CYBER CRIME LEH A HREMNA DAN TE

CYBER CRIME LEH A HREMNA DAN TE     

~By Julie Lalrinzami 

(A hremtu tur ngei maiin a rawn ziak hlauh e. Mizo Netizen ten uluk deuhva chhiar vek turin kan Pi Julie Post hi ka rawn thehthang chuai chuai e...Hriata Chhangte)

Mizoten cyber crime vangin harsatna kan tawk ve ta fo mai. Kan fimkhur tawk loh vang te, kan fin tawk loh vang te leh mi sual tawn fuh vang te a ni thei e, enga pawh chu lo ni se, a nghawng erawh a thui hle. Mipat hmeichhiat rawngkai deuh bik cyber crime hrang hrang leh a hremna atana India rama Dan kan hman, cyber laws langsar deuh deuh te zinga a langsar ber pahnih 

Information Technology Act, 2000 leh Indian Penal Code, 1860 hnuaia Offence leh a hremna te tlem tarlang ang. 

Section 66E IT Act (Punishment for violation of privacy) - Tum reng vang leh hre reng chunga phalna la hmasa lova mi thlalak (private area) lak (capture), thawn kual leh thehdarh hi kum 3 thleng lung in tan theihna niin, pawisa cheng nuai hnih thleng a chawitir theih emaw a pahnih a hrem kawp theih a ni. 

Section 67 IT Act (Publishing of information which is obscene in electronic form) - Electronic kaltlanga ṭawngkam mawi lo leh zahmawh rawngkai, mit leh beng hriat theih tur ang zawnga thu thawn a, mi dangte vehthlem leh a lo dawngsawngtute tikhawlo thei tur zawnga chutiang thil bawlhhlawh thawntute chu vawikhat pawikhawihna ah kum 3 thleng tantir leh Cheng nuainga chawitir theih a ni a, a vawi 2 na ah phei chuan kum 5 thleng tantir leh cheng nuai 10 thleng chawi theihna a ni. 

Section 67-A IT Act (Punishment for publishing or transmitting of material containing sexually explicit act, etc in electronic form) - Mi tu pawhin computer leh a kaihhnawih thiamna hmanga mipat hmeichhiatna kaihhnawih (sexually explicit act) a puanzar emaw, a thawn darh emaw, chutiang chu midang a tihtir emaw chuan vawikhat pawikhawihna ah kum 5 thleng tantir theih niin cheng nuai 10 chawitir theih a ni bawk a, a vawihnihna ah phei chuan kum 7 thleng tantir theih niin cheng nuai 10 chawitir theih a ni. 

Section 67 - B IT Act (Punishment for publishing or transmitting of material depicting children in sexually explicit act, etc. in electronic form) - Computer leh a kaihhnawih thiamna hmanga mipat hmeichhiatna lam hawi zawnga naupang (kum 18 hnuai lam) cheibawl emaw tarlan hi khap tlat a ni a. Chutiang lam hawi video leh thlalak te lo pholan emaw lakkhawm, zawn leh download thlengin khap tlat a ni a. Hetiang hawi zawnga internet kaltlanga naupang te lo thlem emaw, online chat lo neih pui te chu kum 5 thleng tantir theih leh cheng nuai 10 thleng chawitir theih a ni a. A vawihnihna ah phei chuan kum 7 thleng tantir theih niin cheng nuai 10 thleng chawitir theih a ni.

Section 228A IPC (Disclosure of identity of the victim of certain offences etc.) - Pawngsual leh a kaihhnawih tuartu hming emaw, nihna (identity) tilang thei tur thil pholangtu 

chu kum 2 thleng lungin tantir theih niin pawisa chawi tir theih bawk a ni. 

Section 292 IPC (Sale, etc,

., or obscene books, etc.) - Lehkhabu, thuziak, milem etc dukdaklo (obscene) hralh te pholan leh zawrh chhuahte hi phal a ni lo a, chutiang titu chu kum 2 tantir leh Cheng 2000/- chawitira hrem theih a ni a, a tinawn a nih phei chuan kum 5 tan leh cheng 5000/- chawitira  hrem theih a ni. Section 293 ah chuan heng lehkhabu, thuziak leh milem dukdaklo te naupang kum tling lo hnena a lo hralh a nih chuan a chunga mi ang khian hrem theih a ni bawk. 

Section 354A IPC (Sexual harassment and punishment for sexual harassment) - Hmeichhe duh lo chung thlalak leh milem dukdak lo inen luih tir hi Sexual harassment a ni a, chutiang titu chu kum 3 thleng tantir theih niin, pawisa chawi tir emaw a pahniha hrem kawp theih a ni ang. 

Section 354 C IPC (Voyeurism) - Mi tupawh hmeichhia saruak emaw, kekawrte leh kawr hnuai nen chauha a awm lai a lo bihthla emaw, thla lo laksak emaw hi 'voyeurism' an ti a. Chutiang titu chu kum khat aia tlem lo, kum 3 thleng tantir leh pawisa chawi a hrem theih a ni a. A tinawn a nih phei chuan kum 3 aia tlem lo, kum 7 thleng tantir leh pawisa chawia hrem theih a ni. 

Mizoram ah hian Cyber Crime Police Station pakhat kan nei a, Aizawl ah awmin, SP CID Crime hnuaia peng khat angin a awm a. Mizoram mai ni lo, Mizoram pawn leh India ram pawn lam aṭang thlengin complaint an dawng a. Kan police lamte an thawk rimin a theih ang ang in heng Mizo mangang te hi an lo pui ṭhin a, tunlai hian mipat hmeichhiat rawngkai ni lo, cyber khawvela sum leh paia in bumna (Financial crime) a turu hle mai a, Mizo te sum lama kan mitdel zia, kan at huai zia leh bum kan nawm zia a pho lang chiang hle mai a, hei bik hi chu nidanga sawi atan khek ang. Khawvel a ni miau a, sualna a pung zel a, tumah indem thei kan ni lo a, amaherawhchu ṭhalai naupang zawk te Cyber khawvelah hian fimkhur kan in zirtir thar a ṭul hle mai a, tupawhin ṭan kan lak thar hi kan mawhphurhna a ni awm e.