Tuilian karah..

Mizo, lawm teh u

(Aizawl Post June 24, 2022)

~Lalhruaitluanga Chawngte

Tuilianin khawpui a chim a, hmuh phak chin chu lui vek a ni ber; lui leh lui lo a hriat hran theih loh. Khawlaiah livir a awm hial a, tuizangkhauh a tam bawk. Chutiang hmunah chuan chhanchhuaktu pawlte'n tihngaihna an hriat loh, tuiliana tang an awm a, tui nei mumal lo chungin tui kam hun an nghak tawp. Mahse vanneihthlak takin an chhanchhuak ta, Mizo an ni tlat a ni.

"Mizo nih hi a lo va han nuam em em! Hnam dang pawhin min awt a, mak an ti," tiin an chhanchhuah tlangval pakhat chuan a sawi.

Silchar tuilianin Silchar Mizote a tibuai mek a, an zingah hian chhanchhuaktu pawlin tihngaihna an hriat loh avanga chhanchhuah lohva awm an awm. An ram Mizoram ațangin țhian chhan thih ngam an thawkchhuak a, chung mite chu Mizo Police an ni. Assam-a chhanchhuaktu pawlte'n an chhan theih loh, hmanraw țha tak tak nei chunga tihngaihna an hriat loh, an Mizo unaute chu mahni inthapin an chhanchhuak.

 

Silchar hi tuiin a chim a, Mizote pawh an buai. Mizoram House pawh tlawhpawh theih lohvin a awm mek. Ṭhenkhat chu chhanchhuaktu pawl 'force'-ho pawhin an chhanchhuah theih lohvin an awm a, tui a khauh tih te, tlawhpawh theih an ni lo tih te, a chhan hrang hrang an sawi. An unaute dinhmun an hriatin, Mizoram ațangin police 29 an thawkchhuak ta a ni.

 

Vairengte ațangin Nilaini khan Mizo police 29 hi engine nei lawng pahnih kengin an chhuak a, bus hlen theih chin an kal hnuah lawngin Silchar an pan leh.

 

Lawnga an chuanna hi lui leh lui ni lo, khawmual chunga tui tling te a ni a, tuizangkhauh a tam, lawng a kal hlei thei lo fo. Kawng a awm mumal loh bakah kawng hriat a har bawk. Harsatna nasa tak karah Silchar hi an thleng.

 

An thlen veleh an unaute chu an zawng nghal a, kawng an hriat loh avangin missionary fapa tlangval Dika'n a hruai. Assam-in chhiatrupna laka mipuite chhan tura a dinte thlen lohna hmunah an kal ta a, tuikhauh leh livir karah, hlauhawm karah an unaute an chhan ta a ni.

 

Silchar ațanga thu dawn danin, June ni 23 chawhnu dar 2 vel thleng khan mi 30 an chhanchhuak a, chawl lovin mi dang an zawng zui bawk. Chhunah khan an zinga pahnih chu ei tur lam turin lawngin Mission Compound an thleng a, Mission Compound lamin eitur an pekte kengin an kir leh. Tlai lamah mi dang pathum an chhanchhuak leh a, raipuar pakhat a la awm tih hriain an zawng leh. 

 

Silchar-ah hian tuilianin power supply a tihchhiat bakah inbiakpawhna pawh a tibuai a, inbiak hleih theih a ni lo. Mizote pawh an inpuiin an țang tlang a, tui in tur te an inpek bakah tuilian karah hian an inchhanchhuak bawk. Mahse hmun inkarkik tak taka awmte hi an inbiakpawh hleih theih loh avangin an chin an inhre thei tak tak lo.

 

Silchar ațanga thu dawn danin, chhanchhuaktu pawl leh sipai an awm khup a, lawng pawh an nei țha, thil dang pawh an nei țha, hmanraw țha ber ber an inchhawp. Mizo tlangvalte hi chu lawng leh life jacket nen an thawkchhuak a, life jacket hi Central YMA pek leh Kolasib District tate a ni.

 

Mizo tlangval 29-te hi Mizoram sorkar leh Central YMA ruahmannaa thawkchhuak an ni a, Vairengte-a awm police, police station-a mite leh ramri-a duty te an ni. Lawng hi Bairabi-a mi a ni a, lawngpu pahnih an tel. Lawngpute hian 'A \ul a nih chuan zanah pawh kan bei ang,' an ti mai.

 

Police 29-te hi hman ni lawka an raldote state-ah an unaute tan an thawkchhuak a, tuithiam vek pawh an ni lo; hrui thlun te pawh a ngai ang, lawng pawh ven a ngai a, motor pawh ven a ngai thei tiin, ' țhian chhan thih ngam hnam kan ni alawm,' tiin, a hma lawka an raldote khua an pan tawp mai a ni.

 

"Kan police te an thawkrim a, hah an sawi thei lo. Lawngpute an hah a, anni pawhin hah an sawi lo. An mut te pawh a chhuak a, an inti harh hram hram a," police pakhat chuan a ti.

 

Mizote hian an unaute chauh ni lovin hnam dang pawh an chhanchhuak; an chhanchhuah Mizo tlangval pakhat chuan anmahni hruaichhuaktute hian hnam dang pawh an chhanchhuak tih a sawi a, hnam dang nen lawngah an chuang ho tih a sawi.

 

"Khasi te, Barman te, chhan ngai an hmu a, an kalsan lo a, kan zingah an hruai tel. An lawmzia chu turu tak hi a ni ringawt! Lawmthu an sawi tawp thei lo," chu tlangval chuan a ti.

 

"Min rawn chhan dawn tih kan hre lo a, chutah an rawn lang a, Mizo ngei an ni lehnghal a! A mak lutuk a, awih a har zawk. Lawmthu pawh kan sawi thiam lo. Mizo tlawmngaihna hi a takin kan hmu a ni," an chhanchhuah zirlai pakhat chuan a ti.

 

"Rescue team pawh an rawn thleng ngam lo a, thlen ngam lohna tur pawh a ni a. Chutiangah chuan Mizo chu an rawn thleng ngam a, training pawh nei lo lehnghal. A mak a ni, Mizo nih hi a lo nuam a ni," a ti bawk. Zosapthara'n "Mizo, lawm teh u," a tih kha, Mizo nih vangin an lawm a ni.

 

Mizo an nih vangin chhanchhuaktu an tawng a, anmahni chhanchhuaktute thawhchhuah chhan pawh Mizo nih vang tho a ni, 'Mizo tlangval' tia chhuak an ni.

oxoxoxoxo^^^oxoxoxoxo

Mizo an ni - an hmel a țha

(Aizawl Post June ni 27, 2022)

 

Tuilianin che thei lovin a siam a, ni ruk chhung chu pawn chhuak thei lovin an awm tawh. Eitur an nei lo țan a, tui in tur pawh ren a ngai hle. 'Vawiin chu min la daih ang,' tih tur vel a ni tawh. Chutiang hunah chuan chhantu an tawng a, an lawmzia chu sawi ngaihna pawh an hre lo tih tur khawp a ni.

 

Silchar tuilianin a tihbuai Theophil Lalruatkima te hi ni ruk chhung an pawn chhuak thei tawh lo a ni mai lo a, power supply a chhiat avangin ni li chhung an phone an hmang thei tawh lo. Chutiangah chuan anmahni chhanchhuah tuma an awmna pan mek an awm tih pawh hriat ngaihna a awm lo a, him tumin an awm ve tawp mai a ni. Chutiang hunah chuan an hnampuite'n an va chhan a, "An hmelțha lutuk. Min chhan tura rawn kal an ni tih han hriat khan, țha tak an ni," Theophil-a chuan a ti.

 

Silchar-ah hian LLB a zir a, a naute (cousin) pahnih nen in an luah. Kawng anah a neitute an awm a, chumi chung chiahah chuan an awm. In neitute in chu ft 6 chuangin tuiin a chim a, anni pawh a chhawng chungah an awm ve tawp.

 

Theophil-a sawi danin, an in neitupa chuan "Nangni chu Mizo in ni a, in Mizopuite'n an rawn chhan ang che u," tiin a tirah a sawi lawk. Chu in luah vetu hnam dangte bulah pawh "Anni hi chu Mizo an ni a, țanpuitu an nei mai ang," tiin a sawi.

 

In neitupa chuan a ring dik a, June ni 23 khan a hnampuite'n an chhanchhuak. Chhanchhuah hnathawktu pawl SDRF (State Disaster Response Force) te leh NDRF (National Disaster Response Force) te pawhin tui a khauh lutuk an tih avanga tihngaihna an hriat lohna hmunah training nei ve lo, an hnampuite'n luhchilhin an chhanchhuak a ni.

 

"Mizo min hre chiang tihna a ni mai a. Hetah chauh a ni lo, vai rama Mizo min hriat dan chu hetiang hi a ni hrim hrim," Theophil-a chuan a ti.

 

In neitupa chang a ni lo, amah Theophil-a ngei pawhin Mizo a hmuh dan chu chutiang tho chu a ni; "Mizovin min rawn chhan hi ka ring hrim hrim, a tir ațang khan ka ring sa," a ti. Khami ni khan, khami ni daih tur eitur an la nei a ni mai a, mahse, "Eitur pawh kan tlakchham hmain min rawn puih hi ka ring," a ti. A ring dik.

 

A manganthlak a, a hlauhawm tih a pha lo a, mahse manganna karah pawh Mizo an nihna chu an thlamuanpui thu leh, an rawn puih ngei an rin tlat thu a sawi.

 

In neitupa chang a ni lo a, Theophil-a chang a ni hek lo, an țhenawmte'n Mizo an hmuh dan pawh chutiang tho chu a lo ni; Theophil-a te chhan tura kal Mizo tlangval, life jacket haa lawnga inkarte kha an thlen hma daihin Theophil-a te țhenawm, in (building) khat an luahpuite'n an lo hmu a, an hmuh veleh "Saw, in mite an rawn kal," an ti nghal! Ral-a life jacket ha, an hnen lam pantute an hmuh khan, rinna mit lo chuan Mizo an ni tih hriat ngaihna a awm lo ang. An țhenawma hnam dangte pawh Theophil-a hnampuite chuan an phurchhuak a, Khasi leh Debbarman an ni.

 

Theophil-a hnampui, an țhenawmte pawhin ral ațanga Theophil-a te hnampui an ni tih an hriatte hi Silchar YMA lam an ni a, Mizoram Police te'n engine nei chi lawng an ken thlak hmangin an kal a ni. Hemi țuma an hna hi a hautak khawp mai a, an thlen hnuah pawh gate an hawn theih loh avangin an lut mai thei lo. Tui chhunga liluh te a ngai a, chutianga an beih chuan an lut thei hram.

 

Lawngpu, Bairabi tlangval leh mi dang pali an ni a, tuihleuh thiam lo te pawh an awm.

 

Theophil-a pawhin an awmna chu a him loh thu leh a hlauhawmzia a sawi a, tui a thuk bakah a khauh tih te sawiin, "A current a chak si a, mi huaisen bik tan lo chuan tih ngam chi a ni lo," a ti.

"Mizo kan ni - kan hmel a țha,

Kan tum a sang bawk si," Rokunga