Sialsir te zinkawng

SIALSIR (AMUR FALCON) TE ZINKAWNG

Sialsir hian thlasik dawnah an inpui Mongolia atangin Africa khawmual-puiah an pem ṭhin a. An tam thei hle a, sing tel tak meuh meuh an ni ṭhin.

Sialsir

An zin kawng (migratory route) ah hian chawlh lawkna an nei ṭhin a, a bupui chu Nagaland ah an chawl a, a ṭhena zar hian Mizoram hi chawlh nan an hmang ve bawk.

Tun hma chuan Naga ho hian an lo that nasa hle ṭhin a. Tunah erawh chuan humhalhtuah inletin khawvel hriat khawpin an hmingthan phah ta zawk.

Nagaland Wildlife & Biodiversity Conservation Trust (NWBCT) ten Kum 2013 August thlaa "Friends of the Amur falcon" campaign beihpui an thlak lai khan an CM Neiphiu Rio chuan, "Kan sawrkar hian Amur falcon laka nunrawng taka kan lo chetna zawng zawng hi kan ti tawp ngei ngei tur a ni a. Chu chu kan tihtur (duty) a ni. Naga nunphungah mikhualte laka ṭhat kan chhuahna ṭhin nun mawi leh zahawm tak kha heng kan khual duhawmte lakah hian kan lantir tur a ni,” (It is our duty to protect the Amur Falcons and, in true Naga tradition of hospitality, treat them as honoured and esteemed guests) tiin a sawi hial a. An hlawhtling chiang khawp mai.

An rama Amur falcon zinga ṭhenkhat kha transmitter lo vuahin an thlenna chin chhui nan an hmang a. Heng transmitter an vuah sakte hi an hming vuahin “Naga” tih te, “Wokha” tih te, “Pangti” tih te, “Longleng” tihte leh a dang dangte an put tir a. November 2013 khan transmitter vuah hi an ti ṭan a, a hnu lamah pawh an vuah leh nual a ni. An kalna chin zawng zawng an thlithlai ṭhin. 

Keini paw'n kan ram rawn tlawh ve chhun, hun rei lo te rawn chawlte hi kan lo humhalh ve a ṭul em em a ni.

Kan rama thlasik reh hnu March thla velah chi inthlah pung turin an zin kawng ngaiah an rawn haw leh ṭhin.

~Zotei Pa