Indian Football thuthar

AIFF-in President thar nei; AIFF Executive Committee Member atan MFA Hony Secy tling

All India Football Federation hruaitu thar thlanna chu vawiin (September 2, 2022) khan Football House, New Delhi-ah neih a ni a, AIFF President thar atan Kalyan Chaubey thlan a ni a; Mizoram Football Association Honorary Secretary Lalnghinglova Hmar chu Executive Committee Member atan chuhtu awm loin a tling bawk.

 

AIFF inthlanah hian footballer hlui pahnih Kalian Chaubey (45) leh Bhaichung Bhutia-te inkhingin Kalian Chaubey hian vote 33-1 in a hneh a ni. Kalian Chaubey hi India team-ah goalkeeper ṭhin niin football club lian tak takah a khel tawh a, football a chawlhsan hnuah politics lamah a lut a; West Bengal lam mi niin Gujarat aiawhin a in-candidate thung a ni. 

Vice President atan NA Harris, Karnataka thlan tlin a ni a, Treasurer atan Kipa Ajay, Arunachal Pradesh a tling bawk. 

Executive Committee Member post 14 chu mi 14-in chuhin inthlan hranpa ngai loin heng mite hi tlinga puan vek an ni a, MFA Honorary Secretary hi AIFF-ah a term hnihna atan Executive Committee Member atan thlan a ni. 

Executive Committee Member zingah Lalnghinglova Hmar leh Deepak Sharma (Himachal Pradesh) te chu a zawna tling awm chhun an ni a, a dang zawng hi AIFF-ah mi thar vek an ni ang. 

Executive Committee Member-te chu :

GP Palguna (Telangana), Avijit Paul (Odisha), P Anil Kumar (Kerala), Valanka Natasha Alemao (Goa), Maloji Raje Chhatrapati (Maharashtra), Menla Ethenpa (Sikkim), Mohan Lal (Chhatisghar), Arif Ali (Uttarakhand), K Neibou Sekhose (Nagaland), Lalnghinglova Hmar (Mizoram), Deepak Sharma (Himachal Pradesh), Vijay Bali (Punjab), Syed Hasnain Ali Naqvi (Madhya Pradesh) leh Syed Imtiaz Husain (Bihar) te an ni. 

Anni bakah hian AIFF dan thar angin footballer hlui paruk - mipa pali leh hmeichhia pahnih chu AIFF Executive Committee-ah hian co-opted member atan ziah luh an ni.

- Issued by 

Information and Publicity Committee, Mizoram Football Association