Nu leh Pate hnena 'THURAWN'

NAUPANG SAWISAK DÂN!

~Rev. Lalbiakhlira 

Naupang sawisa țhinte hian "Ka thunun!" kan ti țhin. Ni e, thunun ngâi pawimawh mî chu mi ropui tak a ni. Mahse, thununna dik a awm a, a dik lo pawh a awm. Engnge kan dinhmun ni hlawm le?

1. Thunun chhuanlamin i fate kha i thinrim hrîk thlâk nân hmang ngâi suh. An lu lamah i beng thawr țhin em? Pathian pêk an beng  kha vawn chhana hmangin pawtin khâi mai mai suh. An kut phah leh mawngtam bâk pel ngâi suh. Chu pawh tihnat kher kher a ngâi hleinêm. I thunun nge, hlei i lên zâwk in zâwt ang che. Thununna chu a hrisêl a, a rawvá ve ngâi lo.
2. Pindan thim leh rehah khung ngâi suh. Bual in leh pâwn khaw thim te pawh an ngeih lo. An hlau, an chí-âi, an khûr. An thâuah hlauhnain a man tawh chuan a râpthlâk! Hlauhna chi hrang hrangin a bawhbet thei! I thununna chu hrisêl ngei rawh se.
3. An tih sual lâi ni lo, a hnû deuha thunun bânsan rawh. An ngeih lo. An tihsual lâi ngeiin thunun la, a man thiam ang. A theihnghilh hnua i thunun teh chuan misual tak, fate kutthlâk chîngah a ngâi ang chia, i hlawhchham khawp ang. A hun dik takah aw.
4. Naupang thununtu puitling chu i thinrim thiang lo. I thluak fîm ngêi rawh se. Naupang țhanglâi tisa hi nang, puitling thinrim kutthlâk nân chuan a nêm lu deuh! Ramtuileiloah i chhuah thei a, i tihlum hial thei asin! Bible-in, "In fate tithinur suh ula, Lalpa thununnah leh zilhnaah chuan enkawl zawk rawh u" (Eph 6:4) a tih che hi.
5. Mi zîngah, mi hmuha fate thunun țha anga lan khêlin thunun ngâi suh. An țhatpui lo. An khawvêl, an innghahna, an inhumhimna berin, mi mit hmuha i tihzah tlatte chuan 'him lo nih inhriatna' a țhan lenpui ang a, a tâlbuai hlen mai dâwn a sin. A hmun dik thlang ang che.
6. Naupang tisual hnênah, "I nu leh paten kan duh lo" tih a tâwk lo, "Pathianin a duh lo, keini pawhin kan duh lo" ti chat chat zâwk ang che. Bible-in naupangte hnênah, "Lalpaah chuan in nu leh pate thu zâwm rawh u" a tih kher kher kha (Eph 6:1). An lu chungah kut nghata i țawngțaisak zel chuan i hlawhtling ngei ngei ang.
7. Mi dang ang nihtîr tumin thunun duh suh, tumah a ang thei lo! A tâl buai hlen mai ang. Amah, Pathianin a siam ang tak khân, a nihna ang ang khân pawm la. Amah rau raua a duhawm ber, a țha ber nihtîr tumin thunun zawk rawh. A puitlin hun pawha "LALPA țih, sual kalsan" (Thuf 3:7, 22:6) ni ngei turin thunun la, i nihlawh ang.
8. Naupang chu kum 9 a tlin tawh chuan kutthlâk bânsan daih rawh. Fak la, fuih la, țha takin zirtir la, hrilhfiah zêl rawh, an ngeih tawh zâwk. Kum 12 an tlin tawh phei chuan puitling ang takin en tawh la, a țhang țha ang. I chak loh vângin, "A harsa!" ti dût dût suh, i tum ve tur alâwm. Vuak hrepa țha thei a ni tawh lo. A chhiatpui loh pawhin i chhiatpui ngêi ang. 

Chhûngkaw țha leh hlawhtling ni turin, a kawng dikin, naupang thunun ang aw. "Tiang hmang duh lo chuan a fa a hua a ni, a hmangaihtu erawh chuan a thunun chawt țhin" (Thuf 13:24) tih ziak a ni si a.