MI ZINGA INZAWH LOH CHI

MI ZINGA INZAWH LOH CHI

Dr. C. Lalhrekima - Apr 12, 2021

Inngaihsak hi a tha zel. Mi tin hi ingaihsak tawn tur a ni.

A dam tawh avanga a damdawi pawh ka tihtawp tawh, hun rei tak tha tawh a lo lang leh hlawl a. A rawn luh hlim chuan a hlim viau a, thilpekte min rawn ken nghe nghe a. Pangngai taka inhmuh hlim thuhma kan sawi zawha, “Engnge ni, i lo lan leh tak?” ka’n tih chuan a ngawi ta vang vang mai a. Nghah deuh a ngaih avangin ka’n nghak vang vang a. A ngawi rei ta deuh a, ka theihtawpa dawhthei âwin ka’n zawt nawn leh a. 

A lo luh hlima a hmel hlim tak chu a danglam a, a mittui a rawn luang ta ngiai ngiai a. A tawng mai thei lo. Nakinah chuan tah aw tuauin, “Miin zahthlak deuhna hmunah, eng nge i an, i damdawi i ei tha em? min ti thin a, ka zak thin lutuk,” a rawn ti thei tawk a.

Rilru naa rilru daktawr a rawn pan leh chhan hi ngaihtuah mai chuan mi thenkhat tan a ho deuh mai thei. “Ka tha e, damdawi ka ei tawh lo e,” ti mai se a tawk tho. Mahse, a tuartu rilru chungril han ngaihthlaksak thui deuh chuan hriatthiampuiawm tak a ni. 

A dam loh lai chuan buai ve tak lai pawh a nei. Dam tawh hnua ngaihtuah leta zahthlak hun laite pawh a awm a ni mahna. A dam loh leh buai kha hre lo an tam. Tunah chuan a dam tawh a, damdawi pawh a ei tawh lo.

Mi zinga a chanchin lo zawt thui deuhte hian amah ngaihvena ngaihsak chu an ni ngei ang. Mahse a buai lai hre lo zingah, “I damdawi i la ei tha em?” lo tih kha a tan hmanlai hun, hriatreng tlak loh zuk sawi chhuahsakna a ni thei a. A dam lo thin tih hre lo zingah a dam lo thin tih puanna a ni bawk ve tlat. “I dam em?” tih chin kha chu a lawm lutuk. Zawhna hnuhnung tel kher khan a thinlung a khei ve tlat. 

A titute hian tihmualpho an tum vang chu a ni hauh lo ang. Ngaihsakna an lantirna a ni. An titha hle an inhria ang. Mahse, a tuartu dawnsawn dan erawh chu ‘mualphothlak’ tih lam a ni daih.

Inngaihsak hi a tha zel. Mi tin hi ingaihsak tawn tur a ni. A Pathian thu a ni. 

Mahse, fimkhur ngai hret hi a awm fo dawn a lo nih hi. “I tha em? In dam tlang em?” tih chin hi a lo him mai. Chumi piah lama, “I phungzawl damdawi i ei tha em? I dadu kha a dam tawh em? I ngawr damdawi kha i ngeih em? I chhul lawng kha a dam fel em?” tia chiang leh lutuka inzawh hi chu mi dang awm loh lai deuha inzawh a ngai a nih hi.

Dam lohna thil kher lo, chhungkaw thil leh thil dang pawh inngaihven reng ang u. Mi zinga sawi chi leh mi mal titia sawi chi hi a awm ang. “In nu uire kha i ngaidam ta em ni? In pa khan ngaihzawng a la nei em? I fapa nupui tlan kha a lo haw leh tawh em? I fanu sawnpai khan a hring tawh em?” tih ang chi kha chu a falin aw! 

Inngaihsak zel ang u. A hun leh hmun azira sawi awm chin erawh thliar fel thiam ve a lo tul a nih hi."

Source : Click