KAN PARTY POLITICS THLIR DAN I HAWISAWN HRET ANG U.

(Whatsapp tuala ka chhar. A ziaktu hian pawi a ti em lovang chu maw?!)

KAN  PARTY POLITICS THLIR DAN I HAWISAWN HRET ANG U.

~Thelma Nanteii  Pachuau

Pathianin State nuam leh râlmuang min pe a, Khawvêl changkânnain a ken tel ang zêlin Politics pawh kan lo hmelhriat ve a. Chutih rualin, kan politics thlir dana Sipai bâng bo ve zet zet hi kan va tam êm!

    Mi enge maw zât rilru hian tum mumal nei lovin Party hi kan thlira adik tlat lo!! Politics awmzia chu, Ram inrêlbawlna, ani ve tawp. Chu ram inrêlbawlna chu a chhia kan duh anih loh chuan kan ngaihsak ngei ngei tûr ani. Ka nutral e chuti khati,tih tih pawh a ṭha ber lo. Duh duh lama kawih thlêk kual nun nei hi mihring tum bulbâl nei an ni lo tlângpui.

   Ṭhenkhat chuan eng party mah ka ring tawh lo,Politics hi ka ning, kan ti fo. Keipawn ka ning, Mahse politics ni lovin, In beihna tam hi ka nin chu ani.

    Engmah ka nihpui tak tak lo; he chhuanlam sawi hi i bânsan ang u. I mimal hamṭhatna ngaihtuahtu kha politics ani tlat lo. Ram inrêlbâwlna tih ni na nâ nâ a, i mimal hlâwkna ilo zawng ngat ngat anih chuan, i ram i hnam hmangaihna i hlat ve hlê tih hi ka hrilh duh che. Kan tel ve zak zak a. Mimal hlâwkna chu lo hmuh ve hun alo awm anih chuan, alo awm palh ti zâwk teh ang. I mimal hlâwkna kha indirect takin Party Politics hian a zawn tûr ani tlat lo!! I ram, i hnam hi politics chuan a rawn upgreat ṭhat phawt chuan ka hlâwk lo, ek e balê i tih fo ngai lovin leh, nangmah mai ni lo, I chipuite  i ram chhûnga chêng zawng zawngin a rah kan seng dâwn anih chu. I man thiam em le?

   Ti thei ni ila industry lianpui puite din khep khup mai ila, Food factory lianthamte hi nei ve sup sup mai ta ila. Chu chu ram leh hnam hmasâwnna leh, i mimal chhawr bâwk theih thil chu ani dâwn chauh anih chu. Chuti ni lova mimal tinin mahni tê tê a chhawr kan lo tum ve vak vakna thlarâu sual hian. I tu leh fate daih thleng tûr ram hmasâwnna mipui hmasâwnna ni tel nghâl hi kan hnâwl tihna ani a. Politics(Ram inrêlbawlna) chu kan fail, tihna ani ta daih si ani.

   Vaimîm ban tui tak i ei châk chuan i tuh phawt angai a. I tuh loh chuan ṭhenawmte ta kha to ti chung chung pawhin i lei alo ngai ta ṭhin. Ṭhenawmten i pawisa an lo têl hem hem mai dâwn anih chu maw!! Chutiang chiah chuan Mi ram hausaknate leh mawinate hi party politics aṭanga mimal hlâwkna ani hleinem.. An ram inrêlbawlna  chak vangin ram hausa an lo neia Project lian tak takte neiin. Khawtualah inhlawhna leh thawh tûr alo tama. Sum lêng vâk alo tamin ṭhenawm vaimîm lei sak ngai lovin an lo intodelh hret hret ta zâwk vâng ani e.

   Tûna kan party politics khelh dân leh thlir dân hi chu azah thlâk veng veng. Ram ropuiten min nuihzat ka hlâu!! Ram leh hnam, khawtlâng leh i chhûngkua lo nuamsa tûr chuan, i chhûngkua kha  a tâwp bera hlâwkna têltu atân indah ngam rawh. I ram hmasâwnna tûr ilo têl lâwk duh tlat si chuan mi ram ka awt chuti khati, tih vêl sawi tawh suh.

    I saruak khuh tûrin puanthân ringawt ahman theih loh. I hâk rem theih nân, kawr leh kekawr i ṭhui tê tê angai. Engkim hi direct in a hman theih loh. A kawng a kual ngei ngei. Chutiang chiah chu ani Party Politics awmzia leh hnathawh dân pawh. Party ah i awm dêk dêk a, direct taka hlâwk tum nghâl ngawtna thlarâu dik lo vâng anih hi kan ram hi. Rih artui phur ang chauhva angaia kan súk tluk tluk reng chhan!! Mi ram kan awt, an ram nawm leh hausakna kawng kual tak kha keini chuan direct nghal ṭhuai mai kan tum hi kan hnam hlawhchhamna ani.

   Chuvângin, Party Politics ka tel peih lo, engmah ka nihpui lo, tumah ka vote peih lo, tih vêl kha lo zak chem chem tawh rawh. Vote lo mah la a vote thei an tam lutuk tho. I ram i hnam hmakhua i dâwn lo. Vawkpui anga ei tawrh, mu thau leh kûng si, Thluak hmang thiam si lo hi i ni ta ber anih chu.

    Ka thusawi ngai bawk ka sawi leh ang. *I ram chu rah ṭha chhuah tûrin thil ṭha pe rawh* I ram hi i vote vawikhat avângin a chhiain a ṭha thei. I vote kha lo induh pui tawh suh. I ramin a mamawhna che i chhânlet dânin i dawn lêt tûr a hril ani tih hrereng ang che.

****************