Punjab AAP Sawrkar thar

 Pro people >>>

AAP SORKAR HNUAIAH PUNJAB KALDAN TUR A LANG ZEL

Corrupt officers have no place in my government and if any such complaint comes to my notice, then don't expect any sort of sympathy from me."     ~Bhagwant Mann, Chief Minister of Punjab

MARCH 17, 2022 :

Bhagwant Singh Mann chu niminah (16/3/22) Punjab Chief Minister atan lakluh a ni a, vawiinah MLA thlan thar zawng zawngte chu Assembly ah MLA atan lakluh an ni leh a, Inrinni hian Minister te lakluh leh an ni ang.

Vawiina Punjab Assembly a MLA te lakluh inkhawm zawh hnu hian Chief Minister Bhagwant Mann chu CMO lamah tih tur pawimawh a neih avangin khawiah mah tàwi muang loin a kal nghal a. Punjab chhunga Officer lian (civil and Police) te nen inhmuhkhawmna tawi te an hmang a. 

Bhagwant Mann hian a kaihhruai AAP Sorkar kalpui dan tur tawi te a sawi a, a tlangpui chauh tarlang phawt ang.

Anti corruption helpline

Punjab mipui tupawhin an hman theih tur anti corruption helpline Bhagat Singh Martar Ni March 23 ațangin hawn a nih tur thu a sawi. 

A sawi zel dan chuan helpline hi ama mimal WhatsApp Number hman a ni ang. Punjab mipuite chu hlemhletna leh thil dik lo leh eiru nia an hriat te chu video/audio record a he WhatsApp number ah hian thawn țhin turin a ngen lawk a ni. Thil dik lo titu te chungah hremna khauh tak lekkawh a ni ang tih Punjab mipuite hnena a tiam thu a sawi a. "Punjab ah corruption a awm tawh lo ang," a ti. 

Sorkar țha taka thawhpui turin a ngen

Chief Minister chuan Sorkar hnathawk Civil leh Police te chu Punjab mipuiin AAP kuta thu neihna an hlan angin țha taka thawhpui turin a ngenin a beisei tlat dawn tih kalkhawm officer lian te hmaah hian a sawi. 

A sawi zel dan chuan Punjab mipuiten AAP an thlan tlin chhan chu mipuiin tunhma lama Sorkar thianghlim lo leh țawp tak ang ni lo an beisei vang a ni. Thuneihna leh rorelna tak tak chu  Sorkar thlangtu Punjabi mipuite an nih avangin mipui tan kan thawk ang. Kan hnam Punjabi hi hnam ropui tak a ni a, he a ropuina tlu chhe tawh hnu hi kan tung ding thar leh ang a, "Punjab tak tak siam hi kan tum a ni, London, California, Paris ang ni lo," CM chuan a ti. 

Mipui tan kan thawk ang

"Civil & Police officer te zingah rinawm, taima leh dik tak an awm tih kan hria a, in inpekna leh thawhrimna te kan chhuang a. Mi naran leh mipui nawlpui ngaihsak leh an tan thawk a, zah turin ka  ngen  che u a, chutiang in tih chuan keini pawhin kan zahin kan chawimawi ang che u. Mipui kawng hrang hranga an hmasawnna turin kan thawk ang," CM chuan a ti. 

"Ka Sorkar-ah hian officer hlepruk ching tan hmun a awm lo, chutiang ti ka hriat emaw miin an complaint chuan ka hnen ațangin khawngaihna an beisei tur a ni lo." Chief Minister chuan Officer lian kalkhawm te hmaah chuan a sawi. 

A sawi zel dan chuan Civil & Police officer te tan Best Performance Award siam a ni ang a, hei hi thla thum dan (quarterly) a puan țhin a ni ang. 

Chief Minister chuan Punjab police inkarah inunauna leh inpumkhatna a lo that zual theihna turin DGP chu police family member zawng zawng te an birthday ah lawmpuina thawn turin a hrilh bawk. 

He inkhawm pawimawh tak hi Punjab Chief Secretary Anirudh Tiwari chuan a kaihhruai a. Chief Secretary chuan Sorkar thar duh dan ang ngeia mipui hamțhatna (pro people policies and programs) hlenchhuak ngei turin Punjab state hnuaia Sorkar hnathawk zawng zawngin inpekna, chona thar chu rinawm leh taima takin an thawk dawn a ni tih thu a sawi bawk. 

Source :

The Tribune

March 17, 2022 

==17032022==

Huna Kawlni Kawlvawm