ila, ṭumah rilâmin kan thi lovang. State dang aṭangin kan nunna khawp chu kan hmu em em ang. Tin, National Highway leh Rel kawngte hi Central sawrkar enkawl a nih a vangin rei tak block theih a ni lo. Kan dinhmun hi uanpui tham ni lo mah se mangang chiam lo ang u. Central sawrkar hian thlakhat hnu pawha kawngpui a ti tlang theilo a nih chuan, ngaihtuahna thar kan la siam hlawm dawn nia.

Hripui leng kar ah, theihtawpin nun fimkhur ila, Sawrkar tihbuai belhchhah lo thei ang ber turin hri kai darh loh te pawh tum tlang chungin, kan nunphung ti zangkhai ila, ṭul tawp ah chauh lirthei te pawh hmangin oil thlengin inrenchem ang u. Hun khirh kan tawn fo nachhan erawh hre chiang chungin rilru fim hmang ila, Hetiang ram tha nei chunga kan intodelhlo te pawh hi pawitih nachang hria in harhchhuak ang u hmiang.

Intih changkanna hi uar chintawk nei ila, hriselna leh inpawh tlanna hi ngaihpawimawh ber ah neiin Mizo nun zangkhai leh nuam tak vawngnung a Pathian ṭih chungin he lei hringnun hi Mizo tak in dinthar leh hlauh teh ang u. 

Mizoram dam reng rawhse  

Chawngphûl Sih Sawm  ✍️  237