NDA GRADUATE THAR

LALRINDIKA, MIZO TLANGVAL CHHUANAWM, NATIONAL DEFENCE ACADEMY ATANGA GRADUATE THAR KAN NEI LEH TA E!

Vawiin, 29th October, 2021 hian National Defence Academy, Khadakwasla, Pune ah 141st Course NDA ten Passing Out Parade an nei a. India ram hmun hrang hrang atanga thalai rual chhuanawm tak tak NDA atanga pass chhuak zingah hian Mizo tlangval Lalrindika a tel ve. Tun tuma NDA Passing Out Parade a Khuallian chu  General MM Naravane, Chief of Army Staff ( COAS ) a ni a. NDA atanga pass chhuak te hi Army, Air Force leh Navy a officer tur an ni a.  

Lalrindika hi Dr. Lalrohlua (L) ENT Specialist leh Pi Lalnuntluangi (d/o Pu Lalhmingliana, Thanzauva & sons/ZOFA) te fa pathum zinga a naupang ber niin, Dawrpui Veng, Aizawl a khawsa an ni. Vanduaithlak takin a pa, Dr. Lalrohlua hian a dam rei pui ta lo hlauh a. A nu, Pi Lalnuntluangi hian pa tel lo in theihtawp chhuahin a fate a enkawl chho a. Pathian malsawmna dawngin an fate pathum hi zirna kawngah a chher puitling vek a tih theih awm e. An fa upa ber chu Dr. Lalremsanga niin, MBBS a zawh hnuah tunah hian Safdarjung Hospital, New Delhi a internship a ti mek a. An mi lai leh a hmeichhe awm chhun Lalrempuii pawhin tunah hian ZMC ah 3rd Year MBBS a zir mek a. Lalrindika hi a naupang ber niin, tunah hian National Defence Academy atangin training hautak tak mai paltlangin hlawhtling takin a rawn pass chhuak a. Indian Army ah officer tur niin, kum thar lamah Indian Army Officer training na hmun pui ber, Indian Military Academy-ah kum khat training leh turin a lut ang a. Chu mi hnuah chuan Indian Army a Commissioned Officer niin, Lieutenant ah bul a tan dawn a ni.

Lalrindika

Lalrindika hi naupan lai atang renga thuawih thei tak leh lehkha zir taima tak mai a ni a. Nursery atanga Class-VII chu Centenary School, Dawrpui Church ah a kal a. Class VIII – XII erawh chu India rama Military School tha bera chhal ngam, Rashtriya Indian Military College (RIMC), Dehradun ah a kal thung. RIMC a lut tur pawh hian All India Entrance Test a in ziah tlin a ngai a ni. RIMC a a kal chhung hian kawng hrang hrangah sulhnu chhuanawm tak tak a hnutchhiah a. Shooting leh Swimming ah te Gold Medal a la a, anmahni Section bikah a hotu ber, Section Commander a ni bawk. Kum 2018 a RIMC Graduation ah ‘Best in Attitude’ award a dawng hial a ni.

Kum 2018 November a UPSC buatsaih, NDA & NA Final Result ah All India Merit List ah 55-na a ni phak a. January, 2019 atangin NDA hi a zawm a. Kum thum chhung zet training hautak tak mai paltlangin tunah hian hlawhtling takin NDA atang hian a rawn pass chhuak ta a ni. NDA ah hian hnam dang val rual zingah pawh a duailo hle a ni ngei ang, and Division bikah a hotu ber, Division Cadet Captain a ni phak a ni.

Hetiang Mizo tlangval chhuanawm tak mai kan han nei leh ta hi a lawmawm tak meuh a. Thuawih, taima, tumruh leh tuarchhel taka hlawhtlinna kawng zawhtu Lalrindika hi a ngaihsanawm a. A hlawhtlinnaah hian amah leh a chhungte an lawmpuiawm tak zet a, a hmabak a kal leh zelna turah duhsakna sang ber ka hlan e.