LUNGTHI ṬHATNA

 LUNGTHI THATNA

(Benefit of ammonium ferric citrate)

~Dr. C. Lalrampana

A KAMKEUNA

      Mizote'n lungthi kan tih mai hi chihniha then theih a ni. Pakhat zawk hi lungpuia bet, maida ang maia phut vãr dip niin han liah chhin pawhin a al tha hle bawk. 

      Hetiang hi Lungvaichi a ni a, chitui al  teng/chhuan ang deuh a ni.  Burkhawni Pa te pawh khan Parsenchhip khaw hnuaia mi lungthi hi an  teng khang ṭhin a. Parsen khua hi  N.Hlimen  khawhlui bul lawka awm a ni. Bilkhawthlir aṭang pawhin a lang reng a. Chi tui kha chikhawnah an siam thin tihna a ni. Hemi tlãng hnuaiah hian Oil a awmin an hria a,  Sapho hun lai khan an hmu niin an sawi thin, laih chhuah an tum laiin India Independent khan a nang ta a, an lai hman ta lo niin an sawi; tak tak ni maw?

      A pakhat dang leh chu lungpui atanga hnãi chhuak niawm tak, lungpuia bet, beraw ang maia senfim ral mai, ban tak, a ro chãr phei chu chang deuh rūt mai a ni a, hetiang hi lēngkir khãm leh kurunga lungpuiahte a awm duh bik deuh.

     Heng lungthi vãr chi leh sen chite hi hmanlai atangin kan pi leh pute khan pum damdawi, kal (kidney) damdawi leh natna chi hrang atan an lo hmang tangkai tawh thin a. Hei hi hriain hun engemawchen atang khan mithenkhatte'n lungthi hi lakhawmin tereuhtē têin saihlum angin, tho lu tia lek lekin thildang engemaw phuah-chawpte pawh an telh mahna! An hrual mum a,  sumdawn nan hmangin to tak takin an zuar thin. Mahse, clinical proof hmanga finfiahna erawh a awm lem lo niin a lang.

     Tin, pakhat dang leh lungthi an tih fo a la awm cheu mai! Chu chu damdawi siamtu company-te'n an siam a ni a. Hei hi ammonium ferric citrate tih a ni. Myanma Effective Pharmachem company-in a siamte leh India damdawi company hrang hrang siam a mumte thlengin hmuh tur a awm bawk. 

     Tichuan, lungthi chihrang hrang chithum a awm tihna a ni.

A ṬANGKÃINA :

      Sawi tawh angin lungthite hi tinreng damdawi tiin sumdawnghovin an zuar thin a. Mahse, tinreng damdawi hi thil awm lem lo, tawngkam thiamte phuahchawp a ni ve maiah ngai ila. Thatna erawh a nei ve tak meuh mai. A vãr chi phut dip ang chi hi pum nuam lo, kawpuar leh chakna atante a tha tlangpui a, a sen chi beraw ang deuh hi pumna, kal tha lo, kawtha lo, santen leh natna benvawn hrang hrangahte hman thin a ni a; mahse, mi zawng zawngin an ngeih vek lem lo.

      

AMMONIUM FERRIC CITRATE VE THUNG CHU

      A pathumna ammonium ferric citrate hi a formula chu C6H5+4yFexNyO7  a ni a. Ferric hydroxide leh  citric acid, tuihu nen chawhpawlha tenkhanga siam a ni. Hei hi mithenkhat sawi uar deuh leh fak mawi thiam deuhte chuan samak thi nena chawhpawlh niin an sawi a; sarangah leh burahte pek chhãwngin tlemtê tē chu to deuh deuhin an hralh leh thin niin a lang.

     Samak thisen an telh tih hi proof document awm lo a ni a, samak thisen ai chuan samak ki (rhino horn) telh anga sawi ni zawk se'ng chuan a awihawm deuh mahna! A chhan chu China-ho khian an pipute atangin samak ki hi met dipin ramhmul damdawi hrang hrangah an pawlh a khawsik, ruhseh, gout, luna,  thisensang, mitvai, khawsikpui, rulchuk leh eisual damdawiahte an hmang thin a ni. Samak thisen (rhino blood) erawh chu an hmang ngai lem lo. Chuvangin, damdawite hi tawngkam thiama inchawh chi a ni ngai lo tih kan hriat a hun tawh hle.

      Ammonium ferric citrate hi iron tlachham tan leh anemia atan te, gold & silver, tla chham tan te, tui tihthianghlim nan te, pãn silfai nan te, kawpuar, pum nuam lo, chi al tlachham tan te, thisen chak lo tante, kawtha lo, kal tha lo, phosphorus level atan te an  hman ṭangkai thin a ni.

A NGHAWNG THEIHTE :

      He lungthi hi damdawi tha tak ni mah se, ei tam lutuk chuan nghawng tha lo hrang hrang a nei a, chungte chu:

1. Ek harsatna
2. Ek dum
3. Luak chhuak
4. Khuh
5. Pum nuam lo

Heng natna nei tan hian ei loh a tha:

1. Thin tha lo
2. Allergy
3. Kawchhunga thi tling
4. Zunthlum vei
5. Zai tawk hlim
6. Iron ngah tan

    Tin, Nau pai lai leh Nau hnute pe lai tan ei loh a tha.

EI DAN TUR

       Daktawr thiam rawn hmasaka ei thin tur. Chaw ei hma kaw ruah laia ei tur a ni lova, chaw ei puar, ei kham hnuah chauh ei thin tur a ni. A mum leh siam chawp ngai chi a awm a, a mum chi tablet a nih chuan a tirah 420mg zelin ni 1-ah vawi 3 chaw ei kham zelah ei tur a ni a; ni 2na atangin 210mg zelin nitin v3 ei thin hi  tha bera ngaih a ni.. mahni thua tam tak tak ei loh tur. A tui siam chawp chi a nih chuan tui rialno 1-ah tho lu tiat lek pawlhin chawhsawma nitin chaw ei khamah v2 in  thin a tawk hle.  Ei tam lutuk chuan hemochromatosis (iron overloaded disorder) a thlen theih avangin fimkhur hle tur a ni. 

A TLÃNGKAWMNA :

      Allopathic, ayuvedic, homeopathic, herbal leh mizo tualchhuak damdawi pawh ni se, damdawi rēng rēng hi a dik lova ei/hman chuan natdawi a nih theihna lai a awm avangin fimkhur taka ei thin tur a ni a, a hun takah mithiam zawkte kaihhruaina dungzuia ei thin hi mitinte tih tur a ni. Mahni ngaihdan leh mite tawngkam thiam avanga inbumtir mai mai hi thil hlauhawm tak, thihna kotlanga dinna awlsam tak a nih theih avangin mitin i fimkhur theuh ang u.