Mizoram a Bial Zaipawl Hmasa ber

 (Hei hi FB lama post a ni a, ka rawn cp a ni e)

FB Comment thenkhat

 ~Maneia

A nawlpuiin kan lo hriat tawh dan leh anmahni lam pawhin an inpawm dan in Mizoram a Bial Zaipawl nei hmasa ber ni a kan sawi thin chu 'Venghlui Bial Zaipawl' hi a ni awm e. Anni hian Ni 24. Sept. 2000 khan Venghlui Kohhran ah Bial Zaipawl Silver Jubilee hi an lo lawm tawh nghe nghe a ni.  Tun hnaiah Whatsapp Group lam a titi na atangin Venghlui Bial Zaipawl aia Bial Zaipawl ding hmasa ni a ngaihtheih tur sawina ka hmu nawlh mai a, ka mit a la viau mai a, thui taka chhui tur leh ziah tur nei lo mah ila ngaihtuahna ti zau-ah Bial Zaipawl rawngbawlna lama hmahruaitu tia sawi theih tawh tur Venghlui leh Thingsul Bial Zaipawl-te chanchin ziahna tlem han tarlang ila a tha awm e. 

VENGHLUI BIAL ZAIPAWL :

               Venghlui Bial KTP Ruby Jubilee, kum 2012 a an lawm tum a Souvenir-ah hetiang hian Bial Zaipawl chungchang ziah lan a ni. 

               'Bial chhunga KTP Member-te in unauna tha zawk a awm theih nan leh zai lama hmasawnna anih beiseiin kum 1972 atangin Bial Combine Choir anga ruahman hmasak niin Bial chhungah rawngbawlna an lo nei tawh thin a. A hnuah Bial KTP Committee Vawi-25 (Thurel 4-na) chuan Venghlui Pastor Bial Zaipawl tih hming angin ni 13th September 1975 ah a din ta a ni. (Mizoramah Bial Zaipawl ding hmasa ber a ni)' 

             Conductor atan Pu PC. Lalmawia leh Tv. Zaneihtluanga te ruat an ni a, a din tirh hian Member tur a hrana inruat lo in Bial chhung Kohhran Zaipawl Member a thei apiang an tel mai a, (1976 atangin Bial Zaipawl Member hi in ruat tan a ni) Hla zirna hmasa ber hi ni 19.Sept.1975 (Zirtawp zan) ah Venghlui Biak In ah nei in, an hla zir chu 'Rinna thla zar ila, Kalvari mual lam va fang ila' a ni a.  Rawngbawlna an neihna hmasa ber chu ni 12.Oct.1975 ah Chhimthlang Presbytery, Vengthar Kohhranah an nei a.....'

           Hei hi Venghlui Bial KTP Ruby Jubilee Souvenir a a i ziah dan ngau ngau a ni a, Bial Zaipawl rawngbawlna lamah Venghlui Bial Zaipawl te hian hma an hruaiin a sulsutu leh midangte kawhhmuhtu an ni tih chu hai rual a ni awm lo e.

THINGSUL BIAL ZAIPAWL :- 

         Thingsul Bial KTP te hian Kum 2006 khan Bial KTP Golden Jubilee an lo lawm tawh a, Golden Jubilee Souvenir-ah Bial Zaipawl chungchang hetiang hian ziah lan a ni. 

          'Dt 13.2.1972 Bial Committee chuan 'KTP Gen.Conference Kawnpui a lo awm turah kan Bial Zaipawl kal ve ila kan ti a. Tlungvel leh Thingsul ah mi 20 ve ve thlan chhuah ni sela, an kal lam man tur chu kan Bial pawisa kha hmang ila, hawn lam chu ngaihtuah chawp a ni ang' tiin a rel a. He rorel hi bawhzui nghal in hemi kum February Chawlhni hnuhnung ber hmang hian Kawnpuiah Bial Zaipawl chu tum hnih an zu zai ta a. Conductor chu Pu K. Lianchhawna Tlungvel a ni. Khawi Bial atang mahin he Gen.Conference-ah hian 'Bial Zaipawl' ti a koh zaipawl an la awm lova, chuvangin Bial Zaipawl neihah hian Thingsulthliah Bial hi a hmasa ber kan nih loh pawhin pahnihna kan ni bik kher lo ang' 

               He Golden Jubilee Souvenir a a in ziah danah hi chuan Kum 1972, February thlaah Thingsulthliah Bial Zaipawl te hi mumal taka ding tawhin KTP Gen.Conference-a zaitur a inbuatsaih an nih avangin hla pawh an zir nual turah a ngaih theih. Hemi tuma Conductor atan a an ruat Pu K. Lianchhawna hi tunah hian Tlungvel Vengthar Kohhran Upa a ni mek a, Thingsul Bial Zaipawl chungchang ka zawh hian nasa taka an inbuatsaih thu leh Uniform te pawh an neih thu a sawi. 

               Zaipawl ngainatna ram, Mizoram a Bial Zaipawl hmasa ber chu ni 13. Feb. 1972 a din 'Thingsulthliah Bial Zaipawl' hi an ni thei mai em? Ngaihtuahna zau zawk seng peihte tan a khuhhawnna ka han ziak mai a ni e.