NUTHLAWI VANGIN

 NUTHLAWI VANGIN!

Nula an awm chuan nuthlawite pawh an awm tur reng a ni a, mahse, nuthlawi an nih vang ringawtin nula te ai an hniam bik em em na awm in ka hre lo. Nuthlawi mai mai tih chang a awm thei fo bawk, mahse,mai mai lo tak pawh an tam ngei ang, nuthlawi zun hi phurzolo an tam reng ania. Chumi zinga pakhat chuan khawvel a lo deng nghing dawt tawh a, chhiar chhin teh.

1936 December 10 ni chu a danglam riau mai. Khawvel chanchin bu phek hmasa berah hawrawp lianin “England Lalber fapa Edward VIII chuan nuthlawi avangin a lalthutthleng leh a lallukhum a kalsan ta” tiin an ziak kuau mai a, khawvela chanchin mak ber berte zingah a tel pha awm e. Chutih lai chuan khawvel chhim leh hmar, chhak leh thlangah ni tla seng lo ram an awp a ni a, ram pilril ber pawh a fan chhuak ngei ang le. An ram awp: America, Canada, South Africa, Australia, Newzeland, India, Pakistan, Myanmar, Malaysia, Singapore leh South East Asia etc. ram tam tak awptu a ni a, a ram awpte hmun khatah ni a tlak mek laiin, ram pakhatah  ni a lo chhuak mek bawk. Ni tla seng lova roreltu tih a ni.

Chutianga ram ropui lal fapa upa ber Edward VIII leh nuthlawi (Mrs. Simson)-te inhmangaihna hrui nghehzia hi amah Edward-a ngeiin lehkhabu chhah tawk a ziak a, a lehkhabu hming pawh “Lalber Chanchin (A King’s Story)” tih a ni. Edward VIII hi tuna lalnu ni mek Queen Elizabethi pa George VI pianpui upa ber a ni a, heng chanchin hi kum 80 emaw leka upa a la ni.

Khawvel her danglam thei nuthlawi nen an inhmu:

Edward VIII hi sa pel mi a ni a, an ram dana sa kah theih hun an tihah hian a nau Geogre VI nen sa pel turin an ram chhuak thin a. Rin loh takin an thlenna hotel-ah chuan Simsona te nupa pawh an thleng ve a. Simsona te nupa chu America rama cheng tawh England rama pem an ni a, London khawpuiah an awm. Simsona nupui chu pian mawi, inchei dan thiam, thenrual kawm dan thiam bawk, ngaihno bei tak tih a ni. Politic lamah pawh hmeichhe kawm tlak niin an sawi.

Chu mi tum chuan Edward-a nen hian an inhmelhriat a, pasal pawm lai nei a ni na a, a rukin an inhmangaih ta tlat mai le. Hun rei vak lovah inhmuh leh tumin an inthen rih phawt. England ram lal danah lalber fapa chuan mi naran mai mai hi an kawm tur a ni lo. Mahse a insum zo ngang lo a ni ang, a rukin nuthlawi hnenah chuan a leng thin a. An inhmangaihna a sangin a thuk tial tial a, inneih hial an tum ta. Khawvel sawinghing thei nuthlawi a ni dawn (It is love that turns the world go around).

Edward-a tana harsatna khirh tak:

An inhmangaihna hrui chuan a phuar nghet deuh deuh va, an duhthusam lian ber chu “Run hmuna len dun” hi a ni ta. Mahse an inkarah harsatna khirh tak a awm sa reng.

1772 kuma England lalber fapa nupui neih tur chungchangah heti hian dan khirh tak a inziak. “Lalber fapain nupui a neih dawn chuan Kumpinu leh Parliament memberten an remtihpui tur a ni” tiin.

Edward-a pa thih veleh:

Edward-a pa George V chu kum 70 mi niin 1936, January 17 niin a thi ta a. Edward VIII hi fapa upa ber a nih avangin heng a hnuaia nihna leh chanvote hi a ta tur an ni.

• Lalber (King)
• Sipai lalber – (Field Marshal)
• Thlawhna sipai lalber – (Air Force Marshal)
• Lawng sipai lalber – (Admiral)

Lalber nihnaah hlan kai a ni:

A pa George V thih atanga thla ruk chhung chu lalber sun hun atana ruat a ni. An hun tiam chu July 20, 1936 niin a kim ta. Edward VIII pawh ni tla seng lo ram awptu lalber dinhmunah a ding ta. A ngaihzawng nuthlawi len mawii pawhin he thla ruk chhung hian Roreltute hnenah a pasal Simsona thenna tur lehkha a lo chingfel ve bawk a, Wallis Simson (Simsona nupui) ni tawh lovin Nuthlawi Wallis-i a ni ta. Thla ruk kim hma chuan pasal a nei thei bik lo.

Thu pawimawh an rel:

England ram lalber leh mi naran Wallis-i inneih an tum ta mauh mai si a, Prime Minister Baldwin-a leh Parliament Cabinet-te an phi buai ta. An rorel thu tlukna chu:

Lalberin mi naran nupui atana a neih chuan Church of England chuan a hriatpui lo vang.

Edward-a hian Wallis-i a neih chuan lalber (king) a nihna a tawp nghal ang.

Edward VIII chu England rama kir leh tawh lo tura hnawhchhuah a ni nghal bawk ang….tihte hi an ni.(pui riap riap tak ani.)

Hengte hi Edward-a hmaah an pharh a, pakhatmah a zawm thei ta lo. Pakhat mah a ni tawp! “Nuthlawi Wallis Simsoni ka nei dawn” tiin a chhang ta mauh mai le. Ama duhthlanna ngeiin a chungah dan lek kawh a ngai ta, a rapthlak hle mai.

Chhungkua inthlahna:

Edward-a nu, a pianpuite leh chhungkua an kim vek. Inthlahna dar an vaw ri ta. An ngawi reng a, mittui a far zawih zawih a, eng thu mah an sawi thei lo. Nuthlawi pakhat avangin ram ni tla seng lova roreltu lalber (king) nihna a kalsan a, England rama hawng tawh lo turin nuthlawiin a lo nghahna France ram a pan ta.

“Ka nu ka naute dam takin awm ru, lal lai pelin zamual ka liam tang e” tiin an invai liam ta a ni.

A her liam ta:

Hmangaihna chu engmahin a dang zo lo. Edward-a chu amah chauhvin, vengtu leh thlahtu pawh nei lovin lawng tereuh te, mite hriat lohvin a chuang a, December 12,1936 zing lam dar 2:00-ah England ram, a nu leh a unau lainate, then leh rual leh England mipui hmu tawh lo turin nuthlawi-in a lo nghahna France ram panin a kal liam ta a ni.

Edward a chanchin hian khawvel a deng chhuak a, Mizoram pawh a hmaih bik lo. Heti hian tlanglam hla an phuahsak nghe nghe asin.

Lo kir leh mai rawh Edward hmel tha,
I chun leh zua anka tui ang a nem e,
Lal leh la kan ti zaleng zawngten.

 

Ram ni tla seng lova roreltu, 

A pawi mang e nuthlawi lengleh annemi,

Lal a kai zo lo nuthlawi vangin.

Ka nu ka naute dam takin awm ru,
Lal lai pelin zamual ka liam tang e,
Kum tluanga ka hmangaih ka then ai chuan,
Parliament thuin ka nau lal mai rawh se.

Tiin.

Source : FB