NIGHTINGALE OF INDIA LATA MANGESHKAR KAN CHÁN TA!

 NIGHTINGALE OF INDIA LATA MANGESHKAR KAN CHÁN TA!

By: Zairemthanga

'A zai thiam lutuk a, a thih hnu-ah a hrawk zir chian an tum' kan tih thin, Queen of Melody, Nightingale of India Lata mangeshkar chuan he khawvel hi a lo mangtha ta.! A chanchin tawite han tar lang ila.

Lata hi 28th September, 1929 khan a lo piang a, black and white hun lai atanga Aishwarya Rai-te hunlai thleng khan Bollywood Industry ah Playback singer a ni thei. A awmzia chu pitar ni tawh si kha nula aw (voice) angin a la zai thei tihna a nih chu. Tunlai ṭawngkam takin bon tak a ni. A pa Dinanath Mangeshkar pawh zai thiam tho niin naupangho zai a zirtir thin a. Mahse, Lata erawh hi chu a zirtir ngai lo. Nikhat chu a pa student pakhat chuan a hla sak a sa dik lo a, Lata hian a rukin a sak dan tur dik a lo zirtir a, chu chu a pa hian a lo hre ru khiau mai a, a nupui hnenah hrilhin Lata pawh chu zai a zirtir ve ta nghal a. Tichuan, vawikhat chu stage-ah a pa leh mi pakhat zai tur an nih laiin a pa zaipui tur hi a kal ta tlat lo mai a, Lata hian, 'Ka pa, keima'n a ai ka lo awh ang e, mipuite rilru ka hneh ang a, zai nawn turin min ti hial dawn a ni' tiin inringtawk takin a sawi a. A pa hian awih lutuk lo mah se, kawng dang a awm miau loh avangin a zaipui ta a, Lata sawi lâwk ang ngei chuan 'once more' tiin an au rual dual dual ta mai a ni.

A pa hi aienthiam kan tih ang chi, Astrologer a ni a. Ani hian Lata naupan lai hian, 'Bawihte, rei ka dam dawn lo a, nang hi chhungkaw innghahna tur i ni. Chuvangin, pasal pawh i nei dawn lo' tiin a hrilh a. Lata hian la hrethiam vak lo mah se, a hnu lawkah a pa hian a boralsan ta tak tak a. A pa sawi ang ngeiin pasal pawh nei loin a nula tluan ta ṭhak a ni. India rama chawimawina sang Bharat Ratna, Padma Bhushan leh Padma Vibhushan te pawh a lo dawng tawh a, India hian a neih rohlu ropui tak a chán a tih loh theih loh. Bollywood mai bakah Marathi Film-ah pawh zai tura sawm a nih angin a zai thin a, hetih lai hian a hming hi thlakin 'Anand Ghan' a inti a. Award semna-ah koh chhuah an han tum a, amah chu awm reng mah se, a chhuak duh tlat lo a. Mahse, an koh zin tak êm avang chuan Lata chu a chhuak ta a, Anand Ghan chu Lata Mangeshkar ngei a ni tih an hre ta chauh a ni.

Award lam hi chu a dawng tam khawp a, sawi sen pawh a ni lo. A upat deuh hnu kha chuan Filmfare Award pawh thalai zawkte tan tiin a kian a, a la duh tawh lo hial zawk a ni. A hun lai kha chuan Asha Bhonsle, Kishore Kumar leh Mohammed Rafi te nen khan tluktu rêng an awm lo a, Bollywood film industry-ah an vawk lal len a ni ber mai. Lalta Mangeshkar hi khawvela hla record hnem ber a ni bawk. 

Thu belh: Ka hriat a tam lo a, ka hriat ang ang ka lo share ve a ni e.