SAVE MIZORAM RIVERS

SAVE MIZORAM RIVERS PAWL ENG VANGA DING NGE, ENGE TIH A TUM? 

~Vanneihthanga, Convener SMR

24th May, 2022 (MSR) : Save Mizoram Rivers (SMR) hian enge a tum, engte nge a hma chhawp, chungte chu engtia bawhzui nge a tum?..tih hi mipuiin kan hriat hmasak tulin a lang a, tawi fel deuhin sawi i han tum dawn teh ang. 

Lui tui bawlhhlawh chu

Pawl din hrim hrim hi mi tam tak chuan an hne a, an ner nghal mai a, an demawm hran lo. Mizoramah hian pawl a tam tawh em mai a. He pawl SMR hi Sorkar ep tura din emaw lo ti nghal maite pawh awm theih a ni a, SMR hian a tul hunah sorkar hmalakna theihtawp chhuahin a thlawp dawn a, a tul a nih erawh chuan sorkar kalphung dik lo nia a hriatte huai taka dodalin kawng dik leh tha zawk a kawhhmuh thin dawn a ni. 

Hmasawnna kawng hrang hrang avangte leh, dan lo anga Mizorama lui kam reserve kan khawih chhiat nasat avangte,  kan bawlhhlawh leh leivung paih dan dik lo avang tein kan rama lui tam tak dihmun hi a tha lo takzet ta a ni. Kan ram luite humhalha chhanchhuak turin engtin nge hma kan lak dawn a, eng chin hi nge kan tihtura kan dah, ram tana ke pen kan tum dan; work plan mumal tak duan a ni a, hmalakna tur a tam hle. A hminga pawl hruaitu mi tlemte tana tihngaihna awm lo, mipui nawlpui kan tan hona tur chite pawh a awm thin dawn a ni.

Tlawng lui bikah : Tlawng lui hi a hnar lamah Lunglei khawpui chawm nan pump hmanga lak a ni a, Aizawl khawpui chawmtu a ni bawk. A lui dung kai hrang hrangah balu la-a eizawng leh lui lam sa chi hrang hrang zawnga chhungkaw chawm tam tak an awm a, Tlawng lui hi kan nunna hnar pawimawh tak a ni.

A lui kam ngaw kan tih chereu nasat lutuk tawh avangin Tlawng lui fintu lui tam takte chu thal laiin an khawro zo tawh a. Thal tui tlem laiin Tlawng tui duh khawp pump tur a awmlo ta fo mai a ni. Fur a lo ni a, pump tlak loh khawpin tui a bawlhhlawhin a nu leh thin bawk si. Heng harsatna hi kumtin a zual zel a, ngaihtuah chian chuan a manganthlak viau a ni. A luikam tawn tawn mel chanve (800 meters) ve ve hi kan Reverine Reserve Forest (RRF) dan khan a humhalh a, chuti chung chuan a lui kam dung tluan hi mimal ramin a khat deuh vek tawh niin a hriat a. Heng mimal ramte hi dan lo anga neih a nih angin, hengte hi dan hmang veka kan sual hmasak tur a ni ang. RRF dan kha mi pamham thenkhat ten hnawk tiin High Court-ah an khing a, hemi chungchangte thleng hian he pawl hian theihtawpa buaipui a tum dawn a ni. Hengahte tak hian mipui kan tanho a tul hle ang.

Abik takin Aizawl khawpui tlak lamah Serlui leh Tuithum luite atangin Aizawl khawpui leivung leh bawlhhlawh chi hrang hranga a luang lut nasa em em a. Fur puiin min nang tan a ni tawh mai si a, Tuithum hnar lama mimal rama bawlhhlawh leh leivung paihna AMC lamin phalna an lo pek ve mai thin nia sawite thleng hian a tih tawp dan kan zawn a ngai ang. Reiek kai Tlawng panna kawngpui sir hmun hrang hranga, mimal rama leivung leh bawlhhlawh paihte hi Aizawl khawpui chawmtu pakhat, Phase-1 pump-na chhakah Serlui atangin Tlawng luiah a luang lut vek a. Hei hi rang taka tih tawp a nih theih nan, hemi veng tur hian check gate te siamin darkar 24 chhung duty indah a ngai hial ang. Chutiang ti tur chuan sorkar kan beisei phawt anga, sorkarin a ti thei lo a nih chuan, mipuiin pawisa thawhkhawmin hma kan lak hial a ngai maithei.

Hmasawnna hrang hrang, a bik takin Mizorama rail kawng sial hna thawh mek leh NH kawng zauhna NHIDCL hmalak mekna hian kan luitui leh environment nasa takin a ti chhe mek bawk a. Heng development hna thawh mekah hian dan zawm tur tam tak a awm a, chung dante chu Mizoramah hian nasa taka palzut niin a lang a. Kawngpui sial hmain Environmental Impact Assesment uluk taka tih a ni em? Environmental Clearance lak a ni em? Chung dante chu zawm a ni em? tihte chiang taka chhuizui a ngai anga, dan zawm lote chunga action lak a nih theih nan dan hnuaiah nawr a ngai ngei bawk ang. Save Mizoram Rivers pawlah hian dan lam thiam mamawhna pawh a sang dawn hle a, kan ram leh kan hnam tan dan lama kan mithiamte rawn zuangchhuak turin ka ngenin kan beisei a ni.

Kan hma chhawp hi a lianin a hrawl tham dawn hle a, mimal pamham leh dan loa thil tite huat leh do pawh kan hlawh nghal ngei ang tih kan ring. Chung zawng zawng chu kan inhuam a ngai ang. Whatsapp group, Save Mizoram Rivers tih siam a ni a, SMR hmalakna tuipuitute kan lo add zel ang che u. Kan puanvente sawichhingin kan ram tan i thawk tlang ang u.