AIZAWL-AH MOTOR-IN KA LUT HMASA BER

Αizαwl-α motor khαlhlut hmαsα berin α khαlhluh chαmphα vαwi 76 nα puαlin, α khαlhluttu ziαk ngei hi hαn dαh ve ilα:

AIZAWL-AH MOTOR-IN KA LUT HMASA BER

~Rochhinga

       Sialhauva ka nî chuan, "Zangkawh, motor chho zawnga han lirhtir chu a va han hahthlak dawn ngai ve le," a ti a ti mai a. Sairang aṭanga Aizawl pana kan chhuah dawn ni chuan Bawrhsap Mc Call-a chuan tlangau a lo autir a. "Sairang kawngah tumah kal loh tur. Thing phur pawh Sairang kawng chung mêl khat aia hnaiah phurh loh tur, Motorin a nghawr thla ang che u," tiin Aizawl mipui a lo hriattir tawh a. 

       1936 khan Motor Mechanics ka zir a, kum hnih hnuah 1938 khan licence ka la a. 1941 khan sipai (IEME)-ah ka ṭang a, indo zawh hnu 1947-a ka ban hma chuan sipaia Class I Fitter hna ka thawk a ni. Ṭum khat chu Shillong sipai hmuna kan awm laiin kan hotute'n Silchara kal turin thupek an rawn siam a. Silchar Railway Station-a Three Tonners motor pathum  an lo dah chu ṭhiah darh vek tur hi a lo ni a. Motor ṭhiah hna chu kan bei sauh sauh ta mai a, kan ṭhiah zawh chuan engakhaw sawi lovin Shillong lamah bawk chuan min tir haw leh ta dial a. 

       A hnu rei teh chiam lovah Fitter 20 rual vel chu min han chah leh ta a, Silchar kan han thlen hnu chuan kan hna tur chu min han hrilh ta a. Katakhal-ah lawngleng 60 rual lai mai hi an lo man khawm a, Motor thlingthlawn sa kha phurin Tlawng dungah kan inphur chho ta muah muah mai a, tui tam deuh lai a ni bawk a, kar hnih chhung zet kan thang hnu chuan Sairang kan thleng chho ta a.

       Sairang kan thlen achin thla khat chhung chu kan motor ṭhiat darh kha kan han remkhawm leh ta ngat ngat mai a ni. Sairang leh Aizawl inkar kawng chu a têin a rualrem lo hle mai a, chutiang kawng ṭha lo leh hlauhawm tak chunga Motor khalh tura ruat ka lo ni chu induh ve theih tak a ni.

       September thla a lo ni a, kan Motor rem khawm chu kan lo zo fel ta a, Aizawl pana motor pakhat han khalh chhoh phawt mai chu kan hotute chuan an ti ta a. Zing dar 5, September ni 7, 1942 tuk chuan 3 Tonners Motor chungah chuan ka han lut a, ka han tinung ta a. Aizawl lamah chuan Bawrhsap khan tlangau a lo tir tawh tih te kan hria a. Tin, kawng rem lo laia siam ṭha mai tur kha labour eng emaw zat kawng tluanin an awm zut mai a. A kawng kha a tet êm avangin a kawngkawi engemaw laiah chuan han chawi her deuh laih laih ṭulna lai pawh a awm a. Darkar khata mêl khat leh a chanve vel kalin zing dar 5 vela kan chhuak kha tlai dar 2 velah Aizawl kan thleng thei chauh a ni. 

       Vaivakawn kan han lut chho chu Aizawl mihring zawng zawngin an lo thlir emaw tih mai tur khawpin mipui an lo pung khawm a. Sikul naupangteho pawh an zirtirtute thu nghak zo lovin sikul an rawn tlan san a, min lo thlir ve bawk a. Losul haw a la hun loh avangin motor-in chirhdiaka a hniak te kha feh hawin an rawn hmuh atan tiin YLA (YMA) nula-thlangvalin an veng ṭha tlat a. Motor lenzia uar ho pawlin an sawi dan chuan hmeithai in tiat a ni an ti deuh ber a. Thingtlang aṭangin mi tam tak Motor en turin an rawn zin phah a ni. 

       1947 kumah Indopui a lo tawp a, a duh apiang bân theih a nih hnu khan kei pawh ka bang ve ta a. IEME (Indian Electrical & Mechanical Engineers) Class I Fitter, kum 24 vâlin Sairang aṭanga Aizawlah Motor ka khalh luh nia min ngaisang ṭhenkhatte khan pasal an lo nei thluah tawh mai a. Ka sipai bân hnu 1949 khan nula pakhat min lo la hrerengtu ka hmu chhuak a, nupuiah ka nei ta nghe nghe a./- bchhangte

                       .........

Source:  He thu hi MZP Chanchinbu 1977 July thlaa chhuak Civil Pensioner chanchinbu June - August 2021chhuak ami lak chhawn  a ni. A thu hi paih leh tidanglam lovin post darh ve rawh le. Pu Rochhinga zahna leh chibaibuk nan aw./-

                   ::::::::::::::::::::::