Nu Tan

Hmeichhe tan bik, chhungkaw nu ber i nih chuan :-

1. I pasal chuan khumlaizawl (sex)-ah Nawhchizuar ang maia zei taka i chet a duh a, a beisei ruk a ni. Mi zakzum tak i ni a, i ngam lo a ni maithei. Mahse, 'tiam tlat e' i lo tihpui tawh chu sex-ah i tilungawi zo lo a nih chuan, in nupa inkar a zau telh telh ang. I tih ngai loh thil danglam leh phurna siamsak thei hmanga i pasal i lemkual vel kha a duhthusam a ni. Inzir theih a ni a, zei taka i che thiam lo a nih pawhin, tihlawm i tum ve hle tih i lantirna pawh khan a tiphurin, a tihlim tawh!

2. Eitur tui taka chhawpsak a, siamsak thin turin i pasal chuan a beisei che. A hnathawk lo haw kawngka a rawn luh ruala chawhmeh rimtui hmel em em a hip atang khan a duhna che a pung tih hre mai rawh.

3. I duat a duh. I pasal kha a lo hahin a chau ve em em thin, i bula pangchan ngher ngher te kha a duh ve, duat taka i lo chiauau a, naupang chhe duat taka i lo chul hliau hliau te khan a hahdam sawng sawng thin a ni!

4. A thinrim laia i lo tawng ve sek te, in inhauh a i ngawih duh tlat loh te hian kutthlak lo tur chein a insum tang tang tih hria la, a thinrim tawh tih i hriat ruala i ngawihsan hmak te khan a chhuang em em zawk che a ni.

5. Kohhran leh khawtlanga mi tangkai tak nupui i nih chuan i pasal khan a thiltihnaah tawiawm a, nawrkal a, fuihtu ni turin a duh che a, a thiltih tha te i lo ngaihnep sak emaw heng thil avanga in a chhuahsan thin te sawisela i ngur khum fo khan a rilru a na thin.

6. Naupang chhia taka i bual a phut ve thin. A hnung nawhsak tura a kohna che kha a chhuanlam a ni tih hria la, a taksa pum bualfai a, a theih phei chuan in pahniha inbualdunte pawh a duh fo ang, ti ve mai rawh.

7. Ruihhlo ti thin nupui i nih chuan i pasal chu tawngtaisak mai duhtawk lovin, titipui la, ruahmanna siam dun ula, zaidam leh dawhthei takin a sim dan tur kawhhmuh ang che._

8. Titi dun te, nuih dun ker ker te, fate tel lova awm fal te a thlahlel thin, i nui hmel kha hmuh nuam a ti.

9. A ex i sawichhuah fo te, a nunhlui i thik fo thin avang khan hrehawm a ti a, a inthlahrung a, ninawm a tih chinah erawh hmeichhe dang a melh tan tawh thin.

10. Tlan fo suh, ngaiah i neih ang a, i pasal pawn a nuihzat ru ang che. Theihtawp i chhuah chung pawha then loh theih loha a awm a nih chuan then la, kir tawh suh, i pasal chu a buai phili ruai mai ang.

11. I ex-te sawikhum fo suh. A ning thin, tin, a thik bawk.

12. A chhungte lakah i vui thu chu a bulah chiah sawi rawh. A nu leh pa rel khum suh, a rilru a na thin. I hmangaih ber kha duhthlanna harsa tak siamsak suh tih ka sawi tumna a nih chu.

13. I nulat lai ang thova duhawma hmuh che a la duh fan tih hria la. Fai sar la, make-up te pawh hman nasat a pawi lo, i pasal tan alawm le. Mahse i hmui hnawihsen lutuk suh, fawh che a inthlahrung ang._

14. A laka i lungawi lohna te kha thiam taka i sawipui a ngai a ni. I duh dan te hrilh la, thupe awrawl zawng ni lo hram se.

15. A laka i lawmnaah lawmthu hrilh hreh lo la, inkoh duatna tawngkam hmang fo rawh. A lawm ru veng veng mai ang.