WELLNESS CENTRE HAWNG

TOURISM MINISTER-IN THENZAWL WELLNESS CENTRE HAWNG

No.3560/2021-2022

 Aizawl, 5th January, 2022 :   Vawiin khan Pu Robert Romawia Royte, Minister, Tourism, SYS, ICT, etc., chuan Thenzawl Wellness Centre a hawng.

A hawnna inkhawm Pu V. Lalengmawia, Director, Tourism kaihhruaiah hian Minister chuan, Tourism department chu department lian lo tak ni mahse hmalakna hmuh theih tawh leh hmuh theiha awm chho mai tur engemawzat an nei tih sawiin, tourism tihhmasawn nana hmachhawp an neih langsar zualte a tarlang a; Vantawngkhawhthla chu Northeast Mega Tourism hnuaia tihhmasawn tur thlan a nih thu leh  Thenzawlah Tourist Auditorium hawn mai hmabaka peih fel a nih tawh thute a tarlang a. Covid19 hripui a kiana hun tha a awm chuan tun February thla hian Ministry of Tourism bul tumin Golf Tournament, Thenzawla buatsaih tum a nih thu a tarlang bawk. Pu Robert Romawia Royte chuan, Reiek tlang thuamthatna tura DONER Fund atanga Rs. 560 lakh hmuh anih thute, Beraw Tlang Resort tihchangtlun nana Special Assistance to state for Infrastructure Development atanga Rs. 600 lakh hmuh a nih thute, 15th Finance Commission hnuaiah pawh Mizoram Tourism tihhmasawnna tur Rs. 200 crore dah a nih thute tarlangin, 15th Finance sum erawh hi chu hripui vangin kan beisei ang zat kan hmu lo mai theia, kan ngaihpawimawh zualte erawh kan hmuh ngei beisei a ni, a ti. Tin, Khamrang Village Based Eco Tourism atan DONER atanga Rs. 800 lakh approval hmuh a nih thute leh External Aided Fund atanga Rs. 100000 lakh (Rs. 1000 crore) zet an beisei mek thu a tarlang bawk. Minister hian Tourism hmasawnna tur ruahmanna lian tak tak sawrkar chuan a duang chho zel dawn tih sawiin, khualzin hipna kawngah Mizoram hi chawikan dawrh kan tum tlat a ni, a ti. Tin, Tourism hi amah ngawta hmasawn thei a ni lova, department dangte leh mimal hmalaknate nen thlenga thawhho ngai a nia, mipui rilru sukthlek pawhin a zir a tul hle bawk a. Thenzawl phei chu Tourist hmunhma tam tak awmna a ni a, mikhual chitin dawng thei leh enkawl thei ni tura in inbuatsaih zel a ngai a ni, tiin a chah a ni.

Khualzahawm Pu TC Pachhunga, Vice Chairman, Tourism, Sports & ICT Development Board pawhin thu a sawi a. Mizoramin a la neih ngai loh thil thar a nei ta chu lawmawm a tih thu a sawi a. Thenzawl mipuite an vannei hlea a hriat thu a sawi a ni. Mipuite chu rilru zau tak pua ram chhung leh pawn atanga mikhualte tha taka dawng tura inbuatsaih tura fuihin, nungcha humhalh kawnga tan lo la tharleh turin a ngen a ni.

Wellness Centre sak dan report tlangpui Pu Saitluanga, Jt. Director, Tourism in a pe a.  Thenzawl Wellness Centre ah hian spa leh massage room te, cafeteria te leh a riahchilh duh tan eco-log hut tha tak pariat (8) a awm a. A sak nan hian Siberian Pine Wood vek hman a ni a, Thenzawl Golf Resort nena hman dun theih tura duan niin Thenzawl tlawhtu tam tak tena an hman tangkai beisei a ni.  Ministry of Tourism scheme; Integrated Development of New Eco Tourism Destination under Swadesh Darshan – North East Circuit at Thenzawl & South Zote, District Serchhip & Reiek Mizoram hnuaia sak a ni a, he project huangchhunga vawiina hawn tak Wellness Centre atan bika ruahman sum chu Rs. 1037.69 lakhs a ni a, Edufice Infraservices Pvt. Ltd ten January 2019 ah a sak hna hi an tan a ni. Hripui leng vangin a hawn hun hi tum hnih zet sawn hlat a ni tawh nghe nghe. He project hnuai component dang Thenzawl Golf Resort leh Adventure Theme Park, Reiek Tourist Resort hmuna mite te pawh sak zawh tawh niin hawn a lo ni tawh a ni.

He hunah hian Pi K. Lalrinzuali, IAS, Secretary, Tourism chuan kalkhawmte lawmna thu a sawiin, Pu Lalropuia Sailo, Chairman Thenzawl Joint VC pawhin thusawina hun a hmang a, Pi Zonunthari, Deputy Secretary in lawmthu sawiin inkhawm a khar a ni.

Written by: 

K. Saitluanga, MIS,

DIPRO - SERCHHIP

Dated: 5th Jan 22  4:57 PM