VILLAGE DEFENCE PARTY LEH MIZO MIPUITE

By : LR CHHUNGA

Mizoram-ah hian engtik hun lai vel atang khan nge Village Defence Party (VDP) hi din anih hriat chian a harsa tawh mai thei a, chutih laiin VDP hi Mizo Society-ah chuan Institution hmasa pawl tak, hun rei tak chhung khawtlang tiralmuang a, mipui lo thlamuan fo tawhtu a ni tih erawh chu kan hre chiang hle awm e. Hetiang taka institution pawimawh hi a chanchin, Chanchinbu lamah leh Internet lamah hian hmuh tur avang hle thung a ni. Chuvangin tun tumah hian VDP lo din chhoh dan leh a hnathawhte kan thlir dawn a ni.

Mizo District Council hun lai, Assam Sawrkar hnuaia kan awm lai khan “The Assam Village Defence Organization Act, 1966” siam a ni a, hei hi VDP chungchangah chuan kan dan neihna hnar (Parental Act) a ni ta a ni. Hemi zulzui chuan Mizoram-ah pawh “The Mizoram Village Defence Organization Rules, 1981” chu PC Sawrkar lai khan siam a lo ni ve tawh bawk a ni. Tichuan, kum 2011 a, “The Mizoram Police Act, 2011” duan chhuah a nih khan Village Defence Party chungchang hi dah a lo ni tawh bawk a, he dan erawh hi chu a thar hlak a ni a, kan sawi tak dan hnuaia awm a ni ve lo a ni. Hei bakah hian Mizoram Village Defence Organization (Amendment) Rules, 2017 chu siam chhuah a lo ni ve tawh bawk a ni. VDP chungchang dan hrang hrangte kan zir hmasa ang a, chumi hnuah chuan a tlangpuia an tih tur (General Power and Duty) bakah an hamthatna te kan zir dawn a ni.

A. Kan sawi ang khan Mizoram tan chuan Assam Village Defence Organization Act, 1966 hi VDP chungchang dan kan neih hmasak ber niin a lang a ni. He dan hnuaiah hian Chief Controller a awm a, chu chu DIG (Police) a ni a, a hnuaiah District Village Defence Officer a awm a, chu chu Superintendent of Police a niin, a hnuaiah hian Sub-divisional Police Officer (SDPO) chu Sub-divisional Village Defence Officer a ni a, Administrative Sub-division awm lohna hmunah erawh chuan Thana Officer-in-Charge kha Thana Village Defence Officer a ni a, an mahni jurisdiction zelah khan mawhphurhna kengtu an ni. District Village Defence Officer (SP) khan a bial chungah Primary Committee a din ang a, chu chuan Village Defence Party (VDP) kha an din tur a ni. VDP kha a tul zat zat din theih a ni a, a tlangpuiin khaw tinah din a ni thin a, VDP tin-ah khan Police Naik (Bel hnih) pakhat a awm zel tur a ni bawk. VDP-te chu Uniform leh Badge pek tur an ni a, an mamawh Stationery, Tourch Light etc... pawh pek tur an ni bawk. He dan hnuaiah hian Sawrkarin tul a tih chuan hmanrua (Arms) a kawltir thei a ni. An duty chuan uniform an ha ang a, Badge pawh an bel ngei tur a ni. VDP-te Public Servant a ngaih an ni a, an duty an thawhna kawngah pawi an khawih palh a nih chuan mi naran (common people) ang a Criminal Case siam sak ngawt theih an ni lova, Section 197 Cr.PC hnuiah hian Prosecution sanction neih hmasak a ngai a ni. Assam dan hnuaiah hian VDP-te hi thuneihna an nei sang khawp mai a, Police aiawh an niin an miman erawh kawl khawtlai lova Police-ah aranglamin an pe tur a ni. Village defence hna bakah hian Social works pawh thawk tura ngaih an ni bawk a ni.

B. The Mizoram Village Defence Organization Rules, 1981 ah erawh chuan District, Sub-division, Thana (Police Station) leh Khua/Veng tinah Village Defence Primary Committee din tur a ni a, Police Officer bialtu zel khan an ho tur a ni a, Mahse, Village Defence Primary Committee erawh chu Village Defence Officer (Thana O/C) khan a din ang a, tichuan Police Naik pakhat leh Committee Member 6 an awm tur a ni. Chu Primary Committee hnuaiah chuan Village Defence Party kha khaw tinah din tur a ni a, Member 30 tal an ni tur a ni. VDP-ah chuan puitling hetiang lama tui mite chuan an inziaklutna Form (enrolment Form) leh thutiamna form fill up in bialtu Thana O/C (Village Defence Officer) ah enrollment tih theih a ni. VDP Member-te hi thla khatah lawmman Rs 50/- pek tur an nih bakah an mamawh, Torch Flash ligh, Batteries, khawnvar tui, Rain Coat, Badge, Blanket, Stationery etc... pek tur an ni.

C. The Mizoram Village Defence Organization (Amendment) Rules, 2017 ah hian dan then khat siamthat a niin sumfaia tanpuina (Pocket money or financial assistance) pawh tihsan a ni a, Rule 22 ah heti hian kan hmu “The Village Defence Parties shall get regular financial aid from the Government as pocket money at the rate of Rs.1,000.00 per men sem to meet such charges as Kerosene, flash-light torches, Batteries, Stationeries etc. Payment of pocket money shall be contingent upon actual functioning of the parties and no pocket money shall be admissible for periods during which Village Defence Party remained dormant. Payment of pocket money shall be made through the Thana Village Defence Officer. Payment of pocket money shall be contingent upon actual functioning of the parties and no pocket money shall be admissible for periods during which Village Defence Party remained dormant. Payment of pocket money shall be made through the Thana Village Defence Officer”. A chunga kan hmuh ang hian VDP hnathawk mumal thei lova a awm lai chuan sumfai tanpuina hi pek loh tur a ni. VDP hna thawk thate hnena lawmman pek theih pawh siamthat a ni a, Chief Controller (DIG) hian Rs. 3,000/- thleng lawmman an pe thei a, Village Defence Officer (Thana O/C) hian Rs 1,500/- thleng lawmman a pe thei bawk a ni.

D. The Mizoram Police Act, 2011, Section 49 ah hian Village Defence Party chungchang hetiang hian kan hmu vethung a ni, “The Superintendent of Police shall organize a group of local respectable persons for each village for the purpose of carrying out preventive patrolling, promoting crime reduction measures and generally assisting the police in their functioning. The group will be called the Village Defense Party and may not normally consist of more than 15 members, with provision for having more than one Village Defense Party if the size and population of the village so require. The composition of the Party shall reflect the diversity of local population including adequate gender representation”. Kan sawi tk ang khan District Village Defence Officer leh Superintendent of Police kha thuhmun an ni a, VDP din chungchanga mawhphurtu chu amah hi a ni. He danah hi chuan VDP member pawh atlangpuiin mi 15 aiin an tam tur a ni lo. He dan Section 50 a kan hmuh ang chuan VDP Member ni tur chuan Criminal case a, court-in thiam loh an chantir emw an thubuai Court-in a ngaihtuah tawhte an ni tur a ni lova, eirukna emaw nungchang tha lo avanga an hna atanga ban tawhte an ni tur a ni hek lova, mi zahawm, hmingtha an ni tur a niin, kha khua a cheng nghet (Permanent resident) a ni tur a ni bawk. He dan danglamna chu member-te hi kum thum term a ni a, kum tinin hmun thuma thena hmun khat hi member thar an ni tur a ni a, kum 60 chunglam chu member-ah lak tur an ni lo bawk a ni.

A chunga kan sawi tak dan hrang hrang atang khan hetiang hian mipuiten kan hriat tur i han khawikhawm dawn teh ang.

1. VDP hi Non-Government Organization (NGO) a ni ngawt lova, dan mumal tak hnuaia din a ni. Khua/Veng thlamuan turin an pawimawh em avang hian an tih tur leh tih loh turte member ten an hriat chian hle a ngai a ni.

2. VDP hi NGO dangte anga lo tawngpawng din ve ngawt theih a ni lova, Bialtu Police Station SDPO emaw Officer-in-Charge –a in ziak lut thlap a din theih chauh a ni a, a pawl ang ni lovin member zawng zawng khan Enrollment an neih a ngai a ni. Dan anga din an nih loh chuan dan hnuaia thuneihna, hamthatna leh chanvo an neihte beisei theih a ni lo.

3. Kan sawi tak “The Assam Village Defence Organization Act, 1966”, Section 17 hnuaiah khan VDP te hi Public Servant an ni a, an hna, danin ti tura thuneihna a pek chin an thawhna kawnga pawi an khawih palh thulhah, an laka Criminal case (Police case) siam ngawt theih a ni lova, District Village Defence Officer (Superintendent of Police) emaw Chief Controller (Deputy Director General of Police) hnen atangin Prosecution sanction neih hmasak a ngai a ni. A awmzia chu thubuai siam sak tur chuan Investigation Officer (Case IO) khan Section 197 Cr.PC hnuaiah hian charge-sheet Court-a a thehluh hmain Prosecution Sanction a dil hmasak a ngai tihna a ni.

4. VDP-te hna ber chu Police tanpui a ni a, an huam chhungah dan bawhchhiatna leh thih dan pangngai lova thi (Unnatural death) an awm chuan Police-ah an report vat tur a ni. Misual (Criminal) an man reng rengin kawl khawtlai lovin Police hnenah a ranglamin an hlan tur a, a man-te tlan bo hlauhawm an nih hran loh chuan tingmit kher tur a ni lova, tul lova phuarhlawm rengte leh khuahkhirhte an ching tur a ni lo.

5. VDP leh khawtlang/Veng inrelbwlnaa khawihtu VC/LC nen hian dan hnuaiah inkungkaihna a nei lem lova, VDP chu khawtlang venhimna thawktu an nih angin dan hnuaiah, dan angin din ngei tur a ni.

A chunga kan sawi tak atang khian VDP Member ten hriat tel tur dan pawimawh tak tak kan la nei a, hetiang hian i han zir leh dawn teh ang;

1. Section 6(3) Assam Village Defence Organization Act, 1966-ah hian VDP-te chuan mi tupawh an hmuh laia emaw an awm laia dan (Cognizable leh Non-bailable) bawhchhia/pawikhawih chu an man thei a, an mi mam hi a ranglamin Police hnenah an hlan tur a ni. Hetiang deuh tho hi Section 43 Cr.PC ah hian kan hmu a, CrPC ah erawh hi chuan VDP chauh thuneihna a pe lova, mi tupwh khatiang pawikhawih laia awm emaw mita hmutu chuan pawikhawihtu a man thei a ni.

2. Section 38 CrPC ah hian mi tupawhin Police ten Court thupek a, mi man tur an neih chuan an lo tanpui tur a ni tih a ni a, hei hi VDP-te tan phei chuan tihmakmawh an duty a ni. Chutiang bawk chuan Section 39 CrPC ah hian pawi liantham khawihna a awm chuan Police-ah an report tur a ni a, Section 40 CrPC ah hian khawtlang inrelbawlnaa mawhphurtu (VC/LC leh VDP huam telin) an huam chhunga pawikhawihna hrang hrang, thilruk hmang, thilruk lei ching, mi in rawk, pawikhawitu nia rinhlelhawm, Tualthi or Sarthi (Unnatural death), etc.. leh dan leh thupek kenkawh chungchanga harsatna thleng theite a awm chuan Police hnenah an report ngei ngei tur a ni tih kan hmu bawk a ni. Section 40 CrPC a kan hmuh hi ngaih pawimawh zual a ngai a, khatianga thil a thlena Sawrkara report an pe duh lo emaw ngaihthah emaw an nih chuan Section 176 IPC hmangin thubuai siam sak theih an ni a, thiam loh chantir an nih chuan thla khat jail tan leh Rs. 500 chawitir theih bawk a ni a, kha a report duh lo kha a case a len phei chuan a hremna kha thla 6 jail tan leh Rs. 1,000/- thleng chaawitir theih an ni bawk.

3. Kan sawi tak ang khan VDP-te chu Public Servant an ni a, an hna danin titura thuneihna a pek an thawhna kawnga harsatna lo siam sak a, lo rikraptu chu section 183/189 IPC hnuaiah hian na taka hrem theih an ni bawk.

Kan sawi tak ang khan VDP-te hi khawtlang muantu an ni a, an pawimawh em em a, an pawimawhna hi hria a mipuite pawhin kan zahthiama leh kan chawimawi thiam a pawimawh hle a ni. Chutih rualin VDP member-te pawhin he institution zahawm tak hi mimal invaivung nan hman loh tur a ni a, kan huat zawngte diriam nan leh deusawhna hmanrua a hman tur a ni hek lo. Ram leh mipui rawngbawl nan hman tur a ni tih hi kan hriat reng a pawimawh hle a ni. Hetiang taka pawimawh an nih avang hian Sawrkar lam pawh hian an chanvo danin a sawite an hmuh theih nan theih tawp chhuah zel a tha hle a ni. Chutiang bawkin mipuite pawhin VDP hi mahni lo indin ngawt chi pawh a ni lova, bialtu Police Station-ah enrollment tih tur a ni a, NGO dangte anga tawngpawng din ve ngawt tur a ni lo tih hi hriat reng tur ni.

_______

Pic for Representative only....