KE SA NATNA

Ke sa nasa, mutna damdawi hlau

~Dr. Chawnglungmuana

Natna ke sa insawiselna thlen thei tam tak a awm thei

Zawhna: Ka pu, ka nu hi kum 70 a ni a, thisen sàng leh zunthlum nei a ni a, kum  20 lai chu a ni tawh ang. Chuan, a ke hi a sà nasa thei lutuk a, doctor kan rawnin mutna lam an chawh hian a hlau bawk si a, khawngaih takin min pui thei ang em?

Chhanna: Ke sa hi insawiselna common ang reng tak mai a ni a, a bikin hmeichhia hian an nei duh zual. Natna ke sa insawiselna thlen thei tam tak a awm a, a chhan common ber chu hriatna thazam (nerve) fel lo, Neuropathy hi a ni awm e.

Nerve hian kan hriatna sense chi hrang hrang signal a thliar hrang thin a, chu mai ni lovin kan tihrawl chet kawngahte thluak atanga signal kal tlangna a ni bawk. Kan nerve-te hi tha taka hna an thawh theih nan Vitamin (a bik takin B12, Folate leh B6 te), mineral chi hrang hrangte a mamawh a, hei bakah hian hormones chi hrang hrangte hnathawh hian a hnathawh a kaihruai tel a, chung zingah chuan thyroid hormones hi a pawimawh hle. Chutiang avang chuan vitamin tlakchham te, mineral eng ber emaw tlakchham te, hormones buai te hian nerve chak lo, hnathawh buai Neuropathy hi an thlen fo thin a ni.

Kum a lo upat chuan taksa khawl chet a lo muang a, vitamin/mineral tlakchham te, hormones buaite pawh hi a lo awm hma a. An ei leh in hi an lakluh zat ngai mah se an taksain a mamawh zat a hmang tangkai lo fo thei bawk. Zunthlum natna hi kan taksaa thlum (sugar) control fel lo vanga awm a ni a, chu chuan nerve hnathawh a tibuai duh hle. Zunthlum control tha lo reiah hian neuropathy hi a awm duh em em a, chuvang chuan intihpem a awl a, pem a dam har a, a pun duh zual bawk. Chutiang avang chuan ke sate pawh hi zunthlum control tha lo chuan an nei duh hle. I nu hi a blood sugar control a tha tawk lo a ni thei a, Fasting leh PP Blood sugar check nawn leh ula, chu bakah chuan glycosylated hemoglobin (HbA1c) test pawh lo ti tel ngei ula, a control tha lo a nih chuan a zunthlum damdawi ei dante ennawn a tul ang.

Thisen sang (Hypertension) hian neuropathy hi a thlen duh viau bawk a, thisen sang control-na damdawi thenkhat hian a thlen thei tho bawk. Chuvangin, a BP control hi en uluk a ngaih hmel. A damdawi ei laite pawh ennawn a, thlak danglam a tul thei bawk ang. A dang lehah chuan Thyroid hormone tlakchham (Hypothyroidism) a nei nge nei lo hriat a tha a, Thyroid Function Test inla tih loh chuan lo ti tel thei ta ula, a hniam a nih chuan thyroid hormone supplement-te pawh a ei a ngai ang. A ei leh in lamah tlakchham a neih palh chuan a Hb te a hniam palh thei a, chu chuan ke sate a thlen theih bawk avangin Hb lo test tel ta bawk ula. Kan sawi tak angin upa lamah chuan ei leh in in-balance lo vangin malnutrition hi a awm fo thin a, a ei in chungchang lo chikpui deuh ula, dietician-te pawh inrawn theih chuan a tangkai thei ang.

Kan hriat tur pawimawh leh chu kum upa lamah chuan damdawi eng chi pawh hi an taksain a dawnsawn dan a muang tawh a, a dose uluk a ngai a (paracetamol mai mai pawh fimkhur zual a tha), an taksain damdawi chambang a paih chhuak muang tawh thin a. Chuvangin, a damdawi ei lai apiang kha doctor-in an chawh ang thlap thlap (a hunbi leh dose)-in lo eitir ngei thei ula. Vitamin supplement-te pawh pek regular a pawimawh ang. Hmeichhia bikah hian an thi hul hnuah calcium tlakchhamte an nei duh bik a, chung avang chuan calcium supplement-te pawh regular deuha pek an mamawh bawk thin. Engpawhnise, kan sawi tak angin a chhan tam tak a awm theih avangin Medicine Specialist lo entir leh thei ula chu a tha berin ka ring.