Mo fel

 ZALÊN - DR HREKIMA TITI

MO FEL

~Dr. C. Lalhrekima
Feb 20, 2022

Mo fel nei te inchhung a nawm tehlul nen maw! Mo an neih atanga chhungkaw thang changkang chho ta zawt zawt te, hlim leh nui thawm pawh a awm ngai tawh lohna in chhungah nui ri leh awr awr theite an awm lawi si. An pasalten an thihsan hnuah pawh chhungkuain an chelh beh tlat khawpa uiawm an awm fo mai. Pasala chhungte tan malsawmna ropui tak nih theih dan hi a awm ang maw le!

An nula thawmhnaw zar lai chung ngata ke tahna pho hnan siah duh mo sual a awm a ni awm e! Pasala nute ân khum hrep ngam te, kek ta chawt chawt te, tihtauhsan nghawng nghawng te, a thlaa thla nu leh pa be duh miah lo mo an awm thin an ti! Mo neih fuh loh avanga nu leh pa rum ta tlawk tlawk, an fapa berin a hmangaih si avanga ngawi renga tuar ngawt ngawtte an awm a ni awm asin!

Mo fel neite inchhung a nawm tehlul nen maw! Mo an neih atanga chhungkaw thang changkang chho ta zawt zawt te, hlim leh nui thawm pawh a awm ngai tawh lohna in chhungah nui ri leh awr awr theite an awm lawi si. An pasalten an thihsan hnuah pawh chhungkuain an chelh beh tlat khawpa uiawm an awm fo mai.

Pasala chhungte tan malsawmna ropui tak nih theih dan hi a awm ang maw le!

Pasal chhungte zawng zawng va nei tel thiam a, chhungkaw thuikhawma phuar nghettu hi an lo awm tak tak thei a. Zanriah ei kham veleha pasalte mit mei zeuha pindana tawm nghal daih chi ni lo, nu leh pa leh chhungkaw bula titi siam siam thinte hi an lo ngaitawm hle a lo ni awm e. 

Unau mipa hlir paruk kan ni a. U berin nupui a neiha nuam kan tihzia kha aw! Kan monu lah kha a nui ar ar reng thei a, a titi siam siam a, a fel bawk a, chhungkaw boruak kha a kâng dawrh dawrh mai maw le! Kha chen mahni thawmhnaw lo su thin min han suksakte kha a va nuam tak!

Lungawi loh leh hlim loh ve pawha pasala chhungte bula awm dan tawk thiam mo zei tak hi an awm. Thawk aphita tlan zel tum lem lo, pasala chhungte rel rel lote hi mo tha an lo ni mai fo. 

An va lawinate kha an chhungkua tak tak an ni tawh tih pawm mai, a neitu rilru pu, tu bulah mah pasala chhungte timualpho duh miah lo mo an tam mai. Eng emaw hlek apiang inngaihbel zel lo, thinrima la zel lo, mi dinhmun hrethiama dawhthei leh rilru zau, thinrim ve tum pawha a awm tawk taka tilang mai, thinrimna pai rei loa ngaihdamna thinlung pu leh thei thin, mo rilru hrisel leh rilru zau, piangthar tha hian inchhung an tinuam em em a ni. 

Pasala chhungte rel rel ngai lo hi an fakawm mai bawk. |awng tur chin hre lo hian khawvel an tibuai fo. Mo tawrhchhel tak pakhat, lungawi taka an indang ta nia an ngaih chuan a unaute hnenah, “Khawvela nu sual ber ka hrawn tluan thei a,” a lo ti leh kher a. An lo hre leh si a, an buai zui leh nasa hnuhnawh ta a ni awm e! Mahni infak nana rilrua awm zawng zawng sawi chhuah paha mi dang khak tel zauhte hi a tul lo ngawt reng a ni. Thu dik pawh ni se tawng chuangtlai hi a awm ve. Rilrua awm zawng zawng sawi chhuak kher lo, mahnia pai dai zui thiam mo rilru tha hi an lo tam hle si.

Sum leh pai enkawl dan leh ro insem dan vela thu va neih ve phet tum lo, pasala chhungte sum lo enkawl dan ang anga va invuah rem ve thiam mote hi an lo fel awm khawp mai.

A huna inthlahrung thiam tak, a huna zei leh har si, ri phawr phawr si lo, ngawi ngil ngel ni bawk si lo bula awmte hi a nuam a nia! A hun hre tur chuan fin a ngai ve khawp thung. Mo fing chuan chhungkua an tinuam thei teh a nia!

Lawm nachang hre takte hi an hlim a, an bula awmte tan a hlimawm bawk. Pasala chhungte a tawk leka fak thiam, pasalte bula a nu leh pate leh unaute thatna lai sawi thinte nupa nun hi a hlim zawk thin. Zan tina pasalte bula a chhungte rela vui rengte hian an pasalte rilru an tikawi a. Chumi chuan kawng hrang hrangin kaw tha lo a hreuh hret hret thin. Ka nupuiin ka chhungte a fak hian ka hlim tlat zel a, ka nupui duat ka châk sawt zel a nih chu!

Pasala chhungte tupawh zah thiam chi an awm. Anmahni an zahawm let zel thin. Mihring inlaichinna thu hlaah inzahtawnna hi a pawimawh vel vek e.

Mo neiten an mote rilru hrethiam chunga an lo enkawl dan tur, ‘Mo rilru’ tih thupui hmanga ka ziah tawh lo chhiartu, Chanmari nu pakhatin a pasala chhungte nena an inlaichinna a that dan thuruk nia a hriat min rawn hrilh a. Fiamthu a thawh thin dan te, a pasala pa thlenga a fiam bawrh bawrh dan te leh inchhunga a awm vel dan a sawite chu a ngaihnawm asin!

Ka nupui bulah, “Ka nuin tawngkam thain vawi 100 a biak che hre reng duh loa i lungawi lohna tur vawi khat a sawi i hriat reng chuan chhungkua kan hlim ngai lo ang,” ka ti.

Mawi loah min lo ngaihsak lo ula, kan mote ka’n fak ve lawk! Mo paruk kan nei ve ta a, kan in chhung tana malsawmna ropui tak, chhungkaw tihlimtu leh phuarkhawmtu an ni hlawm vek mai hi a ropui ve tlat. An rilru a tha hlawm a ni, a lo enkawltute kan sual hlawm tehlul nen hian!