COVID TREATMENT

DOCTOR KA ZAWHNA

COVID TREATMENT : MONOCLONAL ANTIBODY COCKTAIL (MAC)

Dr. Chawnglungmuana

Oct 24, 2021

Sorkar thuchhuah te kan hriatthiam nan ka column hi hman ṭangkai kan tum ang e

Kum hnih dawn lai mai Covid-19 hri leng chuan min tibuai ta a. Keini state hi kan buai chhung a rei zual bik hle mai a, state dangah an neih mang tawh loh laiin 700 chuang new case kan la inhmu nitin a, state dang hmelhriatte pawhin kan hri len dan bik hi mak an ti thei viau. A do dan kawng te, a vei mekte enkawl dante thlengin kan insiamrem reng mai chu a ni a, SOP reng pawh kan ngah tawh mai. Engpawhnise, kan zia chho ve hret hret niin a lang a, chutih rualin he hrileng vanga thi kan awm chho ve ta reng mai a, chuvang tak chuan kan fimkhur tlan nan leh, a enkawl dan kawnga sorkar thuchhuah te kan hriatthiam nan ka column hi hman tangkai kan tum ang e. 

Covid hri kaite hi a enkawl dan kawnga kan thliar hranna chu an symptoms (natna lan chhuah dan) atangin a ni ber a. Asymptomatic (engmah insawiselna nei lo) leh mild symptoms (khawsik sang lo, hritlang ang deuh, khuh, taksa sil, rim hriatna hloh leh a dangte) hi a hranpaa enkawl mamawh an ni lo va; chuvangin, inkaihhruaina tharah chuan in lama inkhung hrang tura tih an ni. Ṭhenkhat ah chuan a rem lo thei a, 4C emaw 3C a awm ngai te pawh an awm thei bawk. Mild symptoms ho ah hian khawsik an neih chuan Paracetamol pek te, hritlang leh hrawk thip nei ah chuan antihistamines (Levocetirizine) kan tih te kan pe a, a tawk mai bawk.

Covid hri kaite zingah heng insawiselna hi an nei a nih erawh chuan Dedicated Covid Health Center (DCHC – MINECO leh Mualpui) emaw Dedicated Covid Hospital (DCH / ZMC)- ah te sawn thuai tur an ni thung.

1. Khawsik reh thei lo, temperature 100.4° F aia sang, ni 5 aia rei te,
2. Khuh nasa leh zual zel te, 
3. Thawhah nei, SpO294% aia hniam bakah respiration rate 24/min aia rang
4. Kawthalo reh thei lo ni 5 aia rei
5. BP sang emaw hniam thut, shock, nikhaw hre mumal lova awm leh awm na zual (severe chest pain).

A enkawlna chungchangah hian Monoclonal Antibody Cocktail (MAC) hi kan hre nual tawhin a rinawm a. Damdawi man to tak mai a ni a, a hman dan kawngah pawh a mamawhte tan chauh hman theih a duhawm hle. Chutiang avang chuan sorkarin MAC hman dan tur inkaihhruaina a siam ta reng a. Mild to Moderate case (puitling leh naupang kum 12 chunglam chin emaw naupang Kg 40 chin chung lam tan) te hman tura duan a ni a. Chutah pawh chuan High Risk ho tan bika hman tura rawt a ni. MAC hi damdawi chi hnih – Casirivimab leh Imdevimab chawhpawlh a ni a. High Risk ho bik tan a ṭangkai hle a ni.

High Risk tia inkaihhruaina in a sawi te chu – 

• Thau/rit lutuk, BMI 35 chin chung lamte tan.
• Kal natna benvawn nei, dialysis mamawhte a bik takin.
• Zunthlum nei, damdawi hmanga enkawl laite tan
• Immune system tihniamtu natna veite tan – eg. HIV+, SLE.
• Immune System ti chak lo enkawlna dawng mek – cancer chemotherapy la mek angte.
• Tu pawh kum 65 chin chung lam.
• Kum 55 chin chung lam, natna benvawn nei – lung tha lo/thisen sang, chuap tha lo (asthma, emphysema etc). Naupang high risk pawh a hrana category siam a ni bawk (ziak lang lo mai ila).

 

Hetiang hi MAC enkawlna dawng tur bika inkaihhruainain a huamte chu an ni a. Kan sawi tak angin damdawi man to tak mai a ni a; chuvangin, a nazawngina hman chi a ni lo. AMC area a awm Covid hri kai kan nih a, MAC treatment hi kan ngaihven duh a nih pawhin kan veng area-a doctor-te biakrawn hmasak thin nise a tha ang. Chutiang lo pawhin MAC lak theihna hospital lama doctor-te biakrawn hmasak pawh a tangkai thei ang.

Source : Zalen