MNF SORKAR SUM HARSATNA

Source : Vanglaini 

Ni 25.7.2022 (Mon)

MNF SORKAR SUM HARSATNA

~Ma Liana, Sihphir Venghlun

MNF Sorkar tirh khan MNF a kan ṭhian tam takte hnenah sum hman dan hi fimkhur angai a nia. SEDP Board hi Central-a DPR siam a, sum hai chhuak tura in din nimahse, Central-a kan GDP hi a tlakhniam avangin fimkhur angai a nia tiin ka hrilh ve ṭhin. Kan Chief Minister hian 2018 inthlan hma aṭang daih tawh khan DPR siam a nih phawt chuan, Central aṭangin duh duha Development Fund sumpui hnuh chhuah theih emaw a ti a. Chutiang chuan, Central lama sum hai luh theih ang ang hai lut turin kum khata cheng nuai 200 chuang seng turin SEDP hnuaiah Board 14 te an din ta a ni. Vawiin ni thlengin SEDP hnuaia Board 14 te hian sum hai luh an la nei lo thung.

MNF Sorkar thar a pian khan Central lamah an hotu BJP te an sorkar tho avangin engkim titheitu ah an inngai a. Sum lamah an thla a phang chhin eih lo. Mizoram mipuiten MNF sorkarah, tui khurpui luang lut zur zur leh Central aṭang sum kan hnuk chhuak ruih ruih dawn, tih ṭawngkam kha kan hriat tam ber a ni. Kolasib-a 2018 a MNF Campaign Kickoff neih a nih ṭum khan, Pu Zoramthanga khan Hmarchhak tana Development fund ah cheng vaibelchhe nuai khat leh sing hnih a awm thu sawiin, State tinte hian inzah ṭheuh pawhin insem ta ang ila, vaibelchhe singkhat leh sanghnih ṭheuhin kan insem thei a, vaibelchhe 40 ala chuang, sawmpahnih vawiriat sawmkua paruk, tiin a sawi nghe nghe a nih kha. Khatiang thupuarpawleng, a tak hmuh tur awm chuang si lo kha tuipuiin an thla a muang a, an nui sâng hlawm a. Kum 2020 ah phei chuan India ram State zinga nui tam berah Central Sorkar khan min thlang nghe nghe a nih kha.

Congress sorkar khan inrenchemna kalpuiin ṭul lova sum hmanna tam tak an ti tawp a. Finance Minister Pu Lalsawta khan sorkar sum bo thlau tur tam tak a chhan chhuak a. Thlarau MR an tih pawh tam tak man chhuakin kum khatah thlarau MR hlawh tur nuai 4,900 kha kumtin an hum theih phah. Hei mai ni lovin zu an zawrh aṭangin sorkarah chhiah lut bawk. MNF ten sorkarna an chan hlimah khan development a Congress khum tum ranin hma an la a, Maurawkela zawng khuang nei ang maiin District thar 3 lo awm rawh se pip, an ti a. District thar 3 chu a piang ta mai a. Zirtirtu 964 lo awm rawh se pip an ti leh a, an lo awm leh mai. Aizawla mihausa ho tan PAHOSS ah cheng nuai sang chuang sem ni rawh se pip, an ti leh a, an sem leh mai. Airport Cute zawng zawngte nen. MNF Sorkar thar khan Congress Sorkarin ren tak leh thiam taka sum a khawlsa kha hrethiam duh lovin an hmang ta hiau hiau a, tuikhurpui luang chhuak zur zur, lehlama luang lut zur zur kha an mitthlaa a cham laklawh tawh tlat a ni. Zampui tlangdunga YMA ten kan CM hnena cheng nuai 3 an lo dil ṭum khan, CM chuan, rawn kal ula, kan lo pe ang che u, ka rinaiin in rawn dil tlem em mai, tiin a chhang a. Chutiang chuan, a sum lut leh tur lamah ngaihtuahna seng duh si lovin a hman lamah an ramṭang a. Sum lut tur leh chhuak tur zat an chhut thiam lova, a tawpah buaina a lo awm ta a ni.

Pa pakhat chuan Loan la-in ka sumdawng e, a ti a. A sum hmuh hmasak a piang ama ta emaw tiin a mamawh bak a lei zel a, chhungkaw hmasawnna tur lam a ngaihtuah thlen phak loh avangin a uikawm lova. A faten pawisa an dil pawhin, min va dil tlem ve, tiin a hausak thu leh sum a ngah thu a fate hnenah a sawi chamchi a. A tawpah erawh a chakawt a, loan rulhna tur a nei ta lova, a che buai hle a ni. Congress sorkar khan cheng nuai sing nga chuang fe an lo khawl khawm sa kha MNF sorkarin a rochun a. Kan Chief Minister-in khaw pakhata a thusawinaah, hei mah mah Congress chaw ṭhing kan ro bangnawi kan insem vel mai mai a nia, khap ruk bela manipur buhfai ṭha kan chhum hunah phei chuan.. tiin uang takin a sawi nghe nghe a ni.

Mizoram Budget Session 2020 ah khan Covid hnuah ringawt pawh an sum dawn tam tawh zia sawiin Jal Shakti Minister Sekhawat-a phei chuan tukinah min rawn phone a, a pawisa min rawn pek tur kha a tam lutuk avangin a zat ka sawi ngam lo, tite hialin a sawi chhuak a. Nimahsela, sumah hian dawt a sawi rei tak tak theih ngai loh. European Union khan EU chhungkaw zinga tel ram te hnenah khan sorkar sum indaih lohna 3% chin a nih chuan EU chuan an sum indaih lohnaah a pui thei ang, tiin thu a dah a, Greece sorkar chuan kumtin deuh thaw khan 3.5%, 3.9% in kan indaih lo tiin hun rei tak report an pe a. EU chuan, 3% chin kan ti naa, an pel thui hleinem, an pelhna hi 1% a tling lova, i pui mai ang u, an ti a, an pui ta zel a. Mahse an sum indaih lohna kha a tak takah chuan 15%, 16% te a lo ni daih si a. Chutiang chuan kum tam tak chhung report dik lo takin Greece sorkar kha an kal a ni. Mahse, kum 2015 ah khan thawk leh khatah Greece ram economy chu a chhe ta rup mai a nih kha. Mizoramah pawh dawt thu sawiin mipui kan bum a. Sum tam zia kan sawi a. Kan ṭawng a uang hma em em a, *Central lamin CSS sum RBI account a an thun aṭanga ni 21 chhunga a hmanna tur dik takah lut tur a ni,* tia thu an han chhuah meuh chuan kan nihna dik tak chu a lang chhuak dawn chiang khawp. 2022-2023 Budget kan thlir let chuan kha Budget-ah khan sorkar hnathawk hlawh tur indaih lo sa a dah a ni a. CSS sum pawh pen mai mai theih a nih tawh dawn si loh avangin engtin nge min kalpui tak ang?

Covid hripuiin min nuai laiin ram dang aia rei uchuak Sorkarin min curfew hnan a, chuti chungin khaw tam zawka 4C te chu mipui sum thawhkhawm hmangin a kal ve hram hram a. Sorkar aṭang beisei tur a awm lo. CM Relief fund ah kohhran, pawl leh mimal ṭhahnemngai ten cheng tam tak an thawh. Mipui rilru a inhawng. MLA ten an fund leh an hlawh aṭangin an thawh bawk. Nimahsela, thla thum thla li vel an thawh hnuah thawh zui zelna tlakah an ngai ta lo a ni. Kan ram hruaitu ṭhenkhatte hi chuan sum hi engkimtitheitu ah an ngai a. Sum an hmuhna tur a nih phawt chuan an zahawmna hi an hralh hreh lo va, hmingchhiat an pawisa hek lo. Congress sum khawlsa an hman zawh hnuin Covid chhuanlama hmangin sum harsat zia an sawi chho ṭan a. Mizoram sorkar leiba pawh lian tual tual an sawi aia nasa zawkin a pung chho ta zawt zawt mai a nih hi. Health Care sum lah sorkarin vaibelchhe 70 chuang a ba a, hemi ba rulhna tur sum cheng vaibelchhe 1,000 vel puk an tum mek a. Sum puk tur an hmuh avangin an la inti thei em em zui.

Zep tur a awm lo, MNF sorkar hi Financial Management ah a hlawhchham chiang a ni. An mahni mi leh sa thun nan sorkar hna an create chawp a, austerity measures lak ai chuan an mahni pumpui tih puar nan Kamrula te hmangin Contract hna an inpe pawp pawp a. School thawmṭhatna tur NABARD hnuaiah cheng nuai 3,500 pukin a nih tur ang ni phak lo a tam hle a. Covid laiin CM Relief Fund ah mipuiten sum i chhung lut ang u, tiin Mizo mipui thuawih thei em em ten cheng vbc 32 chuang kan chhung lut. Hetih lai mek hian Health Dept chu Special audit neiin sum dik lo taka hmanna an hmu chhuak a. PPE suit man to uchuak takin an lei bawk nia! Chhim mipuite hman ve tur RT PCR khawl mi pek sa pawh zuk install duh chuang lo va. Arakan rorelna hi mipuiten kan kham tak zet a ni. MNF tlinna chhan kha SEDP cheng nuai thum kha a ni a, sorkarna an chan tawh hnuah pawh Assembly Budget Session ah cheng nuai thum an sem tur thu an la sawi ta fan a. Kan Sport Minister zahawm tak chuan Hnam Runa a thusawinaah SEDP nuai 3 chu khawi a mi  nge an sem ang le tih te hi a mawl thlak lutuk, tiin a thusawinaah tawngkam a chhep zauh mai a. Kei chu ka mawl a, khawi aṭangin nge cheng nuai 3 chu an sem dawn tih hi kan zawt nawn leh ngat teh ang.