GAS NEW CONNECTION HMANGA MIPUI RAWKNA

GAS NEW CONNECTION HMANGA MIPUI RAWKNA

Kumin August thla tawp lam khan Gas Distributor pakhat kaltlangin gas double connection ka la ve a, Rs. 8,700/- ka chawi a. Hetiang zat pawisa hi ka pe ngei a ni tih tarlanna, Proper receipt ka dil luih tlat avang leh min pek theih si loh avanga kan buaina kal zelah Indian Oil Corporation (IOC)-ah complain ka thehlut a, Consumer Dispute Redressal Forum (Consumer Court) hial kan thleng nghe nghe. Ka chawi tur aia tam chawi ni a ka inhriat miau avangin ka chawi tur aia tam min chawitir chu min pekir leh turte, rilru hrehawm taka min awmtir mante, court thlen nana ka senso sum engemawzat chawi turin Gas Distributor-te chu ka khing ta a. Amaherawhchu, ka khin distributor-te hian tunhnuah consumer-te hnena an chawi tur aia tam lak tawh loh an intiam theih avang leh court-a ka demand angte min pek an remtih avangin court pawn lamah kan inrem ta a ni.

Kan han chhui zau deuh a, Mizoram a Gas distributor tamzawk hian gas new connection fee a chawi tur pangngai aia tam daih pawisa an lo la reng thin a ni tih kan hrechhuak ta zel a. Aizawl chauh ni lo, district hrang hranga Indane gas consumer-te chu dik lo taka sum tamtham tak eisak kan lo ni reng mai. Mizoram, Kristian ramah hian langsar taka dan bawhchhiatna, consumer-te bumna lian tak a lo thleng nasa hle a ni tih kan hrechhuak ta a ni. 

Indian Oil Corporation (IOC) -in Gas new connection fee tur an tarlan dan chu hetiang hi a lo ni a (double connection, domestic bur hman tlanglawn ber 14.2kg rate angin) :

1) Security deposit –Rs. 2300/-

2) Pressure Regulator – Rs. 150/-

3) Hot plate (gas stove) inspection charge – Rs. 250/- (Hmun danga mi gas stove lei chauhin)

4) Administrative charge – Rs. 50/-

5) Installation charge – Rs. 50/-

6) Gas Card  – Rs. 50/-

7) Filled cylinder (double) – Rs. 1444/- (direct benefit transfer hmangin i bank account-ah Rs. 578/- a lo kir leh ang)

TOTAL - Rs.  4294/-

 Rubber pipe-te, gas lighter-te, gas stove (hot plate)-te hi Distributor hnen atanga lei kher a ngai lo a, min lei luih tir thiang lo a, kan duh chuan bazar a mi pawh kan lei thei, Consumer thu thu a ni. Amaherawhchu, Gas stove hi hmun danga mi kan lei a nih chuan check tir (inspection) a ngai a, number 3 a mi ang khian Rs. 250/- chawi a ngai thung. 

Hetianga ngun taka han zir ve neuh neuh takah chuan Gas connection fee hi double-ah pawh Rs. 4500/- aiin a to thei lo hrim hrim a ni tih a chiang ta hle a ni. Hei aia a to na zawng zawng chu Gas stove, lighter leh pipe man vel a ni ta tihna a nih chu! Gas connection fee-ah engzatnge i chawi tih ngaihtuah la, i gas stove kha engzatin nge i lei tih chhut teh le? 

Mizoramah hian Gas (LPG) distributor hi 50 vel an awm a, new connection fee an lak zat pawh a inang lo thluah mai. Telephone kaltlanga anmahni ngei kan zawh atanga kan hriat theih chin tlemazawng lo tarlang ila (new connection double fee):

1) Caravan Gas, Zemabawk – Rs. 8,900/-

2) Biakkungi Gas, Chanmari – Rs. 8,000/-

3) Zothan Indane, Luangmual – Rs. 8,500/-

4) MIZOFED, Aizawl – Rs. 6,040/-

5) V.Neihkunga Gas, Bawngkawn – Rs. 8,900/-

6) Zopuii Gas, Vaivakawn – Rs. 8,500/-

7) M & B Indane, Khatla – Rs. 8,950/-

(Note: Agency tam zawk chuan fimkhur takin ‘vel’ tih tawngkam an hmang- eg. Rs. 8,950/- vel  - HP)

 Heta tanga chiang ta em em chu mipuite hian kan chawi tur aia tam daih Gas distributor-te lakah hian kan chawi char char tih hi a ni. Consumer tamtak chuan Connection fee pangngai kan chawi bakah Gas Stove tha vak lo, two burner kha to uchuak takin (Rs. 4000/- chuangin) kan lei char char tihna a ni (Rs. 4,000/- chuan 3 burner tha tak a lei theih daih si a). Tin, Legal Metrology rules leh Consumer Protection Act-in a phut danah chuan Gas stove pawh hi ISI chuang ngei tur a nih bakah printed price a hralh tur a ni. I gas stove lei tel kha a Maximum Retail Price (MRP) en teh le? MRP-te kha a lo in thaichhe daih lo maw? (Kei pawh MRP hi hriat theih miah loh a thaichhiat vek a ni - HP). A lo inthaichhiat ve hlauh phei chuan Consumer Protection Act, 1986 bawhchhiatna diktak a ni dawn a ni. 

Chawi tur aia tam i chawi a, Consumer Dispute Redressal Forum (Consumer Court)-a khinlet i duh ve a nih chuan theihtawpin kan lo pui ang che. A tul a nih chuan Company (IOC)-ah te, Central Ministry lam thleng pawhin kan zualko zel mai tur alawm.

 Mizoram-ah hian mipui kan fel lutuk vangte, thil kan chik loh lutuk vangte leh kan huaisen tawk loh vangtein Consumer kan nih anga kan chanvo kan chang pha lo nasa hle a. Company hrang hrang, sumdawng pawl leh mimal a duh apiangin kawng hrang hrangin, harsa taka kan thawhchhuah sa sum tamtak dik lo takin min laksak hiau hiau mai thin a ni. Chuvangin, hetiang mite laka kan him zawk theih nan mipuite hian thil chik lehzual ila, duh khirh ve deuh deuh ang u.     

- C.Lalhriatpuia

Ph. 9612319611 / 0389-2315406 (O)

Email : clalhriata@gmail.com 

Source : FB