MIZO INNEIH CHUNGCHANG

MIZO INNEIH CHUNGCHANGA MUP, MHIP LEH MZP NGENNA INṬAWM

    Tunlai kan mizo inneih sawngbawl dan hian kan hnam inneih dan kalphung a pensan ta hle a. Mahni hnam nunphung leh chinṭhan kalpen san thui lutuk hi thil hlauhawm tak a ni tih hriain, he ngenna inṭawm hi mitih tan a zangkhai zawk theih nan leh Hnam dan kan zawm theih nan leh kan vawn nun zel theih nan siam a ni a. Mizo chhungkaw tinin zawm ṭheuh thei ila a lawmawm ngawt ang.

1. MO INCHEINA : Inneih ni a Mo leh a ṭhian incheina senso hi hmeichhe tum ṭhin a ni. A theihhram chuan Mizo incheina pangngaia inchei ni se.

2. ZUNGBUN : Mo ṭhenkhatin Moneitu hnenah Inneih Zungbun Biakin chhunga a pe ve kher ṭhin hi kan tih dan phung a ni lo e. Tih dan a nei Kohhrante an awm a nih chuan thudang nise.

3. THUAMCHHAWM : Vaiho phurrit, bansan an duh em em Dowry System-ah kan inhnuk lut mek. Hei hi tih tawp vat a ṭul. Chuvangin a hnuaia tarlan hi zawm ṭheuh i tum ang u.

    a. Chhawm loh tur te :

    (i)    Matress (Awngphah chhah) leh Thosilen. Hei hi mipa lam chan a ni e.

    (ii)    Almirah lian leh Dressing Table te hi chhawm kher a ṭul lo.

    b. Thuamchhawm tur te:

    (i)    Mo thuama tel ngei ṭhin Thul emaw thingrem/Suitcase ken ni se a tawk.

    (ii)    Mo thuam a tel ṭhin Em leh Hnam leh Thembu te hi ken ngei turah ngai lo ila. Chhungkua a zirin keng duh an awm chuan a ṭha e.

    (iii)    Mo in a ken ngei ngei ṭhin pawnpui/Puanpui aiah Blanket/Rizai pahnih khat ken nise. Bedsheet leh Lukhamte ken tel nise.

    (iv)    Mizo danah Zawlken puan, Puandum pakhat ken ngei tur a ni. Puandum/pawndum hi Mo-in a pasal thih thulhah a tuamna tur a ni a, lak pen chi pawh a ni lo.

    (v)    Puan pangngai chhawm hi pi leh pu chenah hnam danah kan neih a ni a, ban theih a ni lo. Tunlaiin uchuak taka chhawm a awm ṭhin. A tam berah 25 vel ken a tawk. A tlem lam chu duhthusam a ni.

    (vi)    Heng a chuanga kan sawi bak Mo-in a mamawh leh a neihsa thilte chu hun dangah lak mai nise.

4. MAN ṬANG SEM LEH EITIR:

    Man ei hi a eitur dik tak eitir ṭhin nise. Hnam dan 2006 a chhut angin:-

    (i)    Sum hmahruai.    (ii)    Sumfang.    (iii)    Pusum.    (iv)    Palal.    (v)    Ni-ar.

    (vi)    Naupuakpuan.                         

    Man kan ineitir chiam chiam hi a ṭha lova, sim tur a ni. Kan piputen an lo tih dan hi (Man eitur dik tak eitir hi) a lo ṭha in a lo nghet zawk ṭhin.

(vii) Nu man : Nu man hi kan hmang dik lo fo mai. Pasal nei tur kha a nu leh pa inṭhen emaw, inneilo an nih in Mo tur nu khan a lo hrin hah manah NU MAN a eitur a ni. Midang ei ve theih chi a ni lo.

(viii) Ṭhian man : Ṭhian man hi a awm ngai lova, pek a nih pawhin mipa lam pek tur a ni.

(ix) Charsutphawi man : Mo chuan a û (laizawn) pasal a neih khalh hian Charsutphawi an ti a. Mo û (Pakhat aia tam pawh nise) pakhatin Charsutphawi man Tlai (Rs 20/-) a ei ang. hei hi sumchhuah thuah pawh chhuah tel a ni ve lo.

5. LAWI AR    : Lawi Ar hi man eitute tum a ni a. Mo a pasal ina lawi tur malsawmna a lawipui atan pek ṭhin a ni. Ar hi 3 vel a tawk hle.

6. LAWICHAL : Lawichal hi Mo pasal ina him taka hruai thlengtu tur a ni a, a mawhphurhna hi a san em avangin leh kan hnam Dana bet tlat a nih avangin ban theih a ni lova, Lawichal man hi phut anih chuan mipa lam pek tur a ni.

7. MAN HLAN : Mizote inneihna hi kan Kristianna nen inzawm tlat a nih avangin man hlan pawh hi mawi tak leh zahawm taka hman tur a ni.

8. RUAI : Mo lawmna leh thlahna ei leh in hi a hautak lo thei anga kalpuin theih nise. Hei hi Kohhran duhdan pawh a ni a, zawm hram a ṭha. (A nei leh awm bik riaute chu thuhran a ni e.)

Sd/-

(K.MALSAWMA)

MUP Gen.Hqrs. Aiawh

Sd/-                                                      Sd/-

(B.SANGKHUMI)              (JAMES THANGHMINGMAWIA)

MHIP Gen.Hqrs.Aizawl            MZP Gen.Hqrs. Aizawl.