10 YEARS CHALLENGE

(Whatsapp khawlaia ka chhar a ni. Hmân deuh ah ka chhiar tawh a, țha ka ti em a, ka chhiar nawn leh a.. lo chhiar ve teh u, A ziaktu hi Ziona Zahau a ni em ka hre law...)

Kan lui kal haw chu man hnem inti takin ka motor neih ve chhun Santro xing, ka chhuan ve em em maiah chuan kan bungrua te dahin kan lut sawk sawk a. Kan haw chu a ni ta mai a. Kumin kan khaw ho lo neihna tur di hmun zau kan tih mai chu kan thleng chho a. Mual hnih lai di hmun zauah chuan kan kal hman tihah chuan ka motor chu a rum hum hum a, a inpawt kal zo ta tlat lo mai a. Kan chhuk a kan han enchiang a. A tluang hrui chu a lo chat der mai a lo ni a. Ka hriatthiam dan chuan a tluang hrui ka tih hi a engine sirah awmin a dynamo leh engine khawl a bat tawn a. A pawt virtu ber ni hian ka hria a. Hmanrua nei ila, thiam ve bawk ila chu thlak har tur pawh a nilo. Tih ngaihna dang a awm silo a. Ke-in kan haw ta tawp a. A chauh thlak ngei mai. Kan kalna lam hi link road a nih avangin motor dang beisei tur a awmloh avanga kea haw ta kan ni.

Khua kan thlen chuan a thim tawh hle a. Ka inbuala ka mu nghal a. A tuk khua a lo var chuan ka motor siam tur chuan kan khaw mechanic ho chu ka be kual ta nghal a. Tu amah chuan hman an lo inti lo a. Tin khaw pawn kal dawn chuan Km zat a zirin an lo inchhiar ve a lo ni a. Km khatah cheng 100 zel an lo bill a. Ka motor chu Km 12 vel laia hla a chhia a nih avangin cheng 1200 sen thlawn chu ka duh bik si lova. Mechanic ho thil tih dan chu ka lawm lo ru ang reng hle mai. 

Hetiang a mahni theih lam lam a induh kan ching dawn a nih chuan an chhiat tawh hunah te, electoral roll lam kaih hnawih a buaina an neih hunah te lo induh khum ve mai tur a nih hi ka ti rilru rauh rauh a. Kei hi YMA hruaitu kum hlun ka nih avangin chhiat tawh leh khawtlang buainaah hi chuan roreltu leh phusa ber zing a mi ka nih avang leh sawrkar hnathawk ka nih avanga sawrkarin BLO a min rawn dah avangin ka theih ve-na zawnga han induh khum ve mai chakna rilru ka nei ve thut a ni.

Vawiinah motor chu kan zuk siamloh chuan naktukah vahchap kha an hal mai tawh dawn a. Ka motor kha meiin a hliau pha hrim hrim dawn a. Mei hliau phak lohnaah dah thei ila chu hmanhmawh pawh a ngai lo tur. Mahse meiin a hliau pha dawn tlat a, chuvang chuan siam vat vat ngai a ni. Ka mechanic hmelhriat leh pangngai deuh a ka ngaihho ka pan zo tawh a. Tumahin ramhnuaia motor siam a kal chu hman an inti lova. Ka harsatna ka sawi pawhin kei ai mahin chhuanlam mawi hnai zawk siamin min hnar fithla țhak hlawm a. Min hnar lo ber lahin sum a phut tam si a. Thaw a ipik duh ngei mai. Mechanic pan loh pakhat ka la nei a. Chu erawh ka pan chak vaklo. Ka ngaisang lemlo a. Motor a siamthiam tak tak pawh ka ring lemlo. Mahse mi chuan an fak hle tih ka hria. Amah chu tlangval kum 20 mi vel a ni a. A naupan tet atanga ka hriat țhan a ni a. Ka hriat dan erawh a lawmawm lem loh. 

Amah chu Beiseia a ni a. A tawp ber atan ka va pan ta nge nge a. A ni chuan nui sangin min lo chhawn a. Ka harsatna te ka sawi chuan chhun lama khawih tur nei nual mahse ka motor chu ka hunna hmuna hun reng rem lo a ni tih hrethiam takin leh ka mangan leh harsat zia hrethiam takin "chaw eikhamah kan zuk siam dawn a nia, chhunah kan haw leh hman ang. Customer dang hi chu i harsatna hi ka sawi anga an hrethiam ve mai ang" a ti ta sawk sawk mai a. Chuti em em a inhuam ta leh biak nuam ta chu a lakah ka nem ta em em mai a. Mechanic dang angin kal man km 1-ah cheng 100 pawh demand se pek chu na ka ti ta reng reng lo. Siam man ngai zat tur awm ka han zawh chuan "kan siam phawt anga a hriat ang chu" a ti a. "Km 12 vel a nia. Kal man te engzah nge ni ang" tia ka zawh nawn leh chuan "i bike in kan kal ang a, kal man a ngai nang" a ti fel leh than mai a. Keimah chu ka inthlahrung ta hial zawk a.

Beiseia nen chuan chaw eikhamah ka motor awmna lam chu kan pan a. Kal kawngah chuan a titi thla siam siam a. A la naupang bawk a, a tawng duhin sawi tur a hre reuh khawp mai. Tin a rilru a tha tih a tawngkam leh chezia atang chuan a hriat em em mai a. Kei erawhin nuamlo ka ti ru veng veng a. Mahni insitna leh inchhirna te, Beiseia zahna te chuan ka khat a.

Motor chu a siam a. Rei pawh khawih lo in a part kan ken chu a thlak thei vat mai a. A khawih zawh chuan "engzah nge ngai dawn?" ka han ti a. A ni chuan "hetiang chu 300 in kan siam thin a" inthlahrung deuh tak hian a han ti a. Ka rin ai a tlawm avang chuan "300 a!" tiin mak ti deuh maiin ka han zawt tha a. Lu bu nghut pahin "aw" a ti thawp sat a. "Kal man te chu a ngai lo tak tak em ni" ka han ti leh a. Ani chuan "ngai lo, ka nuin he hna zir tura min tirh lai hian 'nakinah midang tanpuinan te ila hmang anga, pawisa lakluh paha mi tanpui theih chu a tha dawn em asin' ti a min zirtir a ni a. Keini tan chuan hetiang hna lo chu midang tanpui theihna tur kan zir pha ve silo a. Hetiang te te bak hian mi kan tanpui ve thei silo a. Chuvang chuan a rate pangngai chauh hi ka la ang e" tiin min chhang a. Chu a nu zirtirna chuan ka thinlung a ti na a. Thiltha ti nia ka lo inhriat a, ka chapona te kha paih thlak vekin a awm ta a.

Kum sawm kal ta khan YMA hruaitu ka nih tantirh lam a ni a. Ka tha a la za in mihring lamah pawh ka that vanglai tak a ni a. Lehkha ka zir chhuah na a la rei lovin dik duh em em mihring ka ni bawk a. Chutih lai chuan Beiseia te chu naupang te an la ni a. Hmeithai zu zuar fa a ni. A nu chu zu zuar lar a ni a. Kei ni zu do pawl kan nih avangin an in chu zu check in kan tlawh awllo a. Beiseia te unau 4 chu zu zuar chung chuan a enkawl a. Beisei a pa hian nupui dang a neih san niin an sawi a. A pa lam hi ka hriat pui vak lo. Chutia a zu kan man sak tak zauh zauhah chuan warning te pein zuar tawhlo turin kan ti fo a. Mahse atan eizawnna dang a vang hle ang tih kan ngaihtuah pui lemlo. Khawtlang thatna duhtu kan nia, zu kha zuar tawh lo se tih kha kan duhthusam a ni a, chu zawng chu kan ngaihtuah. A ni leh a fate 4 in enkawlna tur kha kan ngaihtuah pui leh zel ngaiah kan ruat lem lo. 

Warning kan pek fo hnuah nikhat chu chhunah an in kan check leh a. Kan rinhlelh ang ngeiin zu litre 10 lai mai kan man sak leh ta a. Hruaitu chak tak nih duh tih takah khawngaihna lan tir ka tum lo khawp mai. Amah chu an in atang kan hnuk chhuak a. A tap feih feih a. Engtin nge kan tih dawn a ngaihtuah a ni ngei ang a mitmengah chuan thlaphanna ka hmu a. Mahse ka khawngaih lem lo. Pawnah chuan tlangval sa hawk hmawlha lo vaw tawk an awm a, na a ti ngei mai. Keipawh chuan a hmaiah chiang zetin ka beng a, leiah a tlu hnawk a. Ka ben nat zia leh ka rorumzia midang hriattirna ni pah fawmin ka kai tho a, "zu hi zuar tawh suh kan ti a ni lawm ni, khawtlang i va zah lo ve" tih pahin ka beng leh thuai a. Hmeichhe tan chuan a na hle ang tih ka hria. A ni pawh chuan a tlu nawn leh țhuai a. Ka chhir zui zawt bawk a. A hnar thi nghal tuam tuam chu ka hmu a. Mahse ka khawngaih lem lo. Kan zingah upa lam chuan kut thlak zawng a tha tawh lo e. Hmeichhia a nih hi, a sam met kawlh ila, a ni pawhin zu lo zuar nawn tawh lo se a tha ang tiin thu an lo zaizap ta a, chuti ni lo se kut kha ka thlak tui dawn chauh mai si a. A na ve hle ang. A sam nalh sei ve tak mai chu a rem lai laiah kan cheh sak a. Patling in kan din hual khup a. Hmeichhe chhantu nei lo tan khan ava manganthlak dawn tak em. Kan dawn pui si lo.

A sam kan meh zawh dawn lamah chuan Beiseia hi a sikul bang hlim tak mai hian a rawn haw a. A nu sam patling rualin kan lo mehsak lai leh a nu tap lai a rawn hmuh chuan hamhaih tak leh mangang takin a ding a. A hawi kual a, a nu, a tana nu ropui kha miin diriam takin an sawisa mek a. Chhan duhtu leh chhan tum hmel reng a hmu si lo. Mangang vanga rilruna leh tap chhuak ngam si lo hian mittui tling pam hian kawng sirah chuan a ding ta reng a. Fa ka la nei lem lo bawk a, chutianga naupang mangang hmel pawh chu ka khawngaih hran lo.

Chumi hnu chuan Beisei a nu chu khaw dangah a awm sawn ta daih a. Beiseia te chu an thenawm te inah a dah a. Sikul an kal tawh lo a. An ei-in tur hi khawdang atang a lo thawn a. Chumi hmang chuan inthlahrung takin ei leh in an ei ve ngam tawk a ni tih pawh tlang kam atangin ka hria a. Keimah ni avanga chutianga awm an ni tih pawh ka ngaihtuah duh lo a. Tin kan buaipui an ngaihna ka hre lem lo bawk a. Beiseia pawh chuan chumi kum chuan a sikul kal lai a bansan a. Class 1 atanga class 5 thleng kha chu lehkhathiam thei tak niin an sawi a. Mahse sikul kal chu a bansan a ngai ta si a. Beiseia kum 15 a nih kum hian a nu chu kan khuaah a lo let leh a. Chhang tenau leh nimki te a siam a. A zuar thin a. Beiseia naute sikul kal bansan leh an nau te lam pahnih sikul la kal hman lo hrim hrim te kha sikul a kal tir leh a. Beiseia erawh khawdangah mechanic zir turin a thawn ta daih a. Mechanic zir chu zir man a awm lo a. Mi workshop-a mi thu hnuaia va kun tawp kha a nih mai avangin an tan a thil zir phak awm chhun a ni a. Chuvanga inzirtir chu an niin a lang.

Beiseia chu kum hnih kal ta khan kan khuaah alo let leh a. Workshop te reuhte a hawng a. A lun ve zek a. A siam man a tih tlawm avangin kei chuan thiam vak lovah ka ngai a. Ka pan duh lemlo. Chu bakah zuzuar fa ve mai kha a ni a. Amah atangin thil tha ka beisei lo a. A sual dawn tih ka ringin inhnimhnaih ka duh lem lo a ni.

Mahse hei an chhungkua kan suasam atanga kum 10 zet a liam meuh chuan a khawngaihna dawngtu ka lo ni ta reng a. Miin min puih duh lohna hmunah ka tan a ding a. Ka mangannaah min thlamuantu a lo ni ta a. Hmana an chhungkua kua a ka hmusit kha tunah chuan amah ringawt pawh ka zah tawh a. Hmana misual chhung nia ka hriat kha tunah chuan rilru thatah ka tluklo hle tih ka hre ta a. Hmana an rilru ti natu kha tunah chuan ka rilru ana ta zawk a. Hmana inchhira siamtu kha tunah chuan ka inchhir ta em em mai a. Kan dinhmun alo va inthlak chiang ta em. 

10 YEARS CHALLENGE-ah chuan ka lo hneh lo hle mai.