I LO POSITIVE A NIH CHUAN

 I LO POSITIVE A NIH CHUAN..

- Lala Chawngthu

 Vawiin leh tunkar chho kan khua chu, Covid-19 avangin kan buai chho ta hle mai a, engtin nge kan hmachhawn zel ang le..

 Hri kai bik te tan a fuihna tlem, kan lo tawn ve nial tawh avangin han thailan ve mai mai ka duh deuh va. Kan Positive tih han hriat chuan, kan ni thei reng tih hrereng chungin Patling pawh na em em nei lemlo chung pawhin min ti ngui ve ruai thei mai.

Tin, hmanlaia phar natna ang deuh roh in, a hmalawka kan bula thlamuang taka awm ṭhin te pawhin kawngkhar phen aṭangin min bih dêk dêk ngam chauh tawh mai a, kan bul vel ami te laka inthlahrunna in min chenchilh nghal bawk nen, hringnun hi a chawhnu ruih hian a hriat mai a. Mahse heng zawng zawng hian min ti nguaiin hlauhthawnna min neih tir lo se. Hlauhthawnna hi he hri ti hlauhawmtu leh mihringa pawi-khawihtu lian tak pakhat a niin ka hria. Chuvangin he hri hian inchhungkua a lo luh chilh ve palh ta anih pawhin, chi-ai viauna chhan tur a awm lemlo. Malaria i vei a, khawsik i nei ṭhin ang khan khawsik ilo nei a nih pawhin a nihdan tur a ni tih kha hre mai la, i hrawk alo na ta a nih pawhin a reh ve leh mai ang. Tin, i ṭhiante leh chhungkhat laina hmun dang ami leh tualchhung ami ten na deuh tak ni tura an rawn ngai che a nih pawhin, a dan turah khan lo ngai ve phawt la. I bul vela khawsa ve ho zawng zawng pawh khan chutiang chu an lo tuar ve vek tawh a nia.

Tin, hei hi ka chah duh che, Chaw ei ṭha la, Dr. leh nurse te thuawih la, thlaphang lovin, i bula mi te nen inhnaih lo thei ang bera khawsak kha lo zir la. Mutna ah pawh Mask vuah la, Toilet i kal zawhin i ka leh hnar vel i khawih hmain Sanitiser in i kut tifai ṭhin la. A him chinah midangte thlamuantu leh puitu nih tum hram la, Pathian hnenah midangte tan ṭawngṭai ṭhin la, hlim tak leh dam takin ilo chhuak dawn nia. 

Pathianin a awmpui reng che tih hi theihnghilh lo hram ang che..🙏🏻🙏🏻