Tu nge Droupadi Murmu?

India President (15-na) atana thlanthar chanchin tawi.

Murmu-i hi kum 2017-a president thlan dawn khan BJP chuan an candidate dawn nia sawi rik niin hemi atang hian hmelhriat a hlawh zual a. Hetih lai hi Jharkhand governor a nih lai a ni.Kum 1958-a Baidaposi khua, Mayurbhanj district-a piang, Murmu-i hi Santhal niin India-ah chuan tribal hnam lian ber pawl an ni.

Village council chief fanu a ni a, an state khawpui, Bhubaneswar-a Ramadevi Women’s College atanga lehkha zir chhuak a ni.Chanchinbumi leh activist, kum 1980 atanga Murmu-i lo hre tawh, Nigamananda Patnaik-i chuan an khuaa sikul atangin lehkha zir bul a tan niin a sawi.

“Naupang a nih laiin a pa hian an khaw bul, Rairangpur khuaah khatih laia Odisha sorkara minister pakhat, Kartik Majhi-a inah a hruai ve a. An in an thlan chuan rang takin a sikul certificate phawrhin minister hnenah hian Bhubaneswar-a lehkha a zir duh thu a sawi nghal a ni,” a ti.

Minister chuan hmeichhe naupang duhna chu tha a tihpui em em a, a hnuaia thawkte hnenah an state khawpuia sorkar zirna ina a kai theihna tur ngaihtuahsak turin a ti nghal niin Patnaik-i chuan a sawi.

Lehkha a zir zawh hnuah Odisha sorkarah clerk hna a thawk a, a hnuah kum 1979 leh 1983 inkar khan irrigation and energy department-ah junior assistant-in a thawk leh bawk.Bhubaneswar-a a hna chu chawlhsanin Rairangpur-ah a kir a, a nu (a pasala nu) enkawl pahin Sri Aurobindo Integral School-ah zirtir hna a thawk zui ta a ni.

“Hetih lai hian hlawh pawh a la duh lo va, a rickshaw chuanman chiah sikulin a tumsak a. A hna chu hna ni lovin vantlanga thawhna niin a sawi a, a pasal, bank officer hlawh chu an chhungkuain an kham tawk niin a sawi thin,” tiin Patnaik-i chuan a sawi.

Politics-ah hian kum 1997 khan lutin Rairangpur-ah councillor atan thlan a ni a. An khuaa faina lam hnathawhte chu a hmunah enpuiin ni sa hnuaiah pawh kawr leh bawlhhlawh thian laite chu a ho thin.

BJP hmingin state assembly-ah vawi hnih, kum 2000 leh 2009 khan Rairangpur bial atanga thlan tlin a ni.Kum 2000 leh 2004 inkar khan Biju Janata Dal hruaitu, Naveen Patnaik-a kaihhruai sorkarah minister niin commerce & transport a chang a, a hnuah fisheries & animal resources a chang zui leh bawk.Kum 2006 leh 2009 inkar khan an state-a BJP tribal wing-ah president a ni.

Kum 2009 khan a fapa upa ber chânin a tuar hle a, a hnuah a fapa pahnihna leh a pasal a sun leh bawk.