Mizo Chanchin

Tak tak ni maw! Whatsapp group atanga lakchhawn a ni e.

 Luseiho hi Sumpui khua atangin AD 1500 velah Seipui khur an lût a, an luh hma hian Khiangteho chu Belmual-ah, Chawngthu ho chu Sanzawl leh Bochung khuaah, Ralteho chu Saihmunah an lo awm tawh a, Seipui khur luh thu hi a hnuaia mi ang hian upate’n thawnthu angin an sawi ngun hle thîn.

Sumpui khuaa awm Mauva chu a lo tlangval tawh a. (Mauva i hriatchian duh chuan ‘Chhakchhuak Chanchin’ en rawh) Tûk khat chu feipui kengin lo a kan a, sanghal-in an bal a lo tlàn a. Sanghal hnu chu a chhui zêl a, Sunthla ramah bu a lo nei a. Sanghal bu chu a chhun a, a hliam ta a. Sa hliam chu a ûm zêl a, Khiangzang khua leh Seipui inkârah khuain a thimhnan ta a.

A hawi vêl a, a piah lawkah chuan mei êng de thliah a hmu a, a pan ta a. Khiangteho thlawhhma thlama riak an lo ni hlawm a, an hnênah chuan a riak ve ta a. A tûk khua a lo vâr a, a’n thlîr vêl a, khaw hmun atan tha a ti hle a. An awmna Run kam chhengchhe tak ai chuan thlawhhma lâk tur tha a tam si a, awm nan a duh ta em em mai a. A hawng a, a unaute a sâwm a, a pa hovin khaw thar sât turin an kal ta a ni.\

Sehpui khur hi khaw hmun nuam, zâwlrai zau tak a ni a, an khaw mawng zâwl chu leilet phai lo atan an hmang tawh nghe nghe. He hmun hi Luseihote’n an luah chinah Mauva pa Seipuia a lal a, Seipui khua an ti ta a ni. Mauva hmuhchhuah a ni a, tlangval a la nih avângin a pa a lal ta zâwk a, Seipui thlen hnuah Mauva hian nupui atan Khiangte nuthlawi a nei a ni an ti. (Source: Zofate thuhla by L.K.Liana)

Luseiho thlahtu hi Luseia ni-a sawi a ni a. Luseia’n Lamlira, Sumhauva, Tochuanga leh Thangpuia te a hring. Lusei hnam chi hrang hrangte chu:-

1. Chawngte – Tuichhung, Lungte, Pamte, Muchhipchhuak.

2. Chhangte – Darchhun, Vawknghak, Kawlchi, Nghakchi, Chawnglu, Lamthang, Tumpha.

3. Chhakchhuak – Hualngo, Hualhang, Hualhnam, Lunkhua.

4. Chuauhang – Lathang, Chungpui, Chawnchhawn, Chawnchirh, Khuanglawi, Vaichuau.

5. Chuaungo – Chumthluk, Darkim, Zawngpam, Hmunpel, Thlenghel, Laller, Auhmun.

6. Hauhnar – Hauthul, Haubul, Tuithang, Senlai.

7. Hrahsel – Selpui, Sawntlung, Sumkhum, Saza.

8. Pachuau – Lianthung, Liannghawr, Cherlal, Chhawnthliak, Chuaulak, Darcho, Varchuau.

9. Tochhawng – Topui, Chhakawm, Tobul, Chemhler.

10. Vanchhawng – Vanlung, Chengler, Kaithum.

11. Zahmuaka thlah – Zadeng, Thangluah, Rokhum, Palian, Rivung, Thangur.

(Source: Mizo Chanchin by Rev. Liangkhaia)

Hnamte, Renthlei, Chawngthu, Khiangte, Khawlhring, Kawilam leh Pautu te hi Seipui khura awm lova hmun dang lo pan hmasa an nih avângin Lusei zîngah an telh lo thîn a, Lusei hnahthlâk an ni ti-a sawi an awm bawk.