CYMA

 CentralYoung Mizo Association

~David Sailo

13th June 2022

Tun hnaiah Social Media mai nilo, Print Media thlengin Central YMA hruaitu ni mek te avangangaih theihin CYMA demna a ri nasa hle mai. Ṭawngkam duhtui lo tak tak pawh hriat tur a awm bawk.

TUNHMA CYMA :

Pawl zahawm leh thawm zawi ruih mai, a seh mual tur thlang thiam tak, ngiau ngiau lo, Sorkar laka tlaktlum khêl lem lo a ni fo ṭhin a, den ṭula a hriat, ram leh hnam thil a den tawh erawh a deng ṭhelh mang ngai lo. Tichuan CYMA hruaitu aṭanga invawrh lara MLA a in Candidate nulh nulh an awm chho ta fo mai a, Minister leh Party ah dinhmun pawimawh an luah chho ta zel mai a, ṭhenkhat CYMA hruaitu laktlak tak te kha Politics lamah chuan beisei pha lo tak te pawh an awm chho ve ta zel a ni.

Politics luhká a ngaihtheih deuh roh a siamtu an awm avang hi a ni mai thei a, kan in thîk chho zel pawh a ang. MLA inthlan hmachhawn hma hian CYMA hruaitu thlan mai nilo, hetiang lam luhkaa hman ching NGO inthlan boruak chu sawi laih tur awm khawpin a ṭang chho tial tial a tih theih bawk ang. YMA General Conference a Branch YMA kalna tur in tum sak tihte kha a ri ta nawk nawk a, tak tak ni maw? Pianna rama kir leh mamawh tak CYMA pawh a lo ni ve tawh maithei!!

TUNLAI CYMA :

An sual, an fel lo tih lam chu a ni hauh lo. Mahse TUNHMA erawh YMÂ-na ah an pha ta lo deuh tih hi mitin deuhthaw ngaihdan a nih a rinawm. Hmanah khan AMC Staff Office kal tur kha NGO angin kan han dang ṭhup mai a, tichuan Champhai ah mipui tam mangkhengin Kuhva tawlhruk duh lohna leh DC sawnchhuah duh loh kawngzawhna ah chuan NGO lian ber YMA chuan "Pressure Group" kan ni lo tiin a in hnukdawk ta daih mai a. Hun a inher zel a, Tlawmngai Pawl inzawmkhawm, CYMA a khaipa ber an nihna NGOCC chuan kan CS Office kai tur dan an han tum leh mauh mai bawk a. Khawilai hi nge Pressure Group nihna leh nih loh theihna lai tur pawh hi thil thleng chho zelah chian deuh a ngai hle.

Tunhma CYMA, thawm zawi ruih, zahawm leh mahni ramri hre bel hle hruaitu ang kha kan tlachham hret a tih theih a, engngemaw huaihawt tum ve hrim hrimna, thawm neih len tum hrim hrimna rawngkaia ngaih theih turah hian a tawp thleng zo lova rik hluai kan ching ta deuhin a hriat a, hei vang hian kan hnung zuitu, Member te rinna kan hloh phah tial tial thei bawk a ni. Chakma Census kan han ti hluai a, a reh zui vang vang a, Tlawng lui humhalh tura hmalakna May 2021 vela a thawm kan hriat hat te kha hriat zui tur a awm ta mang lova, Kuhva tawlhruk in ram a tih chhiat zia te hi Study Team meuh siama an zirna ah chuan "Dan hnuaia sumdawnna kalpui" te chu an thutlukna a ni mauh mai te, tunah Hachhek tlang dung Kuhva, Mizoram thar ngeite chuan a tawrh zia te hi kan zir thleng leh pek lo em ni ang?

"Ram leh hnam humhalh" nana kan CS vai, Pisa kai tur kan dan laiin Vai pakhat Construction Firm hmanga Zoram mipui sum heti zat hnathawh nana kan han ui lo em em mai te, Mizoram History a lang reng tawh tur, PWD hnuaia Tribal ni miah lo Class-I Contractor a hlan kai hmasak ber kan han nei thar hluah te hi thawm neih laihna tura ngaih a nih laiin an reh leh angreng fu bawk si. Hriatthiam a har chang a awm ṭhin.

TUN HNAI PRESIDENT THUSAWI :

Chief Secretary dan tum leh ṭhulh chungchanga CYMA President thusawi;

"Mizo an awm chuan CS atan kan duh mai a ni" tih leh "Central Sorkar beng a thlen tawh avangin dan chhumzawm loh mai nise" tih a ni.

Anmahni mimal kan hmuhsit phak an ni hauh lova, mahse Pawl zahawm tak hruaitu, lehkhathiam rual thu vuakthlak dan en hi chuan "Anni rorel hi chu a ni lo ang" tih luih sak hram a chakawm zawk hial a ni. Mizo an awm chuan Mizo zawng zawng hian CS ah kan duh vek a, Central Sorkar pawh hian IAS kan la neih tlem ang hû in a theih chinah Mizo chu min pe malh malh viau zawk a ni. Zirchianna awm lo ang maia mawlmang taka hmalakna a ang viau a ni. Mipui kan ri laih a, a rawt chhuaktu HRUAITUTE chu kan dem ta tlawrh tlawrh hlawm a, tah chuan chhuanlam mak tak maiin an ti tawp ta. Tlawmngai Pawl a nihna anga tlawm ngama an inhnukdawk hrim hrim kha a lawmawm. "Kan hruai Member tam zawkin min thlawp loh em avangin" huaisen takin han ti ngam phei se chu kan HRUAITU hmuh leh sawt maithei.

Mizo IAS te an auchhuak a, tunhnaiah Central BJP thupuangtu in a khaksual avanga India mai nilo ramdang thlenga a kan kai khawloh nasat zia kan hria. CS dan kha lo kaltlang pui ta se chi inthliarna rawngkaiah ngaiin buaina zau zawk pawh chhuak hial thei a ni a, rampawn a hnathawk kan mi pawimawh zawkte thlenga tawrhna thleng thei hial a ni tihte hi hun lo kal leh zel turah pawh hriat zui a va tha em.

"CYMA Hruaitute hian kan eizawnna hna ṭheuhah pawh ṭhahnemngai takin kan thawk ṭheuh a ni" tiin a sawi bawk a, a sawi dik maithei. Mahse mi tlemte, langsar tak, engnge an thawh tih hriat awl tak tak, tah chuan an taima em? tih thlenga hriat harsa lo an ni. Politics ah an chhungkua engnge an dinhmun ni a eng angin nge an inrawlh tih te, an Sorkar hnathawhna ah dik lo takin an thuneihna an hmang em? tihte thleng hian hriat zawng zawng sawi hi insiamṭhatna a ni lova, President thusawi erawh chîk harsa lo tak a ni. Min hrilh hriat zawng zawng hi chu dahṭha ta ila, keimah ngeiin an zinga pakhat, an thawhpui ka zawh erawh chu "A rawn lang zeuh zeuh" tih hi min chhanna a ni thung.

Kan hnathawhna hmunah YMA hruaitu kan nihna chu zahawm khawpin taimakna in kan lantir nge, kan eizawnna ber tlansan fo in pawn lamah  YMA hmang chuan zahawmna leh ropuina kan va zawng fo zawk tih hi mimal ngaihdan ah bûk mai nise.

HRUAITU NIHNA :

Tukin Article ah Pu HC.Vanlalruata chuan "Kan ram dan siamtu emaw kengkawhtu tur emaw atan CYMA hruaitute hi mipuiin kan thlan ka la hre ngai reng reng lo. Chutianga kan thlan chhuah ni lo ten rorel phet an tum fo avang hian he hnam hi a chhangchhia a, min ti changel hmun a ni" tiin.

Miin CYMA an dem tlawrh tlawrh ṭhin nachhan hi YMA kha a chhe vek a ni lo, a hruaitu mi tlemte te rorelna hian pawl hmai a ti bal fo zawk ṭhin a, he pawl zahawm takah hian CYMA OB hming leh hmel pawh hre miah lo, thlan lai taima em em, lumen zana tlawmngai em em, ram kang ṭhelh, khawtlang rikrum thilah, tuitla zawna ah te tlawmngai em em, YMA em em tam tak an awm a, chungte chu kan enkawl a, kan khaikhawm a, a ni lo zawnga thil a kal chuan  CYMA OB aia YMA tak tak, tlawmngai tak takte hi thikthu chhe takin an awm thei a ni tih thleng hian hriat tel a, "Mizoram pum hruaitu kan ni a, kan tih dan dan" tih lam hawi lova YMA taka hma lam pan a ṭul hle.

TLIPNA :

Tuna hruaitu te hian Member/Mipui leh hruaitu inkara inpumkhatna siamṭhat kawngah nasa zawkin ke pen thei se, amah ngau ngau chhe miah lo YMA, demna thlen phahtu hruaitu kan ni thei tih hre bawk ila. Politics kailawn a hman tangkai fo, CYMA hruaitu nihna hi nuaibo a nih tikah CYMA inthlan boruak pawh a zangkhai zual sawt ngei ang.