HOUSING FOR ALL ( URBAN) FIRST INSTALLMENT PEK LET LOH HRIM HRIM TUR

 HOUSING FOR ALL ( URBAN) FIRST INSTALLMENT PEK LET LOH HRIM HRIM TUR

Mizoram Sawrkar (UD&PA) kal tlangin  Mirethei Insak Tanpuina kan tih mai, HFA ( Urban) scheme chu Mizoram khawpui 21 a chengte  mahni in leh lo neilo te tan Central Sawrkarin Beneficiary 16000 (chhungkua sing khat sang ruk ) zet tan First Installment Rs 60,000 theuh phawt a an dawn tur a rawn pek daih tawh (Rs Nuaih Sang Kua Zaruk dawn) chu Beneficiary thlan fel thlap tawh hote hnenah chuan a la pe kim thei lo reng a. Kan unau / chhungte retheih luat avanga mahni in luah lum tur pawh sa ve hlei theilo, Central Sawrkarin duat taka sum tum sak vek (100% Central Sawrkar funding) ni bawk si...te chu Office Computer a  "Enter Key" hmeh zeuhva an Bank Account a lut mai tur pawh kum 2 chuang dawn lai MIZORAM sawrkarin a la hup sak thei hi a makin, a zialo rapthlak tih loh theih ani lova. Heti khawpa mahni mi leh sa, rethei in neilo te tak ngial pawh a sawp kual (financial rape) duh hi lo thlir liam mai mai chu a harsa ve det. 

Chutih a karah tunhnai a heng Mirethei ho te hnena First Installment Rs 60,000 an lo pek ve khiah tawh hote thenkhatin chhan hrang hrang avangin an First Installment an lo la hman dik tangkai loh Rs 60,000 chu a thring let vel mek niin ka lo hria a. 

Hetia an thin letna atan a tanchhan turin kan Sawrkar hian Beneficiary te hnenah fing vervek takin, Intiam-kamna (Undertaking) te an lo signed tir ve luklak leh zel zel te ani awm e. A sual thlak ang reng hle a ni. Mahni pawisa pawh nilo, Central sawrkar pawisa India Citizen rethei , mahni in pawh nei zo lo te mumal leh hlawhtling taka lo SEM TU atan a rawn hman ve satliah State sawrkar han chet rikrap dan hi Mizo Kristian taka pawm zam chu a harsa hle ani. 

Amaherawhchu, Beneficiary thenkhat First Installment lo dawng tawh te in  First Installment sum Rs 60,000 kha an rawn thring let che u anih pawhin, LO PE LET DUH MIAH SUH U....A chhan mumal tak awm te chu....

1. He HFA Scheme hi MIZORAM sawrkar scheme a ni lova, Mizoram sum pawh a ni lova, Central Sawrkar scheme, Central Sawrkar sum liau liau ani a. Sum neitu leh in insak ve theih nan a petu che u dik tak, Central Sawrkar (Union Government of India) in an duh anga inlo hman loh avanga he pawisa inlo dawn tawh hi an rawn thring let che u anih ngawt loh chuan TUMAH lo thing let ve ngawt thei che u an awm lo.

2. Beneficiary 16000 dawn tur sum (Rs 9600 lakhs approx) State sawrkar kut a an rawn pek fel vek tawh si, mirethei te sum chu a dawngtu tur thlan fel vek tawh bawk si te hnena pek chhuah mai pawh theilo Sawrkar (mahni sum pawh nilo lehnghal, lo pe chhuak tu tur ringawt chauh nisi) hian mirethei te sawrkar sum pe chhuak fel hmasa hawt si lova ka thing let e, bal e an lo ti ve ngawt hi zahtheih lohna vawrtawp leh mahni mipui rethei zualte thlenga hmusit leh diriam taka rah behna a ni. Pek let duh reng reng loh tur a ni ringawt.

3. Engtin tin emaw First Installment Rs 60,000 dawng tawh zingah I lo tel ve hlauh va, hman dik loh avangin ka pe let leh ang tiin ziaka an lo intiamkam tir che anih pawhin pe let duh chuang suh. An pawisa a ni lo tih chiang la, khatiang INTIAMKAMNA kha siam tur / Beneficiary te signed luih tir thei ngawt an nilo. He HFA Urban Scheme ah hian chutianga inthin let dan a awmlo hrim hrim. Law Court ah an kalpui (enforce) thei dawn chuanglo. I lo la hmang dik tangkai hman rihlo anih pawhin ka hmang tangkai thuai dawn e, tiin lo chhang mai rawh. A tawk tiu teu viau ang.

4. A thuhrim ah First Installment hmu tlakah an ngai che a, Sawrkar lamin Selected / Approved Beneficiary ah an ngai / telh tawh che a, dawng theilo an ti leh hnuhnawh che anih pawhin nangma thiam loh nilovin a thlang tu che thiamloh ani , ngawihsan hmak rawh. 

5. Amaherawhchu ka  Beneficiary (First Installment Receiver) unau duh tak, hei erawh lo hre ve thung la. First Installment I dawng tawh a, engvang pawha I Rs 60,000 dawn kha I hmang diklo palh anih chuan, Scheme a Guidelines angin in I sak bawk siloh chuan Second Installment (Rs 60,000) leh Third / Final Installment (Rs 30,000) te erawh chu beisei lo ngam ve thung ang che. 

Hemi chungchang a zawh fiah emaw Beneficiary Rs 60,000 Sawrkar in a thin let mek I nih chuan a hnuaiah hian min rawn contact dawn nia. 24hours x7 days a week in ka biak theih e.

PAWIMAWH : Tunah hian First Installment Rs 60,000 dawng tawh, HFA Scheme anga in pawh sa ve thlap mahse Second Installment Mizoram Sawrkar in a la hmuh sak theih loh avanga mahni inrel tawh te pawh sawprawp leh tawh. Chutih laia tunhma lama chenna tur lo neih ve sa tawh pawh lo thriah ve tawh laklawh si avanga chenna tur mumal  pawh nei tawhlo te tan, Mamit khawpui a hetiang mite hmingin Mizoram sawrkar chu High Court a khing tura inbuatsaih mek ani bawk tih kan rawn inhriat tir nghal bawk e.

Pathian ropui nan, kan ram leh hnam dam nan, beidawng khawp khawpin kan la bei hlawm lo tih hria ila. Chunglam thlir ngauvin kan bei ho zel dawn nia.

In unaupa....

Advocate Er. LAL HRIATRENGA CHHANGTE

At :  CHROME HOUSE, H.No- 2/16, Kulikawn Opposite Taxi Stand, Aizawl -796005

Contact : Cell / Whatsapp : 8128965588